ഇറാന്റെ മിസൈല്‍ ഏറ്റ് യുക്രെയ്ന്‍ വിമാനം വീഴുന്നതിന്റെ വിഡിയോ പോസ്റ്റ് ചെയ്തയാള്‍ അറസ്റ്റില്‍
യുക്രെയ്ന്‍ യാത്രാവിമാനം ഇറാന്റെ മിസൈല്‍ ഏറ്റ്് വീഴുന്നതിന്റെ വിഡിയോ എടുത്ത് ഓണ്‍ലൈനില്‍ പോസ്റ്റ് ചെയ്തയാള്‍ അറസ്റ്റില്‍ ആയെന്ന് അര്‍ധ ഔദ്യോഗിക മാധ്യമമായ ഫാര്‍സ് ന്യൂസ് റിപ്പോര്‍ട്ട് ചെയ്യുന്നു. ഇറാന്‍ റവല്യൂഷനറി ഗാര്‍ഡ്‌സ് ആണ് ഇയാളെ അറസ്റ്റ് ചെയ്തതെന്നാണ് റിപ്പോര്‍ട്ട്. വിമാനാപകടത്തെപ്പറ്റിയുള്ള അന്വേഷണത്തിലെ കണ്ടെത്തലുകള്‍ പൊതുജനത്തിനു ലഭ്യമാക്കുമെന്നും വാര്‍ത്തയില്‍ സൂചനയുണ്ട്.
്ഇറാന്റെ സൈനിക കേന്ദ്രങ്ങളില്‍നിന്നുള്ള രണ്ടു മിസൈലുകളേറ്റാണ് ടെഹ്‌റാനില്‍ വിമാനം വീണതെന്ന് വ്യക്തമാകുന്ന പുതിയ ദൃശ്യങ്ങള്‍ കഴിഞ്ഞ ദിവസമാണ് പുറത്തു വന്നത്. ന്യൂയോര്‍ക്ക് ടൈംസാണ് ഇക്കാര്യം റിപ്പോര്‍ട്ട് ചെയ്തത്. വിമാനപഥത്തില്‍നിന്ന് എട്ടു മൈല്‍ അകലെ നിന്നാണ് മിസൈല്‍ വിക്ഷേപിച്ചത്. മിസൈലേറ്റ ഉടനെ നിലംപതിച്ചില്ലെന്നും തീപിടിച്ച വിമാനം ടെഹ്‌റാനിലെ വിമാനത്താവളത്തിലേക്ക് പറക്കുന്നതും വ്യക്തമാക്കുന്ന ദൃശ്യങ്ങളാണ് ഇതിലുള്ളത്.
വിമാനം വീഴ്ത്തിയതിനെതിരെ രാജ്യത്തിനകത്ത് പ്രതിഷേധം ശക്തമായതോടെ ഉത്തരവാദികളില്‍ ചിലരെ കഴിഞ്ഞദിവസം ഇറാന്‍ അറസ്റ്റ് ചെയ്തിരുന്നു. ആദ്യം നിഷേധിച്ചെങ്കിലും റവല്യൂഷനറി ഗാര്‍ഡ്‌സ് തലവന്‍ ഖാസിം സുലൈമാനിയെ വധിച്ചതിനു യുഎസിനു സൈനിക മറുപടി നല്‍കുന്നതിനിടെ 'അബദ്ധത്തില്‍' ആണ് യാത്രാവിമാനം വീഴ്ത്തിയതെന്ന് ഇറാന്‍ സമ്മതിക്കുകയായിരുന്നു.
https://www.facebook.com/Malayalivartha
