ഇറാനില്‍ നിറയെ യാത്രക്കാരുമായി എയർപോർട്ടിൽ ഇറങ്ങിയ യാത്രാ വിമാനം റണ്‍വെ കടന്ന് നടുറോഡിലെത്തി. 150 യാത്രക്കാരുമായി എത്തിയ വിമാനം തലനാരിഴയ്ക്കാണ് രക്ഷപ്പെട്ടത്. റോഡിലും നല്ല തിരക്കുള്ള സമയം ആയിരുന്നു ..തെക്കന്‍ ഇറാന്‍ നഗരമായ മഹ്ഷഹറിലാണ് സംഭവം.

വിമാനം ഇറങ്ങുമ്പോള്‍ ഗിയറില്‍ വന്ന തകരാറാണ് റണ്‍വെ കടന്ന് പോകാന്‍ കാരണംഎന്ന് പറയുന്നു . യാത്രക്കാര്‍ പരിഭ്രാന്തരായെങ്കിലും ആര്‍ക്കും കാര്യമായ പരിക്കില്ല. പ്രാദേശിക സമയം രാവിലെ 9.30നാണ് വിമാനം റോഡിലേക്ക് എത്തിയത്.

സംഭവത്തെ കുറിച്ച് വ്യോമയാന വിഭാഗം അന്വേഷണം പ്രഖ്യാപിച്ചിട്ടുണ്ട്. യാത്രക്കാരെ വിമാനത്തില്‍ നിന്ന് ഇറക്കുന്ന വീഡിയോ പുറത്തുവന്നിട്ടുണ്ട്. റോഡിലുണ്ടായിരുന്ന ആളുകളും യാത്രക്കാരെ വിമാനത്തില്‍ നിന്ന് ഇറക്കാന്‍ സഹായിച്ചു. വാഹനങ്ങളും ആളുകളും തിങ്ങിനിറഞ്ഞ റോഡിലേക്കാണ് വിമാനം എത്തിയത്.

അതേസമയം, പൈലറ്റിന് പറ്റിയ പിഴവാണ് വിമാനം റണ്‍വെ വിടാന്‍ കാരണമെന്നും റിപ്പോര്‍ട്ടുകളുണ്ട്. ടെഹ്‌റാന്‍ കേന്ദ്രമായി പ്രവര്‍ത്തിക്കുന്ന കാസ്പിയന്‍ വിമാനക്കമ്പനിയുടെ ഉടമസ്ഥതയിലുള്ള മക്‌ഡോണല്‍ ഡഗ്ലസ് വിമാനമാണ് റൺവേ വിട്ട് റോഡിലൂടെ ഓടിയത് . ടെഹ്‌റാനിലെ മെഹ്‌റാബാദ് വിമാനത്താവളത്തില്‍ നിന്ന് പുറപ്പെട്ടതായിരുന്നു വിമാനം.

വിമാനത്തിന്റെ പിന്‍ചക്രം തകര്‍ന്നിരുന്നുവെന്നും റിപ്പോര്‍ട്ടുണ്ട്. ഇറാനിലെ മിക്ക വിമാനങ്ങളും വര്‍ഷങ്ങള്‍ പഴക്കമുള്ളതാണ്. അമേരിക്കന്‍ ഉപരോധം മൂലം പുതിയ വിമാനം വാങ്ങുന്നതിനോ അറ്റക്കുറ്റ പണികള്‍ നടത്തുന്നതിനോ സാധിക്കുന്നില്ല എന്നും പരാതി ഉയരുന്നുണ്ട് .