അശ്ലീല ചിത്രങ്ങള്‍ കാണിച്ച് ഭീഷണിപ്പെടുത്തി പണം തട്ടാന്‍ ശ്രമിച്ച വിദേശ യുവതിക്ക് ദുബായ് കോടതി ആറ് മാസം തടവ് ശിക്ഷ വിധിച്ചു. ബഹ്‌റിന്‍ സ്വദേശിയായ 32 കാരനോടാണ് യുവതി ഇരുവരും ലൈംഗിക ബന്ധത്തില്‍ ഏര്‍പ്പെടുന്ന ദൃശ്യങ്ങള്‍ കാണിച്ച് പണം ആവശ്യപ്പെട്ടത്. 1.9 ദശലക്ഷം ദിര്‍ഹം നല്‍കാത്ത പക്ഷം നഗ്‌ന ചിത്രങ്ങള്‍ പരസ്യപ്പെടുത്തുമെന്നും യുവതി ഭീഷണി മുഴക്കി. സംഭവത്തില്‍ യുവതി കുറ്റക്കാരിയെന്ന് കണ്ടെത്തിയ കോടതി ഇവരെ നാടുകടത്താനും ഉത്തരവിട്ടു. യുവതിയുടെ മൊബൈല്‍ ഫോണും കോടതി പിടിച്ചെടുത്തു. മൊറോക്കന്‍ സ്വദേശിയായ 22 കാരിയാണ് പ്രതി. കഴിഞ്ഞ വര്‍ഷം ഒക്ടോബര്‍ 11 നാണ് അല്‍ ഖുസൈസ് പോലീസ് സ്‌റ്റേഷനില്‍ യുവാവ് കേസ് നല്‍കിയത്.