കൊറോണ വൈറസ്... ഇറാനില്‍ അകപ്പെട്ട ഇന്ത്യക്കാരെ കൊണ്ടുവരാന്‍ ഇറാനിലേക്ക് വ്യോമസേന; ഇറാനില്‍നിന്ന് 108 പേരെയാണ് നാട്ടിലെത്തിക്കാനായി വ്യോമസേന ഒരുങ്ങുന്നത്
കൊറോണ വൈറസ് ബാധ പടര്‍ന്നുപിടിക്കുന്ന ഇറാനില്‍ അകപ്പെട്ട ഇന്ത്യക്കാരെ ഇന്ത്യന്‍ വ്യോമസേന നാട്ടിലെത്തിക്കാന്‍ ഒരുങ്ങുകയാണ്. ഇറാനിലേക്ക് വ്യോമസേനയുടെ 'സി 17 ഗ്ലോബ് മാസ്റ്റര്‍' എന്ന പ്രത്യേക വിമാനമാണ് പുറപ്പെടാന്‍ ഒരുങ്ങുന്നത്. ഈ വിമാനം തിങ്കളാഴ്ച ഇറാന്‍ തലസ്ഥാനമായ ടെഹ്‌റാനിലേക്ക് തിരിക്കും. ഉത്തര്‍പ്രദേശിലെ ഗാസിയാബാദിലുള്ള വ്യോമസേനയുടെ ഹിന്ദോന്‍ വ്യോമകേന്ദ്രത്തില്‍നിന്നും രാത്രി എട്ടിനായിരിക്കും വിമാനം തിരിക്കുക.ഇറാനില്‍നിന്ന് 108 പേരെയാണ് നാട്ടിലെത്തിക്കാനായി വ്യോമസേന ഒരുങ്ങുന്നത്. ഇവര്‍ക്ക് രോഗബാധയില്ലെന്ന സ്ഥിരീകരണം ലഭിച്ച ശേഷമാണ് തിരികെ എത്തിക്കാന്‍ നടപടി ആരംഭിച്ചത്. ഇറാനില്‍ നിലവില്‍ രണ്ടായിരത്തോളം ഇന്ത്യക്കാരാണുള്ളത്. മൂന്നു ദിവസം മുന്‍പ് മഹാന്‍ എയര്‍ലൈന്‍ വിമാനം 300 ഇന്ത്യക്കാരുടെ സാമ്പിളുകള്‍ ഇന്ത്യയിലേക്ക് കൊണ്ടുവന്നിരുന്നു. ഇവ പരിശോധിച്ച ശേഷം രോഗബാധയില്ലെന്ന് സ്ഥിരീകരിച്ചവരെയാണ് നാട്ടിലെത്തിക്കുന്നത്. എന്നാല്‍ ഇതിനു മുന്‍പേതന്നെ കേന്ദ്രസര്‍ക്കാര്‍ ശാസ്ത്രജ്ഞരേയും മൊബൈല്‍ ലബോര്‍ട്ടറികളും ഇറാനിലേക്ക് അയച്ചിട്ടുണ്ട്. ഇവിടെ പ്രവര്‍ത്തനം ആരംഭിക്കുന്നതിനായി കസ്റ്റംസ് അനുമതിക്കായി ശാസ്ത്രജ്ഞര്‍ കാത്തിരിക്കുകയാണെന്ന് കേന്ദ്ര ആരോഗ്യമന്ത്രി ഹര്‍ഷവര്‍ധന്‍ പറഞ്ഞു.
https://www.facebook.com/Malayalivartha
