കോവിഡ് 19 വൈറസ് ബാധയുടെ പശ്ചാത്തലത്തില് യു.എസ് പ്രസിഡന്റ് തെരഞ്ഞെടുപ്പില് ഡെമോക്രാറ്റിക് കക്ഷി സ്ഥാനാര്ഥിയെ തെരഞ്ഞെടുക്കുന്ന പ്രൈമറിയുടെ ഭാഗമായുള്ള റാലികള് റദ്ദാക്കി സ്ഥാനാര്ത്ഥികള്
കോവിഡ് 19 വൈറസ് ബാധയുടെ പശ്ചാത്തലത്തില് യു.എസ് പ്രസിഡന്റ് തെരഞ്ഞെടുപ്പില് ഡെമോക്രാറ്റിക് കക്ഷി സ്ഥാനാര്ഥിയെ തെരഞ്ഞെടുക്കുന്ന പ്രൈമറിയുടെ ഭാഗമായുള്ള റാലികള് റദ്ദാക്കി സ്ഥാനാര്ഥികള്. മുന് വൈസ് പ്രസിഡന്റ് ജോ ബൈഡനും ബേണി സാന്ഡേഴ്സും ക്ലേവ് ലാന്ഡ്, ഓഹിയോ എന്നിവിടങ്ങളില് വ്യക്തിപരമായി നടത്താന് തീരുമാനിച്ച റാലികളാണ് റദ്ദാക്കിയത്.
ജനങ്ങള് തിങ്ങി നിറയുന്ന പരിപാടികളിലൂടെ കൊറോണ വൈറസ് മറ്റുള്ളവരിലേക്ക് പകരാന് ഇടയാകുമെന്ന് ആരോഗ്യ പ്രവര്ത്തകര് ചൂണ്ടിക്കാട്ടിയ സാഹചര്യത്തിലാണ് നടപടി. അമേരിക്കന് പ്രസിഡന്റ് ഡോണള്ഡ് ട്രംപും വൈസ് പ്രസിഡന്റ് മൈക്ക് പെന്സും പങ്കെടുത്ത ചടങ്ങില് സംബന്ധിച്ചയാള്ക്ക് കഴിഞ്ഞ ദിവസം വൈറസ് ബാധ സ്ഥിരീകരിച്ചിരുന്നു. ഫെബ്രുവരി 26 മുതല് 29 വരെ വാഷിങ്ടണ് സമീപം നടന്ന കണ്സര്വേറ്റിവ് രാഷ്ട്രീയ പ്രവര്ത്തന സമ്മേളനത്തില് (സി.പി.എ.സി) പങ്കെടുത്തയാള്ക്കാണ് രോഗബാധ സ്ഥിരീകരിച്ചത്.
ആയിരങ്ങള് പങ്കെടുക്കുന്ന യാഥാസ്ഥിതിക രാഷ്ട്രീയ പ്രവര്ത്തകരുടെ രാജ്യത്തെ ഏറ്റവും വലിയ വാര്ഷിക കൂടിച്ചേരലാണിത്. വൈറസ് ബാധിച്ചയാളെ ന്യൂജഴ്സി ആശുപത്രിയില് പ്രത്യേക നിരീക്ഷണത്തിലാക്കിയിട്ടുണ്ട്. എന്നാല്, ഇയാള് ട്രംപുമായോ പെന്സുമായോ നേരിട്ട് ഇടപഴകിയിട്ടില്ല.
https://www.facebook.com/Malayalivartha
