കൊറോണ (കോവിഡ്-19) വൈറസ് ബാധ 121 രാജ്യങ്ങളില്‍ പടര്‍ന്നതോടെ മഹാമാരിയായി ലോകാരോഗ്യസംഘടന (ഡബ്ല്യു.എച്ച്.ഒ.) പ്രഖ്യാപിച്ചു. ഡബ്ല്യു.എച്ച്.ഒ.യുടെ അധ്യക്ഷന്‍ േെടഡ്രാസ് അഥനോം ഗബ്രീസീയൂസാണ് ഇക്കാര്യം ഔദ്യോഗികമായി അറിയിച്ചത്. നിലവില്‍ വിവിധരാജ്യങ്ങളിലെ 1,22,289 പേര്‍ക്കാണ് കൊേറാണ സ്ഥിരീകരിച്ചത്. 4389 പേര്‍ക്ക് ജീവന്‍ നഷ്ടമായി. എല്ലാ രാജ്യങ്ങളും തന്നെ ഇപ്പോള്‍ കൊറോണയുടെ ഭീഷണി നേരിടുന്നുണ്ടെന്നും ഗബ്രീസീയൂസ് പറഞ്ഞു. ഈ സാഹചര്യത്തിലാണ് മഹാമാരിയായി പ്രഖ്യാപിച്ചത്.

പുതിയൊരു വൈറസ് ഉണ്ടാകുകയും അത് ലോകംമുഴുവന്‍ പടരുകയും ചെയ്യുന്ന സാഹചര്യത്തിലാണ് ലോകാരോഗ്യസംഘടന അത് മഹാമാരിയായി പ്രഖ്യാപിക്കുന്നത്. പുതിയ വൈറസായതിനാല്‍ മനുഷ്യര്‍ക്ക് ഇതിനെതിരേ സ്വാഭാവിക പ്രതിരോധം ഉണ്ടാകില്ലെന്നതും ലോകാരോഗ്യസംഘടന കണക്കിലെടുക്കും. കോളറ, എബോള, പ്ലേഗ്, സിക, തുടങ്ങിയവയാണ് ലോകാരോഗ്യസംഘടന ഇതിനുമുമ്പ് മഹാമാരിയായി പ്രഖ്യാപിച്ചവയില്‍ ചിലത്. ഇറ്റലിയില്‍ 631 പേരും ഇറാനില്‍ 354 പേരും മരിച്ചു. ബുധനാഴ്ച മാത്രം 63 പേരാണ് ഇറാനില്‍ മരിച്ചത്. ചൈനയില്‍ ചൊവ്വാഴ്ച മരിച്ചത് 22 പേരാണ്. യു.എസില്‍ മരണസംഖ്യ 31 ആയി ഉയര്‍ന്നു. രോഗം ബാധിച്ചവരുടെ എണ്ണം ആയിരം കടന്നു.
കുവൈത്തില്‍ 29 വരെ പൊതു അവധി, വിമാന സര്‍വീസുകള്‍ റദ്ദാക്കി. മുഴുവന്‍ വിദ്യാലയങ്ങളും അടച്ചു. ജനങ്ങള്‍ ഒത്തുകൂടുന്നത് ഒഴിവാക്കാന്‍ സിനിമാ തിയേറ്ററുകളും മാളുകളും ഹോട്ടലുകളും അടച്ചിടാനും നിര്‍ദേശിച്ചു. വിവാഹച്ചടങ്ങുകള്‍ ഉള്‍പ്പെടെ ആഘോഷപരിപാടികളും ഒഴിവാക്കും.