കോവിഡ് ബാധിച്ചുമരിച്ചവരുടെ എണ്ണം ലോകത്താകെ 81000 കടന്നു. കോവിഡ് പടരുന്ന സാഹചര്യത്തില്‍ ജപ്പാനില്‍ പ്രധാനമന്ത്രി ആബെ ഷിന്‍സോ അടിയന്തരാവസ്ഥ പ്രഖ്യാപിച്ചു. ഫിലിപ്പീന്‍സും കൊളംബിയയും ഉള്‍പ്പെടെ ഏതാനും രാജ്യങ്ങള്‍ നിയന്ത്രണങ്ങള്‍ നീട്ടി. അതേസമയം 2 മാസം നീണ്ട പോരാട്ടത്തിനൊടുവില്‍ ഒരു കോവിഡ് മരണം പോലും റിപ്പോര്‍ട്ട് ചെയ്യാത്ത ദിവസത്തിന്റെ ആശ്വാസത്തിലാണു ചൈന.. ചൈനയില്‍നിന്ന് ആശ്വാസവാര്‍ത്ത. ഡിസംബര്‍ അവസാനം രോഗം ആദ്യം കണ്ടെത്തിയ അവിടെ ആരും മരിക്കാതെ ഒരു ദിനം. രോഗം പടര്‍ന്നുപിടിച്ചശേഷം ആദ്യമായാണ് ഇത്.

ലോകത്താകെ മരണസംഖ്യ 81,000 കടന്നു. തുടര്‍ച്ചയായി നാലു ദിവസം മരണസംഖ്യ കുറഞ്ഞ സ്‌പെയിനില്‍ ചൊവ്വാഴ്ച വര്‍ധിച്ചു. 743 പേര്‍കൂടി മരിച്ചു. മരണസംഖ്യ 13,798. ബ്രിട്ടനില്‍ 786 പേര്‍ കൂടി മരിച്ചപ്പോള്‍ മരണസംഖ്യ 6159 ആയി. ബല്‍ജിയത്തില്‍ 403 പേര്‍കൂടി മരിച്ചു. മരണസംഖ്യ 2035. നെതര്‍ലന്‍ഡ്‌സിലും 2000 കടന്നു.

ഏത് ആരോഗ്യവ്യവസ്ഥയുടെയും നട്ടെല്ല് നേഴ്‌സുമാരാണെന്ന് എല്ലാവര്‍ക്കും അറിയാം കോവിഡ് രോഗികളുടെ എണ്ണം വര്‍ധിക്കുന്ന സാഹചര്യത്തില്‍ ലോകമെമ്പാടും 60 ലക്ഷത്തോളം നേഴ്‌സുമാര്‍ അധികം വേണ്ടിവരുമെന്ന് ലോകാരോഗ്യസംഘടന. ലോകാരോഗ്യ സംഘടന, നേഴ്‌സിങ് നൗ, നേഴ്‌സുമാരുടെ അന്താരാഷ്ട്ര സമിതി എന്നിവര്‍ ചേര്‍ന്ന് തയ്യാറാക്കിയ റിപ്പോര്‍ട്ടിലാണ് പരാമര്‍ശം. ഏത് ആരോഗ്യവ്യവസ്ഥയുടെയും നട്ടെല്ല് നേഴ്‌സുമാരാണെന്ന് ഡബ്ല്യൂഎച്ച്ഒ തലവന്‍ തെഡ്രോസ് അധാനം പ്രസ്താവനയില്‍ പറഞ്ഞു.

നിലവില്‍ കേവലം 2.8 കോടി നേഴ്‌സുമാര്‍ മാത്രമാണ് ലോകത്താകമാനമുള്ളത്. ആഫ്രിക്ക, തെക്കുകിഴക്കന്‍ ഏഷ്യ, പശ്ചിമേഷ്യ, ലാറ്റിനമേരിക്ക എന്നിവിടങ്ങളിലെ രാജ്യങ്ങളിലാണ് നേഴ്‌സുമാര്‍ ഏറ്റവും കുറവ്. അതിനാല്‍ തന്നെ, നേഴ്‌സിങ് ജോലി തെരഞ്ഞെടുക്കാന്‍ ആളുകളെ പ്രോത്സാഹിപ്പിക്കണമെന്നും റിപ്പോര്‍ട്ടില്‍ പരാമര്‍ശിക്കുന്നു.
ലോകത്തെ മുഴുവന്‍ ആരോഗ്യപ്രവര്‍ത്തകരില്‍, പകുതിയോളം നേഴ്‌സുമാരാണ്. അതില്‍ തന്നെ എണ്‍പതു ശതമാനം ലോകജനസംഖ്യയുടെ പകുതി പേരേ ചികിത്സിക്കാന്‍ മാത്രമാണെന്നും റിപ്പോര്‍ട്ടില്‍ സൂചിപ്പിക്കുന്നു. അവശേഷിക്കുന്ന 20 ശതമാനമാണ് ബാക്കി പകുതി ലോകജനതക്കുള്ളത്. നേഴ്‌സുമാരെ സൃഷ്ടിക്കാത്ത സമ്പന്നരാജ്യങ്ങള്‍ കുടിയേറ്റക്കാരെ ആശ്രയിക്കുന്നതിനാല്‍ ദരിദ്രരാജ്യങ്ങളില്‍ വേണ്ടത്ര നേഴ്‌സുമാരില്ലെന്ന് നേഴ്‌സിങ്ങ് നൗവിന്റെ മേരി വാറ്റ്കിന്‍സ് പറഞ്ഞു.
ഇതുവരെ ലോകത്താകമാനം 100ലധികം ആരോഗ്യപ്രവര്‍ത്തകര്‍ കോവിഡിനിരയായി. ഇറ്റലിയില്‍ രോഗികളില്‍ 9 ശതമാനവും സ്‌പെയിനില്‍ 12ശതമാനവും ആരോഗ്യപ്രവര്‍ത്തകരാണ്. കൃത്യമായ നിര്‍ദേശങ്ങളില്ലാത്തതും സുരക്ഷാസാമഗ്രികളില്ലാത്തതുമാണ് ആരോഗ്യപ്രവര്‍ത്തകര്‍ക്ക് രോഗം ബാധിക്കാനിടവരുന്നത്.

ഇറ്റലിയില്‍ മരണസംഖ്യ 17,127. ഫ്രാന്‍സില്‍ ഒമ്പതിനായിരത്തോട് അടുക്കുന്നു. അമേരിക്കയില്‍ 12,000 കടന്നു. രോഗികള്‍ നാലു ലക്ഷത്തിനടുത്ത്. ഇറാനില്‍ മരണസംഖ്യ ചൊവ്വാഴ്ചയും കുറഞ്ഞു. 133 പേരാണ് മരിച്ചത്. രോഗം സ്ഥിരീകരിക്കപ്പെട്ടവരുടെ എണ്ണം ലോകത്ത് 14 ലക്ഷം കടന്നു. മൂന്നു ലക്ഷത്തോളം പേര്‍ രോഗമുക്തരായി.