കോവിഡ് പിടിമുറുക്കിയ വികസിതരാജ്യങ്ങളുടെയും സ്ഥിതി വളരെ ദയനീയമാണ്. അമേരിക്കയില്‍ രോഗം ഭേദമായവരുടെ നിരക്ക് 5.26 ശതമാനം മാത്രമാണ്. അവിടെ ജനുവരി 20-നാണ് ആദ്യമായി രോഗം സ്ഥിരീകരിക്കുന്നത്. ഇതുവരെ രോഗം സ്ഥിരീകരിക്കപ്പെട്ട 4,35,160 പേരില്‍ 3,97,472 ആളുകളും രോഗത്തിന്റെ പിടിയില്‍ത്തന്നെ. ആയിരങ്ങളുടെ ജീവനെടുത്തു കൊറോണ ഭീതി പടര്‍ന്നു പിടിക്കുന്നതിനിടയില്‍ ലോകരാജ്യങ്ങള്‍ തമ്മില്‍ മാസ്‌കുകള്‍ക്കും മെഡിക്കല്‍ ഉപകരണങ്ങള്‍ക്കും വേണ്ടി പിടിവലി. ജര്‍മന്‍ പൊലീസിനു വേണ്ടി ചൈനയില്‍നിന്ന് ഓര്‍ഡര്‍ ചെയ്ത രണ്ടു ലക്ഷത്തോളം എന്‍95 മാസ്‌കുകള്‍ അമേരിക്ക തട്ടിയെടുത്തതായി ജര്‍മനി ആരോപിച്ചു. ജര്‍മനിയിലേക്കു വിമാനമാര്‍ഗം കൊണ്ടുപോയ മാസ്‌കുകള്‍ ബാങ്കോക്കില്‍ തടഞ്ഞ് അമേരിക്കയിലേക്ക് അയയ്ക്കുകയായിരുന്നുവെന്ന് ജര്‍മന്‍ അധികൃതര്‍ വ്യക്തമാക്കി. 15,328 പേര്‍ മരിച്ച സ്‌പെയിന്‍ പക്ഷേ, രോഗമുക്തി നേടുന്നവരുടെ നിരക്കില്‍ മുന്നിലാണ്. ഇവിടെ രോഗം ബാധിച്ച 34.21 ശതമാനം പേര്‍ക്കും ഭേദമായി.
എന്നാല്‍ കോവിഡ്-19 രോഗവ്യാപനത്തിനെതിരേ കേരളത്തിന്റെ യുദ്ധം വിജയത്തിലേക്ക്. ആദ്യ രോഗബാധ റിപ്പോര്‍ട്ട് ചെയ്ത് നൂറുദിവസം പിന്നിടുമ്‌ബോള്‍, രോഗമുക്തരായവരുടെ എണ്ണത്തില്‍ ലോകശരാശരിയെക്കാള്‍ മുന്നിലെത്തി. സംസ്ഥാനത്ത് കോവിഡ് സ്ഥിരീകരിച്ചവരില്‍ 27.17 ശതമാനംപേരും രോഗമുക്തരായി. രണ്ടാഘട്ടം രോഗംവന്ന് ഒരുമാസം പിന്നിടുമ്പോള്‍ത്തന്നെ നാലിലൊന്ന് പേര്‍ക്കും രോഗം ഭേദമായെന്നത് ആരോഗ്യകേരളത്തിന് അഭിമാനമായി.

ഭേദമായവരുടെ കണക്കില്‍ ലോകശരാശരി 22.2 ആണ്. ലോകത്താകെ 15,31,192 പേര്‍ക്കാണ് ഇതുവരെ (വ്യാഴാഴ്ച വൈകീട്ട് ആറുവരെ) രോഗംബാധിച്ചത്. 3,37,276 പേര്‍ക്ക് ഭേദമായി. ഇതില്‍ 23 ശതമാനവും ചൈനയിലാണ്. കോവിഡിന്റെ പ്രഭവകേന്ദ്രമായ അവിടെ അഞ്ചുമാസംകൊണ്ടാണ് 94 ശതമാനംപേരും രോഗമുക്തരായത്. 1160 പേര്‍ മാത്രമേ ഇപ്പോള്‍ ചികിത്സയിലുള്ളൂ. ചൈനയില്‍ ഇത്രയധികം ആളുകള്‍ രോഗമുക്തരായതിനാലാണ് ലോകശരാശരി ഇത്രയെങ്കിലും ഉയര്‍ന്നത്.

ജനുവരിയില്‍ വുഹാനില്‍നിന്നെത്തിയ മൂന്ന് മെഡിക്കല്‍ വിദ്യാര്‍ഥികള്‍ ഉള്‍പ്പെടെ രണ്ടുഘട്ടങ്ങളിലായ കേരളത്തില്‍ 357 പേര്‍ക്കാണ് രോഗം സ്ഥിരീകരിച്ചത്. ഇതില്‍ 97 പേര്‍ രോഗം ഭേദമായി ആശുപത്രിവിട്ടു.

ഇന്ത്യയില്‍ രോഗം ഭേദമായവരുടെ നിരക്ക് 9.12 ശതമാനമാണ്. കേന്ദ്ര ആരോഗ്യമന്ത്രാലയത്തിന്റെ കണക്കനുസരിച്ച് 6237 പേര്‍ക്കാണ് കോവിഡ് സ്ഥിരീകരിച്ചത്. 483 പേര്‍ക്ക് രോഗം ഭേദമായി. ഇതില്‍ അഞ്ചിലൊന്നും കേരളത്തിലാണ്. കേരളത്തില്‍ രണ്ടാമത് കോവിഡ് സ്ഥിരീകരിച്ച അതേസമയത്ത് രോഗം പിടിപെട്ട സംസ്ഥാനമായിരുന്നു മഹാരാഷ്ട്ര. അവിടെയിപ്പോഴും രോഗമുക്തരായവര്‍ വെറും ഒന്പതുശതമാനംമാത്രമാണ്.

1930-കളിലെ മഹാ സാമ്ബത്തിക മാന്ദ്യത്തിനു ശേഷമുള്ള ഏറ്റവും വലിയ മാന്ദ്യത്തിലേക്ക് ലോകം നീങ്ങുകയാണെന്ന് അന്താരാഷ്ട്ര നാണയനിധി (ഐ.എം.എഫ്.). കോവിഡ്-19 വ്യാപനം കാരണം 170-ല്‍ അധികം രാജ്യങ്ങളില്‍ പ്രതിശീര്‍ഷ വരുമാനത്തില്‍ കുറവുണ്ടാകുമെന്ന് ഐ.എം.എഫ്. മാനേജിങ് ഡയറക്ടര്‍ ക്രിസ്റ്റലീന ജോര്‍ജീവ പറഞ്ഞു.

2021-ല്‍ പോലും മാന്ദ്യത്തില്‍നിന്ന് പൂര്‍ണമായി കരകയറാനാകില്ല. സാമ്ബത്തിക, സാമൂഹ്യ ഘടന കോവിഡ് മൂലം തകിടം മറിയുകയാണ്. നമ്മുടെ ജീവിതകാലത്ത് കാണാത്തത്ര വേഗത്തിലും വ്യാപ്തിയിലുമാണ് ഇത് സംഭവിക്കുന്നത്. മൂന്നു മാസം മുമ്ബ് 160 രാജ്യങ്ങളില്‍ പ്രതിശീര്‍ഷ വരുമാനം വര്‍ധിക്കുമെന്നാണ് കണക്കാക്കിയതെന്നും അവര്‍ പറഞ്ഞു. ആഫ്രിക്ക, ലാറ്റിന്‍ അമേരിക്ക, ഏഷ്യ എന്നിവിടങ്ങളിലെ വികസ്വര, ദരിദ്ര രാജ്യങ്ങളെയാവും മാന്ദ്യം ഏറ്റവുമധികം ബാധിക്കുക. കഴിഞ്ഞ രണ്ടു മാസത്തില്‍ 10,000 കോടി ഡോളറാണ് വളര്‍ന്നു വരുന്ന രാജ്യങ്ങളില്‍നിന്ന് വിദേശ നിക്ഷേപകര്‍ പിന്‍വലിച്ചത്. വളര്‍ന്നുവരുന്ന രാജ്യങ്ങള്‍ക്കും വികസ്വര രാജ്യങ്ങള്‍ക്കും കോവിഡ് മൂലമുള്ള നഷ്ടം സ്വന്തം നിലയ്ക്ക് നികത്താന്‍ കഴിയില്ല. അവര്‍ക്ക് മറ്റുള്ളവരുടെ സഹായം തേടേണ്ടിവരും. എന്നാല്‍, മഹാമാരിയെ നേരിടാന്‍ എല്ലാ സര്‍ക്കാരുകളും നല്ല രീതിയില്‍ രംഗത്തുവന്നത് പ്രത്യാശ നല്‍കുന്നുണ്ടെന്നും അവര്‍ പറഞ്ഞു.