ദക്ഷിണ കൊറിയയില് മൂണിന് വന്വിജയം, കോവിഡിനെ നേരിടുന്നതിലെ മികവ് നേട്ടമായി
പ്രസിഡന്റ് മൂണ് ജേ ഇന്നിന്റെ ഡെമോക്രാറ്റിക് പാര്ട്ടിക്കു ദക്ഷിണ കൊറിയയില് വന് തിരഞ്ഞെടുപ്പു വിജയം. പകര്ച്ചവ്യാധി പൊട്ടിപ്പുറപ്പെട്ട ശേഷം ലോകത്തു നടന്ന ആദ്യ ദേശീയതല തിരഞ്ഞെടുപ്പെന്ന നിലയില് ഇതു ശ്രദ്ധയാകര്ഷിച്ചിരുന്നു. കോവിഡിനെ നേരിടുന്നതിലെ മികവാണു നേട്ടമായത്.
മൂണിന്റെ ഡെമോക്രാറ്റിക് പാര്ട്ടിയും സഖ്യകക്ഷിയും കൂടി 300-ല് 180 സീറ്റ് നേടി. നിലവില് 120 സീറ്റേ ഉണ്ടായിരുന്നുള്ളൂ. പ്രധാന പ്രതിപക്ഷമായ കണ്സര്വേറ്റിവ് മുന്നണിക്ക് 103 സീറ്റേ കിട്ടിയുള്ളൂ.
ഫെബ്രുവരിയില് ആദ്യം രോഗം പടര്ന്നപ്പോള് മൂണിനു ജനപിന്തുണ കുറഞ്ഞിരുന്നു. എന്നാല്, സര്ക്കാര് ഉണര്ന്നു പ്രവര്ത്തിച്ചതോടെ കാറ്റ് അനുകൂലമായി. 14,000 പോളിങ് ബൂത്തുകളും അണുവിമുക്തമാക്കിയിരുന്നു. വോട്ടര്മാരെ ശരീരോഷ്മാവ് പരിശോധിച്ചാണു കടത്തിവിട്ടത്. സാനിറ്റൈസറും പ്ലാസ്റ്റിക് ഗ്ലൗസും നല്കി. അകലവും പാലിച്ചു.
2800 കോവിഡ് രോഗികള്ക്കായി പ്രത്യേക പോളിങ് ബൂത്തുകള് തയാറാക്കി. ചില രോഗികള് ഇമെയിലില് വോട്ട് ചെയ്തു; ക്വാറന്റീനിലുള്ള 13,000 പേര് പോളിങ് സമയം കഴിഞ്ഞ് പ്രത്യേകവും. 1992-നു ശേഷമുള്ള ഏറ്റവും ഉയര്ന്ന പോളിങ് ശതമാനവും അങ്ങനെ രേഖപ്പെടുത്തി 66.2%.
ഗങ്നം ജില്ലയില്, ദക്ഷിണ കൊറിയന് പക്ഷത്തേക്കു കൂറുമാറിയ ഉത്തര കൊറിയന് നയതന്ത്ര ഉദ്യോഗസ്ഥന് തായ് യോങ് ഹോ പ്രതിപക്ഷ സ്ഥാനാര്ഥിയായി ജയിച്ചു. ഉത്തര കൊറിയയുടെ ലണ്ടന് എംബസിയില് ഉപ സ്ഥാനപതിയായിരുന്ന ഇദ്ദേഹം 2016-ലാണു കൂറുമാറിയത്.
https://www.facebook.com/Malayalivartha