ലോകത്ത് രോഗികളുടെ എണ്ണം 22 ലക്ഷം പിന്നിട്ടതിനൊപ്പം മരണം ഒന്നര ലക്ഷം കവിഞ്ഞു. ലോകത്തിലെ മൂന്നിലൊന്ന് രോഗികളും അമേരിക്കയിലാണ്. മരിച്ചവരില്‍ നാലിലൊന്നിനടുത്തും അമേരിക്കക്കാര്‍തന്നെ. ആറേ മുക്കാല്‍ ലക്ഷം രോഗികളും 35,000 മരണവും ഇവിടെനിന്ന് റിപ്പോര്‍ട്ട് ചെയ്തിട്ടുണ്ട്. വ്യാഴാഴ്ച രാത്രി എട്ടിന് അവസാനിച്ച 24 മണിക്കൂറിനുള്ളില്‍ യു.എസില്‍ മരിച്ചത് 4,591 പേര്‍. അതോടെ, ഒരു ദിവസം ഏറ്റവും കൂടുതല്‍പേര്‍ മരിച്ചതും അമേരിക്കയിലാണ്. അമേരിക്കയിലെ മുഴുവന്‍ സംസ്ഥാനങ്ങളിലും രോഗബാധിതരും മരണവും റിപ്പോര്‍ട്ട് ചെയ്തു. ന്യൂയോര്‍ക്കില്‍ മാത്രം പതിനാറായിരത്തിലേറെയാണ് മരണം. രോഗികള്‍ രണ്ടേകാല്‍ ലക്ഷം.

അഞ്ചര ലക്ഷം ടെസ്റ്റുകളാണ് ന്യൂയോര്‍ക്കില്‍ മാത്രം നടത്തിയത്. മുക്കാല്‍ ലക്ഷം രോഗികളുള്ള ന്യൂജഴ്‌സിയാണ് മരണത്തിലും രോഗബാധിതരുടെ എണ്ണത്തിലും രണ്ടാമതുള്ള അമേരിക്കന്‍ സംസ്ഥാനം. കാലിഫോര്‍ണിയയും വാഷിങ്ടണുമെല്ലാം അതിവേഗം രോഗവ്യാപനം റിപ്പോര്‍ട്ട് ചെയ്യുന്ന സംസ്ഥാനങ്ങളാണ്. രോഗികള്‍ രണ്ട് ലക്ഷത്തിനോടും മരണം ഇരുപതിനായിരത്തോടും അടുക്കുന്ന സ്‌പെയിനില്‍ മരണനിരക്ക് കുറഞ്ഞു. ഒരാഴ്ചയായി ശരാശരി 525 പേരാണ് ഇവിടെ മരിക്കുന്നത്.
മരണക്കണക്കില്‍ ലോകത്ത് രണ്ടാമതുള്ള ഇറ്റലിയില്‍ 22,000 കവിഞ്ഞു ജീവനാശം. 1.7 ലക്ഷമാണ് രോഗബാധിതര്‍. ശരാശരി 775 പേര്‍വീതം ഏഴുദിവസങ്ങളില്‍ മരിച്ച ഇവിടെ ഇപ്പോള്‍ അത് 550ലെത്തിയതിന്റെ ആശ്വാസത്തിലാണ് ഇറ്റലി. 3,750-4,000 പേരാണ് രണ്ടാഴ്ചത്തെ ശരാശരി രോഗവ്യാപനത്തിന്റെ തോത്. ഫ്രാന്‍സും ജര്‍മനിയും യു.കെയുമാണ് രോഗികളുടെ എണ്ണം ലക്ഷം പിന്നിട്ട മറ്റു മൂന്നുരാജ്യങ്ങള്‍. ഫ്രാന്‍സില്‍ മരണം പതിനെട്ടായിരത്തോടടുക്കുമ്പോള്‍ മരണനിരക്ക് പിടിച്ചുനിര്‍ത്തുന്നതില്‍ ജര്‍മനി വിജയിക്കുന്നതായാണ് കണക്കുകള്‍. അവിടെ, 1.38 ലക്ഷം പേര്‍ രോഗബാധിതരായെങ്കിലും നാലായിരത്തി ഒരുനൂറുപേരാണ് മരിച്ചത്. യു.കെയാണ് ലക്ഷപ്പട്ടികയില്‍ അവസാനം പ്രവേശിച്ച രാജ്യം. അവിടെ പതിനാലായിരത്തിനടുത്താണ് മരണസംഖ്യ. ഇവിടെ മൂന്നേകാല്‍ ലക്ഷം പേരില്‍ ടെസ്റ്റ് നടത്തിയതില്‍ ഒരു ലക്ഷത്തിലേറെ പേര്‍ക്ക് കോവിഡ് സ്ഥിരീകരിച്ചത് രോഗവ്യാപനത്തിന്റെ തീവ്രതക്കു തെളിവാണ്.