ലോകത്തെയാകെ ഞെട്ടിച്ച കോവിഡ്-19 വൈറസിന്റെ വ്യാപനവുമായി ബന്ധപ്പെട്ട് അമേരിക്കയ്ക്കു പിന്നാലെ ചൈനയെ അതിരൂക്ഷമായി വിമര്‍ശിച്ച് ജര്‍മനിയും. കോവിഡിന്റെ ഉത്ഭവം എവിടെയാണ് എന്നതു സംബന്ധിച്ച് ചൈന മറുപടി പറയണമെന്നും ഇക്കാര്യത്തില്‍ തുറന്ന സമീപനം ആവശ്യമാണെന്നും ജര്‍മന്‍ ചാന്‍സലര്‍ ആംഗല മെര്‍ക്കല്‍ പറഞ്ഞു. വൈറസ് വ്യാപിച്ചു തുടങ്ങിയ ആദ്യ ദിവസങ്ങളിലെ കൂടുതല്‍ വിവരങ്ങള്‍ ലഭ്യമാക്കണമെന്നും അവര്‍ ആവശ്യപ്പെട്ടു. മാധ്യമങ്ങളുടെ ചോദ്യങ്ങള്‍ക്ക് മറുപടി പറയവേയാണ് മെര്‍ക്കലും ചൈനയ്ക്കു നേരെ തിരിഞ്ഞത്.

നേരത്തെ, അമേരിക്കയും ഫ്രാന്‍സും ചൈനയെ വിമര്‍ശിച്ചു രംഗത്തെത്തിയിരുന്നു.അമേരിക്കയില്‍ മരിക്കുന്ന എല്ലാവരുടെ വിവരം റിപ്പോര്‍ട്ട് ചെയ്യുന്നു. ഇവിടെ എല്ലാ കാര്യങ്ങളും റിപ്പോര്‍ട്ട് ചെയ്യപ്പെടുന്നുണ്ട്. ചില രാജ്യങ്ങളില്‍ വലിയ പ്രശ്നങ്ങളാണുള്ളത്. എന്നാല്‍ യഥാര്‍ത്ഥ കാര്യങ്ങള്‍ കൃത്യമായി അവര്‍ പുറത്ത് വിടുന്നില്ല. നേരത്തെ അമേരിക്കന്‍ ചാര സംഘടനയായ സിഐഎയും ചൈന കാര്യങ്ങള്‍ മറച്ചു വയ്ക്കുന്നുവെന്ന വിവരം പുറത്ത് വിട്ടിരുന്നു. അമേരിക്കയിലുള്ള മറ്റ് നേതാക്കളും ഇക്കാര്യം ഉന്നയിക്കുന്നുണ്ട്.