അമ്മയോടൊപ്പം താമസിച്ചിരുന്ന പെൺകുട്ടി അച്ഛനും രണ്ടാനമ്മയ്ക്കും ഒപ്പം താമസിക്കാനെത്തിയതിന് പിന്നാലെ കാണാതായ പെൺകുട്ടിയെ അന്വേഷണ ഉദ്യോഗസ്ഥരുടെ മണിക്കൂറുകള്‍ നീണ്ട തിരച്ചിലിനൊടുവില്‍ കണ്ടെത്തിയത് ചെടികളും ഇലകളും കൊണ്ട് ഒളിപ്പിച്ച് മരിച്ച നിലയിൽ.

ഒരു വയലില്‍നിന്നാണ് ഒമ്പത് വയസ്സുകാരിയായ വാലന്റിന ഫോന്‍സെകയുടെ മൃതദേഹം കണ്ടെത്തിയത്. സംഭവത്തില്‍ കുട്ടിയുടെ പിതാവിനെയും രണ്ടാനമ്മയെയും പോലീസ് അറസ്റ്റ് ചെയ്തതായി മാധ്യമങ്ങള്‍ റിപ്പോര്‍ട്ട് ചെയ്തു.

മെയ് ഏഴിനാണ് ഒമ്പത് വയസ്സുകാരിയായ വാലന്റിനയെ കാണാതായെന്ന വാര്‍ത്ത പുറത്തുവന്നത്. തുടര്‍ന്ന് മെയ് എട്ടിന് രാവിലെ പിതാവ് ഔദ്യോഗികമായി പരാതി നല്‍കുകയും ചെയ്തു. കുട്ടിയെ കാണാതായ ദിവസം തന്നെ കൊല്ലപ്പെട്ടിട്ടുണ്ടെന്നാണ് പോലീസിന്റെ കണ്ടെത്തല്‍. സംഭവം കൊലപാതകമാണെന്ന നിഗമനത്തിലാണ് പോലീസ് പിതാവിനെയും രണ്ടാനമ്മയെയും അറസ്റ്റ് ചെയ്തതെന്നാണ് റിപ്പോര്‍ട്ട്.

കുട്ടി അതിക്രമത്തിനിരയായെന്ന സംശയമുണ്ടെന്നും അതേസമയം എങ്ങനെയാണ് കൊല്ലപ്പെട്ടതെന്ന കാര്യം അധികൃതര്‍ പുറത്തുവിട്ടിട്ടില്ലെന്നും മാധ്യമങ്ങള്‍ റിപ്പോര്‍ട്ട് ചെയ്തു. സംഭവത്തില്‍ വിശദമായ അന്വേഷണം തുടരുകയാണെന്നും റിപ്പോര്‍ട്ടുകളില്‍ പറയുന്നു. നേരത്തെ അമ്മയോടൊപ്പം താമസിച്ചിരുന്ന വാലന്റിന ദിവസങ്ങള്‍ക്ക് മുമ്പാണ് പിതാവിന്റെയും രണ്ടാനമ്മയുടെയും വീട്ടില്‍ താമസിക്കാനെത്തിയത്.