ബെയ്റൂട്ട് സ്ഫോടനത്തില് കൊല്ലപ്പെട്ടത് 135-ലേറെപ്പേര്, അയ്യായിരത്തിലേറെപ്പേര്ക്ക് പരുക്ക്, നൂറുകണക്കിനാളുകളെ കാണാതായി
ലബനന് തലസ്ഥാന നഗരത്തിലെ തുറമുഖത്തെ സംഭരണകേന്ദ്രത്തില് സൂക്ഷിച്ചിരുന്ന 2750 ടണ് അമോണിയം നൈട്രേറ്റിനു തീ പിടിച്ചുണ്ടായ
ഉഗ്ര സ്ഫോടനത്തില് കൊല്ലപ്പെട്ടത് 135 ലേറെപ്പേര്. പരുക്കേറ്റത് അയ്യായിരത്തിലേറെപ്പേര്ക്ക്. നൂറുകണക്കിനാളുകളെ കാണാതായിട്ടുണ്ട്. 3 ലക്ഷം പേര് ഭവനരഹിതരായി.
2013-ല് ഒരു ചരക്കുകപ്പലില്നിന്നു പിടിച്ചെടുത്തതാണ് തുറമുഖത്തെ സംഭരണകേന്ദ്രത്തില് സൂക്ഷിച്ചിരുന്ന 2750 ടണ് അമോണിയം നൈട്രേറ്റ്. ഇതിനു തീ പിടിച്ചാണു ചൊവ്വാഴ്ച സ്ഫോടനമുണ്ടായതെന്നു ആഭ്യന്തര മന്ത്രി മുഹമ്മദ് ഫഹ്മി പറഞ്ഞു. ഇവിടേക്ക് തീ പടര്ന്നതെങ്ങനെയെന്നു വ്യക്തമല്ല. സ്ഫോടനത്തിന്റെ ആഘാതത്തില് 160 കിലോമീറ്റര് അകലെയുള്ള ദ്വീപുരാജ്യമായ സൈപ്രസിലെ കെട്ടിടങ്ങള് വരെ കുലുങ്ങി.
വളം നിര്മാണത്തിനും സ്ഫോടകവസ്തുവായും ഉപയോഗിക്കുന്ന അമോണിയം നൈട്രേറ്റിന്റെ ശേഖരം സുരക്ഷാഭീഷണിയാണെന്ന് പലവട്ടം മുന്നറിയിപ്പു നല്കിയിരുന്നതാണ്. ഉത്തരവാദികളായ തുറമുഖ ഉദ്യോഗസ്ഥരെ മുഴുവന് വീട്ടുതടങ്കലില് വയ്ക്കാന് സര്ക്കാര് തീരുമാനിച്ചു.
ദുരന്തബാധിതനഗരമായി പ്രഖ്യാപിച്ചിട്ടുണ്ട്. നഗരമാകെ കെട്ടിടാവശിഷ്ടങ്ങളും തകര്ന്ന വാഹനങ്ങളും ചില്ലുകളും കൊണ്ടു മൂടിയിരിക്കുകയാണ്. പരിസരത്തെ മുഴുവന് കെട്ടിടങ്ങളും തകര്ന്നടിഞ്ഞു. 5 ആശുപത്രികളും തകര്ന്നു. കെട്ടിടാവശിഷ്ടങ്ങളില് കുടുങ്ങിയവരെ രക്ഷിക്കാന് തീവ്രശ്രമങ്ങള് നടന്നുവരുകയാണ്.
വിവിധ രാജ്യങ്ങളും യൂറോപ്യന് യൂണിയനും അടിയന്തര സഹായമെത്തിക്കാന് മുന്നോട്ടുവന്നിട്ടുണ്ട്. ഫ്രഞ്ച് പ്രസിഡന്റ് ഇമ്മാനുവല് മക്രോ ഇന്നു ലബനനില് എത്തും.
ജോര്ജിയയില് നിന്നു മൊസാംബിക്കിലേക്കു പോകുകയായിരുന്ന റഷ്യന് ചരക്കുകപ്പല് 2013 നവംബറില് വിവിധ കാരണങ്ങളാല് ബെയ്റൂട്ട് തുറമുഖത്തു പിടിച്ചിടുകയായിരുന്നു. നിയമതടസ്സങ്ങള് നീണ്ടതോടെ ഉടമസ്ഥര് കപ്പല് ഉപേക്ഷിച്ചു. ഇതോടെയാണു കപ്പലിലെ വന് അമോണിയം നൈട്രേറ്റ് ശേഖരം തുറമുഖത്തെ ഒരു സംഭരണകേന്ദ്രത്തിലേക്കു മാറ്റിയത്. ഇത് നീക്കം ചെയ്യാനുള്ള അനുമതി തേടി 2014-നും 2017-നുമിടയില് കസ്റ്റംസ് അധികൃതര് 5 കത്തുകള് ജുഡീഷ്യല് വകുപ്പിന് അയച്ചെങ്കിലും മറുപടി ലഭിച്ചില്ല.
https://www.facebook.com/Malayalivartha