ടൂറിസ്റ്റ് വീസകള്ക്ക് ദുബായ് കൂടുതല് നിയന്ത്രണങ്ങള് ഏര്പ്പെടുത്തി
ദുബായ് ടൂറിസ്റ്റ് വീസകള്ക്ക് കൂടുതല് നിയന്ത്രണങ്ങള് ഏര്പ്പെടുത്തി. വീസയ്ക്ക് അപേക്ഷിക്കുന്നവര് 6 മാസത്തെ ബാങ്ക് സ്റ്റേറ്റ്മെന്റ്, മടക്കയാത്രാ ടിക്കറ്റ്, മടങ്ങിപ്പോകുമെന്ന വാഗ്ദാനപത്രം, താമസിക്കുന്ന ഹോട്ടലിന്റെ റിസര്വേഷന് തെളിവ് തുടങ്ങിയവ ഹാജരാക്കണം. ബന്ധുക്കളെ സന്ദര്ശിക്കാന് ടൂറിസ്റ്റ് വീസയില് വരുന്നവര് ഇതിനൊപ്പം ബന്ധുവിന്റെ മേല്വിലാസത്തിന്റെ തെളിവ്, അവരുടെ എമിറേറ്റ്സ് ഐഡിയുടെ പകര്പ്പ് എന്നിവയും നല്കണം.
ദുബായ് എമിറേറ്റ് മാത്രമാണ് യുഎഇയിലേക്ക് ടൂറിസ്റ്റ് വീസ നല്കിയിരുന്നത്. ദുബായ് വഴി കുവൈത്ത് ഉള്പ്പെടെ രാജ്യങ്ങളിലേക്ക് പോകുന്ന രീതിയും ഇതോടെ അവസാനിക്കും. ഇന്ത്യക്കാര്ക്ക് കുവൈത്തിലേക്കു നേരിട്ടു പ്രവേശനം നല്കാത്ത സാഹചര്യത്തില് പലരും ദുബായില് 14 ദിവസം ക്വാറന്റീന് പൂര്ത്തിയാക്കി നെഗറ്റീവ് സര്ട്ടിഫിക്കറ്റുമായി കുവൈത്തില് പോയിരുന്നു.
വീസ എടുത്ത ശേഷമാണ് നേരത്തേ മടക്കയാത്രയ്ക്കു ടിക്കറ്റ് എടുത്തിരുന്നത്. ഇനി മുതല് മടക്കയാത്ര ടിക്കറ്റ് എടുത്തിട്ടു വേണം ടൂറിസ്റ്റ് വീസയ്ക്ക് അപേക്ഷിക്കാന് എന്നാണ് നിബന്ധന. വീസ നിരസിച്ചാല് ടിക്കറ്റിന്റെ പണവും നഷ്ടമാകുമോ എന്ന ആശങ്കയും ഈ മേഖലയിലുള്ളവര് പങ്കുവയ്ക്കുന്നു.
വ്യക്തികളും സ്ഥാപനങ്ങളും അപേക്ഷിക്കുന്ന വിസിറ്റ് വീസയ്ക്ക് ഇതു ബാധകമാണോ എന്നു വ്യക്തമായിട്ടില്ല.
റസിഡന്റ് വീസയുള്ളവരുടെ പ്രവേശനത്തിനും ഇപ്പോള് കടമ്പകള് ഏറെയാണ്. അതേസമയം, രാജ്യത്ത് തങ്ങുന്നവര് വിസിറ്റ് വീസ നീട്ടിയെടുക്കാന് നല്കുന്ന അപേക്ഷകള്ക്ക് പുതിയ നിബന്ധനകള് ബാധകമാക്കിയിട്ടില്ല.
https://www.facebook.com/Malayalivartha
