റഷ്യ രണ്ടാമത്തെ കൊവിഡ് 19 വാക്‌സിനും അംഗീകാരം നല്‍കി. പ്രസിഡന്റ് വ്‌ലാഡിമിര്‍ പുടിനാണ് ഇക്കാര്യം അറിയിച്ചത്. സൈബീരിയയിലെ സ്‌റ്റേറ്റ് റിസര്‍ച്ച് സെന്റര്‍ ഒഫ് വൈറോളജി ആന്‍ഡ് ബയോടെക്‌നോളജി വെക്ടര്‍ ( വെക്ടര്‍ ഇന്‍സ്റ്റിറ്റിയൂട്ട് ) വികസിപ്പിച്ച ' എപിവാക് കൊറോണ ' എന്ന വാക്‌സിനാണ് അംഗീകാരം നല്‍കിയിരുക്കുന്നത്.

റഷ്യയുടെ ആദ്യ കൊവിഡ് വാക്‌സിനായ സ്പുട്‌നികില്‍ നിന്നും വ്യത്യസ്ഥമാണ് എപിവാക് കൊറോണ. ഓരോ വോളന്റിയര്‍മാരിലും എപിവാക് കൊറോണയുടെ രണ്ട് ഡോസുകള്‍ വീതമാണ് കുത്തിവച്ചത്. ലോകത്തെ ഏറ്റവും പ്രശസ്തമായ വൈറസ് റിസര്‍ച്ച് സെന്ററുകളില്‍ ഒന്നാണ് സൈബീരിയയ്ക്ക് അടുത്തുള്ള നോവോസിബിര്‍സ്‌കിലെ കോല്‍ട്‌സോവോയില്‍ സ്ഥിതി ചെയ്യുന്ന വെക്ടര്‍ ഇന്‍സ്റ്റിറ്റിയൂട്ട്.
നാല് ദശാബ്ദത്തിലേറെയായി പ്രവര്‍ത്തിക്കുന്ന വെക്ടര്‍ ഇന്‍സ്റ്റിറ്റിയൂട്ടിന് എബോളയുള്‍പ്പെടെയുള്ള രോഗങ്ങള്‍ക്ക് പ്രതിരോധ വാക്‌സിന്‍ വിജയകരമായി വികസിപ്പിച്ചെടുത്ത ചരിത്രമുണ്ട്. മാര്‍ച്ചില്‍ തന്നെ കൊവിഡ് വാക്‌സിനായുള്ള ഗവേഷണങ്ങള്‍ വെക്ടറില്‍ തുടങ്ങിയിരുന്നു. 14 പേര്‍ക്കാണ് ആദ്യഘട്ടത്തില്‍ വാക്‌സിന്‍ നല്‍കിയത്. രണ്ടാം ഘട്ടത്തില്‍ 43 പേര്‍ക്കായിരുന്നു വാക്‌സിന്‍ നല്‍കിയത്.
ഓഗസ്റ്റിലാണ് മോസ്‌കോയിലെ ഗമേലയാ ഇന്‍സ്റ്റിറ്റിയൂട്ട് വികസിപ്പിച്ച സ്പുട്‌നികിന് അംഗീകാരം നല്‍കിയത്. സ്പുട്‌നികിന് നല്‍കിയത് പോലെ തന്നെ വെക്ടറിന്റെ വാക്‌സിനും മനുഷ്യരിലെ മൂന്നാം ഘട്ട ട്രയല്‍ പൂര്‍ത്തിയാക്കാതെയാണ് അംഗീകാരം നല്‍കിയിരിക്കുന്നത്. 30,000 പേരെ പങ്കെടുപ്പിച്ചുള്ള മൂന്നാം ഘട്ട ട്രയല്‍ ഉടന്‍ നടക്കും. എപിവാക് കൊറോണയുടെ വന്‍ തോതിലുള്ള ഉത്പാദനം നവംബറിലോ ഡിസംബറിലോ ആരംഭിക്കുമെന്നാണ് സൂചന.