ചാന്ദ്ര പര്യവേക്ഷണത്തിന് ഐക്യരൂപം നല്‍കുന്നതിനായി 'ആര്‍ട്ടെമിസ് അക്കോര്‍ഡ്' എന്ന ഉടമ്പടിയുമായി നാസ
അമേരിക്കന്‍ ബഹിരാകാശ സംഘടന നാസ ചാന്ദ്ര പര്യവേക്ഷണത്തിന് ഐക്യരൂപം നല്‍കുന്നതിനായി വിവിധ രാജ്യങ്ങളുമായി ചേര്‍ന്ന് 'ആര്‍ട്ടെമിസ് അക്കോര്‍ഡ്' എന്ന പേരില്‍ ഉടമ്പടി ഒപ്പുവച്ചു. യു.എസ്. സ്റ്റേറ്റ് ഡിപ്പാര്‍ട്ട്മെന്റ്, നാഷണല്‍ സ്പേസ് കൗണ്‍സില്‍ എന്നിവരുമായി നിരവധി തവണ കൂടിക്കാഴ്ച നടത്തിയശേഷമാണ് ഉടമ്പടിക്കു രൂപം നല്‍കിയത്. ചരിത്രത്തിലാദ്യമായി ഒരു വനിതയെയും രണ്ടാമതായി ഒരു പുരുഷനെയും ചന്ദ്രനിലെത്തിക്കുക എന്നതും പദ്ധതിയുടെ ഭാഗമാണ്.
ചന്ദ്രനിലെ ഇടപെടലില്‍ അച്ചടക്കവും സഹകരണവും സമാധാനവും ഉറപ്പുവരുത്താന്‍ ഉടമ്പടിയിലൂടെ സാധിക്കുമെന്ന പ്രതീക്ഷയിലാണ് നാസ. ചന്ദ്രനിലേക്ക് മനുഷ്യനെ അയക്കാന്‍ അമേരിക്കയ്ക്കു മാത്രമേ സാധിച്ചിട്ടുള്ളൂവെങ്കിലും ചന്ദ്രനിലേക്ക് ഗവേഷണ ഉപകരണങ്ങള്‍ എത്തിക്കുന്നതില്‍ ഇന്ത്യ ഉള്‍പ്പടെയുള്ള രാജ്യങ്ങള്‍ വിജയിച്ചിട്ടുണ്ട്.
അമേരിക്കയ്ക്ക് പുറമേ യു.കെ, ജപ്പാന്‍, ഓസ്ട്രേലിയ, കാനഡ, ഇറ്റലി, ലക്സംബര്‍ഗ്, യു.എ.ഇ. എന്നീ രാജ്യങ്ങളാണ്, 1967-ലെ ബഹിരാകാശ ഉടമ്പടിയും മറ്റു കരാറുകളും അടിസ്ഥാനമാക്കി തയാറാക്കിയ ആര്‍ടെമിസ് ഉടമ്പടിയില്‍ ഒപ്പുവച്ചത്. മനുഷ്യനെ വീണ്ടും ചന്ദ്രനിലേക്ക് അയയ്ക്കുന്നതിനായുള്ള ശ്രമങ്ങള്‍ക്ക് കൂടുതല്‍ രാജ്യങ്ങള്‍ പിന്തുണ നല്‍കുമെന്നാണ് പ്രതീക്ഷിക്കുന്നതെന്നു നാസ അഡ്മിനിസ്ട്രേറ്റര്‍ ജിം ബ്രൈഡെന്‍സ്റ്റീന്‍ പറഞ്ഞു.
ആര്‍ടെമിസ് പദ്ധതി യു.എസ്. കേന്ദ്രീകൃതമാണെന്ന നിലപാടുമായി ഉടമ്പടിയോട് റഷ്യ മുഖം തിരിഞ്ഞു നില്‍ക്കുകയാണ്. രാജ്യാന്തര ബഹിരാകാശനിലയം പോലുള്ള സഹകരണമാണ് തങ്ങള്‍ ആഗ്രഹിക്കുന്നതെന്ന് റഷ്യന്‍ ബഹിരാകാശ ഏജന്‍സി മേധാവി ദിമിത്രി റോഗോസിന്‍ പറഞ്ഞു. ചൈനയുമായി നയതന്ത്ര ഉടമ്പടിയുണ്ടാക്കുന്നതില്‍ നാസയ്ക്ക് വിലക്കുള്ളതിനാല്‍ ഈ സഖ്യവുമായി ബന്ധപ്പെട്ട ചര്‍ച്ചകളില്‍ ചൈനയില്ല.
ബഹിരാകാശ ദൗത്യങ്ങളില്‍ ഏവരും സമാധാനം പാലിക്കണം, രഹസ്യാത്മകത പാടില്ല, റോബോര്‍ട്ടുകളും വാഹനങ്ങളുമടക്കം വിക്ഷേപിക്കുന്ന എന്തും രജിസ്റ്റര്‍ ചെയ്തവയും തിരിച്ചറിയുന്നവയും ആയിരിക്കണം, ബഹിരാകാശ യാത്രാവേളയില്‍ അടിയന്തിര സാഹചര്യങ്ങളില്‍ അംഗങ്ങള്‍ ഒന്നിച്ചുനില്‍ക്കണം, ബഹിരാകാശ സംവിധാനങ്ങള്‍ സാര്‍വത്രികവും എല്ലാവരുടേയും ഉപകരണങ്ങളുമായി യോജിക്കുന്നവയും ആയിരിക്കണം, ശാസ്ത്രീയ വിവരങ്ങള്‍ കൈമാറണം, ചരിത്രപരമായ ഇടങ്ങള്‍ സംരക്ഷിക്കപ്പെടണം. അതിന് വേണ്ടി ബഹിരാകാശ മാലിന്യങ്ങള്‍ ശരിയായ രീതിയില്‍ ഒഴിവാക്കണം, റോവറുകളുടേയും ബഹിരാകാശ പേടകങ്ങളുടേയും ദൗത്യങ്ങള്‍ മറ്റുള്ളവര്‍ അടുത്ത് വന്ന് അപകടത്തിലാക്കരുത് എന്നിവയാണ് ഉടമ്പടിയിലെ പ്രധാന വ്യവസ്ഥകള്‍. ഇവ ലംഘിക്കുന്നവരോട് പുറത്തുപോകാന്‍ ആവശ്യപ്പെടുമെന്ന് ബ്രൈഡെന്‍സ്റ്റീന്‍ പറഞ്ഞു.
https://www.facebook.com/Malayalivartha
