എച്ച്.1-ബി തൊഴില്‍വിസ അനുവദിക്കുന്നതില്‍ നിലവിലെ കമ്പ്യൂട്ടെറെസ്ഡ് നറുക്കെടുപ്പ് സംവിധാനം അവസാനിപ്പിക്കാനും വേതന അടിസ്ഥാനത്തിലുള്ള തെരഞ്ഞെടുപ്പ് പ്രക്രിയ ഏര്‍പ്പെടുത്താനും യു.എസ് ഭരണകൂടം ഒരുങ്ങുന്നു. പ്രസിഡന്റ് തെരഞ്ഞെടുപ്പിന് ഒരാഴ്ച മാത്രം ബാക്കിനില്‍ക്കേയാണ് സാങ്കേതിക വൈദഗ്ധ്യമുള്ള വിദേശീയരായ പ്രഫഷണലുകള്‍ക്ക് നല്‍കുന്ന വീസയുമായി ബന്ധപ്പെട്ടുള്ള ഈ പുതിയ നീക്കം.

അഭിപ്രായം പറയാന്‍ ബന്ധപ്പെട്ടവര്‍ക്ക് 30 ദിവസത്തെ സമയമുണ്ടെന്ന് ഫെഡറല്‍ രജിസ്ട്രാര്‍ ഇന്നലെ പുറപ്പെടുവിച്ച വിജ്ഞാപനത്തില്‍ ഡിപ്പാര്‍ട്ട്മെന്റ് ഓഫ് ഹോംലാന്‍ഡ് സെക്യൂരിറ്റി അറിയിച്ചു. എച്ച്1ബി വിസ വഴി താരതമ്യേന കുറഞ്ഞ വേതനത്തിന് വിദേശത്തുനിന്നുള്ള പ്രഫഷണലുകള്‍ എത്തുന്നത് മൂലം അമേരിക്കന്‍ പ്രഫഷണലുകളുടെ വേതനം കുറയ്ക്കാനുള്ള സമ്മര്‍ദത്തെ നേരിടാന്‍ പുതിയ നീക്കം ഉപകരിക്കപ്പെടുമെന്നാണ് ചൂണ്ടിക്കാട്ടുന്നത്.

എച്ച്.1ബി വിസയുടെ ഏറ്റവും വലിയ ആവശ്യക്കര്‍ ഇന്ത്യന്‍ ഐ.ടി. പ്രഫഷണലുകളാണ്.എച്ച്.1ബി വിസ സൈദ്ധാന്തിക, സാങ്കേതിക വൈദഗ്ധ്യമുള്ള വിദേശജോലിക്കാരെ അമേരിക്കന്‍ കമ്പനികള്‍ക്ക് നിയോഗിക്കാന്‍ അനുമതി നല്‍കുന്ന കുടിയേറ്റഇതര വിസയാണ്.

ചട്ടം നിര്‍ദിഷ്ട രീതിയില്‍ അന്തിമമാക്കിയാല്‍ നിര്‍ദിഷ്ട തൊഴിലുകളില്‍ നിലവിലുള്ള ഏറ്റവും ഉയര്‍ന്ന വേതനത്തിനു തുല്യമോ അതില്‍കൂടുതലോ വാഗ്ദാനം ചെയ്യപ്പെട്ടിട്ടുള്ള രജിസ്ട്രേഷനുകള്‍ക്കാകും യു.എസ്. സിറ്റിസണ്‍ഷിപ്പ് ആന്‍ഡ് ഇമിഗ്രേഷന്‍ സര്‍വീസസ് വിസ നല്‍കുക.