തുര്‍ക്കിയുടെ എയ്ജിന്‍ തീരത്തിനും ഗ്രീക്ക് ദ്വീപായ സാമോസിനുമിടയിലുണ്ടായ ശക്തമായ ഭൂകമ്പത്തില്‍ തകര്‍ന്ന കെട്ടിട അവശിഷ്ടങ്ങള്‍ക്കിടയില്‍നിന്ന് 65 മണിക്കൂറിന് ശേഷം മൂന്നു വയസ്സുകാരിയെ ജീവനോടെ രക്ഷപ്പെടുത്തി. എലിഫ് പെറിന്‍സെക് എന്ന പേരുള്ള മൂന്നു വയസ്സുകാരിയെയാണ് രക്ഷാപ്രവര്‍ത്തകര്‍ ജീവനോടെ കണ്ടെത്തിയത്.

എലിഫിന്റെ അമ്മയും മൂന്നു സഹോദരങ്ങളും ഭൂകമ്പത്തില്‍ തകര്‍ന്ന കെട്ടിടത്തില്‍ കുടുങ്ങിയിരുന്നു. ഇതില്‍ അമ്മയേയും ഇരട്ട സഹോദരിമാരെയും നേരത്തെ രക്ഷപ്പെടുത്തിയിരുന്നു. എന്നാല്‍ ഏഴു വയസ്സുകാരനായ സഹോദരനെ ജീവനോടെ പുറത്തെടുത്തെങ്കിലും ആശുപത്രിയില്‍ മരിച്ചു.

ജീവനോടെ എലിഫിനെ കണ്ടെത്താനാകുമെന്ന പ്രതീക്ഷ നഷ്ടമായിരുന്നിടത്തു നിന്നാണ് അവള്‍ രക്ഷപ്പെട്ടുവെന്ന വാര്‍ത്ത കുടുംബത്തെ തേടിയെത്തിയത്. എലിഫിനെ സ്‌ട്രെച്ചറില്‍ ആംബുലന്‍സിലേക്ക് മാറ്റുമ്പോള്‍ ചുറ്റും കൂടിയവര്‍ കയ്യടികളോടെ രക്ഷാപ്രവര്‍ത്തകരെ അഭിനന്ദിച്ചു. ഭൂകമ്പത്തില്‍ തകര്‍ന്ന ഇരുപതിലേറെ ബഹുനിലക്കെട്ടിടങ്ങളില്‍ ഒന്നിന്റെ അവശിഷ്ടങ്ങള്‍ക്കിടയില്‍ നിന്നാണ് എലിഫിനെ ജീവനോടെ കണ്ടെത്തിയത്.

കെട്ടിടാവശിഷ്ടങ്ങള്‍ക്കിടയില്‍ നിന്ന് 106 പേരെയാണ് തിങ്കളാഴ്ച വൈകിട്ട് വരെ രക്ഷാപ്രവര്‍ത്തകര്‍ ജീവനോടെ കണ്ടെത്തിയത്. 58 മണിക്കൂര്‍ കെട്ടിടാവശിഷ്ടങ്ങളില്‍ കുടുങ്ങിയ 14 വയസ്സുകാരിയായ ഐഡില്‍ സിറിനെയും രക്ഷാപ്രവര്‍ത്തകര്‍ തിങ്കളാഴ്ച ജീവനോടെ കണ്ടെത്തിയിരുന്നു. 5000 ത്തോളം രക്ഷാപ്രവര്‍ത്തകരാണ് തിരച്ചില്‍ തുടരുന്നത്.

ഭൂകമ്പമാപിനിയില്‍ 7.0 രേഖപ്പെടുത്തിയ ഭൂകമ്പത്തില്‍ 900-ലേറെ പേര്‍ക്ക് പരുക്കേറ്റു. ഭൂകമ്പത്തില്‍ 91 പേര്‍ മരിച്ചതായാണ് ഔദ്യോഗിക കണക്ക്. സാമോസിലെ തുറമുഖ നഗരമായ വതി കടല്‍വെള്ളത്തില്‍ മുങ്ങിയിരുന്നു. തുര്‍ക്കിയിലെ മൂന്നാമത്തെ വലിയ നഗരമായ ഇസ്മറിലേക്ക് സൂനാമിക്ക് സമാനമായി കടല്‍ ഇരച്ചുകയറുകയും ചെയ്തു.