കരീബീയന്‍ ദ്വീപില്‍ ഹണിമൂണ്‍ ആഘോഷത്തിനെത്തിയ നവദമ്ബതികള്‍ കടലില്‍ മുങ്ങിമരിച്ചു. ഇക്കഴിഞ്ഞ ഒക്ടോബര്‍ 24നായിരുന്നു ഇവരുടെ വിവാഹം നടന്നത്. യുഎസ് സ്വദേശികളായ മുഹമ്മദ് മാലിക് (35), ഭാര്യ ഡോ.നൂര്‍ ഷാ (26) എന്നിവരാണ് മരിച്ചത്. മാന്‍ഹട്ടണില്‍ കോര്‍പ്പറേറ്റ് അറ്റോര്‍ണിയായിരുന്നു മുഹമ്മദ് മാലിക്. പാക് വംശജരാണ് ഇരുവരും. വിവാഹശേഷം ബഹാമാസിലെ തുര്‍ക്ക്‌സ് ആന്‍ഡ് കയ്‌ക്കോസ് ഐലന്‍ഡ് റിസോര്‍ട്ടാണ് ഇവര്‍ തെരഞ്ഞെടുത്തത്. വിവാഹം കഴിഞ്ഞ അടുത്ത ദിവസം തന്നെ ഇവിടെക്കെത്തുകയും ചെയ്തു. റിസോര്‍ട്ടിലെ താമസത്തിനിടെ ഒക്ടോബര്‍ 28നായിരുന്നു അപകടത്തിന്റെ രൂപത്തില്‍ മരണം ഇരുവരെയും കവര്‍ന്നെടുത്തത്. കടലില്‍ നെഞ്ചൊപ്പമുള്ള വെള്ളത്തില്‍ നീന്തുന്നതിനിടെ വേലിയേറ്റത്തില്‍ പെട്ട് ഇരുവരും മുങ്ങിത്താഴുകയായിരുന്നു. ഒപ്പമുണ്ടായിരുന്നവര്‍ രക്ഷപ്പെടുത്തി ഉടന്‍ തന്നെ സിപിആര്‍ നല്‍കിയെങ്കിലും ജീവന്‍ രക്ഷിക്കാനായില്ല.

അപകടമരണമായിരുന്നുവെങ്കിലും റിസോര്‍ട്ട് അധികൃതര്‍ക്കെതിരെ മാലിക്കിന്റെ കുടുംബം രംഗത്തെത്തിയിട്ടുണ്ട്. അപകടകരമായ വേലിയേറ്റം ഉള്ള സ്ഥലത്ത് അപായ മുന്നറിയിപ്പുകള്‍ നല്‍കാത്തതിനെ ചൊല്ലിയായിരുന്നു വിമര്‍ശനം. സംഭവത്തില്‍ റിസോര്‍ട്ട് അധികൃതര്‍ ഇതുവരെ പ്രതികരിച്ചിട്ടില്ല. രണ്ടുപേരും മരണപ്പെട്ട വിവരം യുഎസ് സ്‌റ്റേറ്റ് ഡിപ്പാര്‍ട്‌മെന്റും സ്ഥിരീകരിച്ചിട്ടുണ്ട്. 'മരിച്ചവരുടെ കുടുംബാംഗങ്ങള്‍ക്ക് എല്ലാ പിന്തുണയും സഹായവും നല്‍കി വരുന്നുണ്ടെന്നും അവരുടെ സ്വകാര്യത മാനിച്ച് കൂടുതല്‍ പ്രതികരിക്കാനില്ലെന്നുമാണ് ഇവര്‍ വ്യക്തമാക്കിയത്.