സ്കൂളില്‍ നിന്ന് വീട്ടിലേക്ക് മടങ്ങിയ ഏഴ് വയസ്സുകാരനെ തട്ടിക്കൊണ്ടുപോയി വീട്ടിലെ ഭൂഗര്‍ഭ അറയില്‍ തടവിലാക്കിയത് ക്രൂരപീഡനത്തിനായി... രഹസ്യ വിവരം ലഭിച്ച അന്വേഷണ സംഘം കുട്ടിയെ രക്ഷിച്ചത് അതിസാഹസികമായ നീക്കത്തിലൂടെ...
റഷ്യയില്‍ 52 ദിവസം ഭൂഗര്‍ഭ അറയിലെ തടവില്‍ ലൈംഗിക പീഡനത്തിനിരയായ ഏഴ് വയസ്സുകാരനെ രക്ഷാപ്രവര്‍ത്തകര്‍ മോചിപ്പിച്ചു. 26കാരനായ ബാല ലൈംഗിക പീഡകന്‍ ദിമിത്രി കൊപ്യ്ളോവിനെ പൊലീസ് പിടികൂടി. ബാലനെ രക്ഷിതാക്കള്‍ക്ക് കൈമാറി. മോസ്കോയില്‍ നിന്ന് 185 മൈല്‍ അകലെയുള്ള വ്ലാദിമിര്‍ മേഖലയിലെ മകാരിഖയിലെ ദിമിത്രിയുടെ വീടിന്റെ ഭൂഗര്‍ഭ അറയില്‍നിന്നാണ് പ്രത്യേക ദൗത്യസംഘം കുട്ടിയെ രക്ഷപ്പെടുത്തിയത്. സെപ്റ്റംബര്‍ 28ന് സ്കൂളില്‍നിന്ന് വീട്ടിലേക്ക് മടങ്ങിയ ബാലനെ ദിമിത്രി തട്ടിക്കൊണ്ടുപോയി തന്റെ വീട്ടിലെ ഭൂഗര്‍ഭ അറയില്‍ തടവിലാക്കി ലൈംഗിക ചൂഷണത്തിനിരയാക്കുകയായിരുന്നെന്ന് പൊലീസ് പറയുന്നു.
രഹസ്യ വിവരം ലഭിച്ച ദൗത്യസംഘം അതിസാഹസിക നീക്കത്തിലൂടെ ദിമിത്രിയുടെ വീട്ടില്‍ ഇടിച്ചുകയറുകയും ബാലനെ രക്ഷിക്കുകയുമായിരുന്നു. ഇരുമ്ബ് വാതിലും ജനലും തകര്‍ത്താണ് പൊലീസുകാര്‍ ഭൂഗര്‍ഭ അറയ്ക്കുള്ളില്‍ പ്രവേശിച്ചത്. ജയില്‍ മുറിയെ ഓര്‍മിപ്പിക്കുന്ന രീതിയിലാണ് ഈ ഒളിത്താവളം ഒരുക്കിയിരുന്നത്. ഒരു കട്ടിലും ശബ്ദം പുറത്ത് കേള്‍ക്കാതിരിക്കാനുള്ള സംവിധാനങ്ങളും രഹസ്യ അറയിലുണ്ടായിരുന്നു. ഇതിന്റെ മുകള്‍ നിലയിലാണ് ദിമിത്രി താമസിച്ചിരുന്നത്. കുട്ടിയെ കാണാനില്ലെന്ന് പരാതി ലഭിച്ച്‌ ദിവസങ്ങള്‍ പിന്നിട്ടിട്ടും പൊലീസിന് കണ്ടെത്താന്‍ കഴിഞ്ഞിരുന്നില്ല. ദിമിത്രി ഡാര്‍ക്ക് വെബ്ബില്‍ നടത്തിയ ചില ഇടപെടലുകളാണ് നിര്‍ണായക കണ്ടെത്തലിലേക്ക് നയിച്ചത്.
കുട്ടിയെ ലൈംഗികാതിക്രമത്തിന് വിധേയമാക്കിയതിന്റെ വിശദാംശങ്ങള്‍ ദിമിത്രി ഡാര്‍ക്ക് വെബ്ബിലെ ചാറ്റുകളില്‍ പ്രതിപാദിച്ചിരുന്നു. ഡാര്‍ക്ക് വെബ് സസൂക്ഷ്മം നിരീക്ഷിക്കുന്ന അമേരിക്ക ഉള്‍പ്പെടെയുള്ള രാജ്യങ്ങളിലെ ഇന്റലിജന്‍സ് സംഘങ്ങളും ഇന്റര്‍പോളും ഇക്കാര്യം റഷ്യന്‍ അന്വേഷണ ഉദ്യോഗസ്ഥരെ അറിയിക്കുകയായിരുന്നു. പ്രതിയെ തിരിച്ചറിയാനും കുട്ടിയെ തടവില്‍ പാര്‍പ്പിച്ച സ്ഥലം മനസിലാക്കാനും ഇതിലൂടെ കഴിഞ്ഞു. തുടര്‍ന്ന് പൊലീസും സൈന്യവും സന്നദ്ധ പ്രവര്‍ത്തകരും ഉള്‍പ്പെട്ട പ്രത്യേക ദൗത്യസംഘമാണ് കുട്ടിയെ മോചിപ്പിച്ചത്.
https://www.facebook.com/Malayalivartha
