ബ്രിട്ടണിലെ കേംബ്രിഡ്ജ് ഷെയറില്‍ തന്റെ 64-ാം ജന്മദിനത്തില്‍ നിഗേല്‍ റൈറ്റ് എന്ന മധ്യവയസ്‌കന്‍ കൊല്ലപ്പെട്ട സംഭവത്തില്‍ നിഗേലിന്റെ ഭാര്യ മെലാനി റൈറ്റ് (48), കാമുകന്‍ ബാരി ചാപ്മാന്‍ (34) എന്നിവര്‍ കുറ്റക്കാരാണെന്നു കണ്ടെത്തിയ കോടതി ഇവര്‍ക്കുള്ള ശിക്ഷ ഡിസംബറില്‍ വിധിക്കും.

വീട്ടിലുണ്ടായ വഴക്കിനെ തുടര്‍ന്ന് നിഗേലിനെ ഭാര്യയും കാമുകനും ചേര്‍ന്ന് അതിദാരുണമായി കൊലപ്പെടുത്തുകയായിരുന്നു. മെയ് 25-ന് ആയിരുന്നു സംഭവം. വഴക്കു ശ്രദ്ധയില്‍പ്പെട്ട അയല്‍വീട്ടുകാര്‍ രംഗം വഷളാകുന്നതുകണ്ട് പോലീസില്‍ വിവരമറിയിച്ചു. എന്നാല്‍ പോലീസ് എത്തിയപ്പോഴേയ്ക്കും വീട്ടിലെ സ്വീകരണ മുറിയിലിട്ട് നിഗേലിനെ കൊലപ്പെടുത്തിയ ശേഷം ശവശരീരം മറവു ചെയ്യാനുള്ള ശ്രമത്തിലായിരുന്നു ഇരുവരും.

കുടുംബാംഗങ്ങളെക്കുറിച്ച് വീട്ടിലെത്തിയ പോലീസ് അന്വേഷിച്ചപ്പോള്‍ തങ്ങള്‍ രണ്ടുപേരുമല്ലാതെ മറ്റാരും വീട്ടിലില്ലെന്നായിരുന്നു മെലാനിയുടെ മറുപടി. എന്നാല്‍ ഇത് വിശ്വസിക്കാതെ വീടിനുള്ളില്‍ കയറി പരിശോധിച്ച പോലീസിനു തിരച്ചിലിനൊടുവില്‍ 64-കാരന്റെ ശരീരം വീടിനുള്ളില്‍ നിന്നു ലഭിക്കുകയായിരുന്നു.

നിഗേല്‍ റൈറ്റ് അതിക്രൂരമായ മര്‍ദ്ദനമേറ്റാണ് കൊല്ലപ്പെട്ടതെന്ന് പ്രോസിക്യൂഷന്‍ വാദിച്ചു. എന്നാല്‍ ബാരിയും നിഗേലുമായുണ്ടായ തര്‍ക്കം പിന്നീട് വഴക്കായതാണെന്നും ഭര്‍ത്താവിന്റെ മരണത്തില്‍ തനിക്കു പങ്കില്ലെന്നും മെലാനി കോടതിയെ അറിയിച്ചു. വഴക്കില്‍ ബാരിയുടെ മര്‍ദ്ദനമേറ്റാണ് നിഗേല്‍ കൊല്ലപ്പെട്ടതെന്നും ഇതു തടയാന്‍ ശ്രമിച്ചപ്പോള്‍ തനിക്കും മര്‍ദ്ദനമേറ്റെന്ന് ഇവര്‍ പറഞ്ഞു. എന്നാല്‍ ഇരുവരും കുറ്റക്കാരാണെന്നു കോടതി വിധിച്ചു. ഡിസംബര്‍ രണ്ടാം വാരമാണ് ഇവര്‍ക്കുള്ള ശിക്ഷ വിധിക്കുന്നത്.