അടുത്ത പ്രസിഡന്റ് തെരഞ്ഞെടുപ്പോടെ താന്‍ അധികാരത്തിലേക്ക് മടങ്ങിവരുമെന്ന് ഡോണള്‍ഡ് ട്രംപ്. വൈറ്റ് ഹൗസില്‍ സംഘടിപ്പിച്ച വിടവാങ്ങല്‍ പരിപാടിയില്‍ സംസാരിക്കവെയാണ് ട്രംപ് 2024ലും മത്സരത്തിനുണ്ടാവുമെന്ന് സൂചിപ്പിച്ചത്. 'വളരെ തൃപ്തികരമായിരുന്നു കഴിഞ്ഞ നാല് വര്‍ഷങ്ങള്‍. മറ്റൊരു നാല് വര്‍ഷങ്ങള്‍ കൂടി ചെയ്യാന്‍ ഞങ്ങള്‍ ശ്രമിക്കുന്നു. ഞാന്‍ നിങ്ങളെ നാല് വര്‍ഷങ്ങള്‍ക്ക് ശേഷം വീണ്ടും കണ്ടുമുട്ടും' ട്രംപ് പറഞ്ഞു.

ജനുവരി 20നാണ് ട്രംപ് വൈറ്റ് ഹൗസ് ഒഴിഞ്ഞ് കൊടുക്കേണ്ടത്. അതിന് മുന്നോടിയായി പരമാവധി ആതിഥേയ പരിപാടികള്‍ സംഘടിപ്പിക്കാനുള്ള ഒരുക്കത്തിലാണ് അദ്ദേഹം എന്ന് അമേരിക്കന്‍ മാധ്യമങ്ങള്‍ റിപ്പോര്‍ട്ട് ചെയ്യുന്നു. പരിപാടിയുടെ ലൈവ് വീഡിയോ ഓക്ലഹോമ റിപ്പബ്ലിക്കന്‍ പാര്‍ട്ടിയുടെ ദേശീയ അംഗം പാം പൊള്ളാര്‍ഡ് പുറത്തുവിട്ടിരുന്നു. പരിപാടിയില്‍ പങ്കെടുക്കുന്ന പലരും മാസ്‌ക് ധരിച്ചിട്ടില്ലായിരുന്നു. അടഞ്ഞുകിടക്കുന്ന ഹാളിലേക്ക് നിരവധി പേര്‍ തള്ളിക്കയറുന്നതായും വിഡിയോയില്‍ കാണാം.
അമേരിക്കയില്‍ കോവിഡ് 19 അതിവേഗം പടര്‍ന്നുപിടിച്ച ഇടങ്ങളിലൊന്നാണ് വൈറ്റ് ഹൗസ്. ട്രംപും കുടുംബവുമടക്കമുള്ള നിരവധി പേര്‍ക്ക് വിവിധ ഘട്ടങ്ങളിലായി കോവിഡ് സ്ഥിരീകരിച്ചിരുന്നു. ഇതിനുപുറമെ രാജ്യത്ത് കോവിഡ് കേസുകള്‍ രൂക്ഷമായി കുതിച്ചുയരുകയും ചെയ്യുന്ന സാഹചര്യത്തില്‍, പൊതു ആരോഗ്യ നിര്‍ദ്ദേശങ്ങള്‍ പാലിക്കാതെയുള്ള ട്രംപിന്റെ ആതിഥേയവിടവാങ്ങല്‍ പരിപാടികള്‍ക്കെതിരെ രൂക്ഷ വിമര്‍ശനങ്ങളാണ് വ്യത്യസ്ത കോണുകളില്‍ നിന്നുയരുന്നത്.