പരസ്പര ബഹുമാനത്തോടുകൂടിയുള്ള ആശയവിനിമയം പ്രോത്സാഹിപ്പിക്കുന്നതിനായി യൂട്യൂബ് പുതിയ ഫീച്ചര് അവതരിപ്പിക്കുന്നു
പരസ്പര ബഹുമാനത്തോടുകൂടിയുള്ള ആശയവിനിമയം പ്രോത്സാഹിപ്പിക്കുന്നതിനായി യൂട്യൂബ് പുതിയ ഫീച്ചര് അവതരിപ്പിക്കുന്നു. ഇതുവഴി മറ്റുള്ളവര്ക്ക് പ്രശ്നമായേക്കാവുന്ന കമന്റുകള് പോസ്റ്റ് ചെയ്യുമ്പോള് യൂട്യൂബ് ഒരു മുന്നറിയിപ്പ് ഉപയോക്താക്കള്ക്ക് നല്കും.ഈ മുന്നറിയിപ്പ് കണ്ടതിന് ശേഷവും ഉപയോക്താവിന് കമന്റ് ചെയ്യുന്നത് തുടരുകയോ അല്ലെങ്കില് അത് പോസ്റ്റ് ചെയ്യുന്നതിന് മുമ്പ് എന്തെങ്കിലും മാറ്റം വരുത്തുകയും ചെയ്യാം. യൂട്യൂബിന്റെ നിര്മിത ബുദ്ധി സംവിധാനങ്ങള് കമന്റ് പ്രശ്നമുള്ളതാണെന്ന് കണ്ടെത്തുമ്പോഴാണ് ഈ മുന്നറിയിപ്പ് കാണിക്കുക. മോശം കമന്റുകളെ മാറ്റി നിര്ത്തുന്നതിനായുള്ള പുതിയ ഫില്റ്ററും യൂട്യൂബ് പരീക്ഷിക്കും. അത്തരം കമന്റുകള് ഓട്ടോമാറ്റിക് ആയി റിവ്യൂ ചെയ്യപ്പെടും. ഇതുവഴി ക്രിയേറ്റര്മാര്ക്ക് അവര്ക്ക് ഇഷ്ടപ്പെടാത്ത കമന്റുകള് വായിക്കേണ്ടി വരില്ല. ഈ പ്രക്രിയ സുഗമമാക്കാന് തങ്ങള് കമന്റ് മോഡറേഷന് സംവിധാനം പരിഷ്കരിച്ചുകൊണ്ടിരിക്കുകയാണെന്ന് യൂട്യൂബ് പ്രൊഡക്ട് മാനേജ്മെന്റ് വൈസ് പ്രസിഡന്റ് ജോഹാന റൈറ്റ് പറഞ്ഞു.
അടുത്തവര്ഷം മുതല് ക്രിയേറ്റര്മാരുടെ ലിംഗം, വംശം, ഗോത്രം പോലുള്ള വിവരങ്ങള് ചോദിച്ചറിയും. ക്രിയേറ്റര്മാര്ക്ക് സ്വമേധയാ ഇതിന് മറുപടി നല്കാം. ഈ വിവരങ്ങളുടെ അടിസ്ഥാനത്തില് സെര്ച്ച്, ഡിസ്കവറി, മൊണടൈസേഷന് സംവിധാനങ്ങളില് വ്യത്യസ്ത വിഭാഗങ്ങളില് പെടുന്ന ഉപയോക്താക്കള് ഏത് രീതിയില് പരിഗണിക്കപ്പെടുന്നു എന്നത് പരിശോധിക്കും. ചില വിഭാഗങ്ങളെ ബാധിക്കുന്ന വിദ്വേഷം, വിവേചനം, പീഡനം പോലുള്ളവയും പരിശോധിക്കുമെന്നും റൈറ്റ് പറഞ്ഞു. അതെ സമയം കോവിഡ് വാക്സിനുമായി ബന്ധപ്പെട്ട് തെറ്റിദ്ധാരണ പരത്തുന്ന വീഡിയോകള് നിരോധിക്കുമെന്ന് യൂട്യൂബ്. അധികൃതരില്നിന്നുള്ള ആധികാരിക വിവരങ്ങള്ക്ക് വിരുദ്ധമായ ഉള്ളടക്കങ്ങളാണ് നീക്കം ചെയ്യുക.
വാക്സിന് ജനങ്ങളെ കൊല്ലുമെന്നും, വന്ധ്യതയ്ക്ക് ഇടയാക്കുമെന്നും കുത്തിവെപ്പിനൊപ്പം മനുഷ്യരില് മൈക്രോ ചിപ്പ്ഘടിപ്പിച്ചേക്കുമെന്നുമെല്ലാമുള്ള വ്യാജ പ്രചരണങ്ങള് ഇതില് ഉള്പ്പെടും.നിലവില് കോവിഡുമായി ബന്ധപ്പെട്ട് തെറ്റിദ്ധാരണ പരത്തുന്ന വീഡിയോകള് യൂട്യൂബ് നീക്കം ചെയ്യുന്നുണ്ട്. അംഗീകാരമില്ലാത്ത ചികിത്സാ രീതികള്, ചികിത്സ തേടുന്നതില് നിന്നും ജനങ്ങളെ പിന്തിരിപ്പിക്കല്, ഏകാന്തവാസം, സാമൂഹ്യ അകലം ഉള്പ്പടെയുള്ള ആരോഗ്യഅധികൃതരുടെ നിര്ദേശങ്ങളെ പരസ്യമായി ലംഘിക്കല് എന്നിവ യൂട്യൂബില് അംഗീകരിക്കില്ല. ആരോഗ്യ പ്രവര്ത്തകരും ഗവേഷകരും മരുന്ന് നിര്മാതാക്കളും വിവിധ ചികിത്സാ രീതികള് കണ്ടെത്താനുള്ള ശ്രമം നടത്തിക്കൊണ്ടിരിക്കുകയാണ്. കൊറോണ വ്യാപനത്തെ ശാശ്വതമായി തടയാന് വാക്സിന് മാത്രമേ സാധിക്കൂ എന്ന പ്രതീക്ഷയിലാണ് ലോകം. വാക്സിന് പരീക്ഷണങ്ങള് പലയിടങ്ങളിലായി നടക്കുന്നുണ്ടെങ്കിലും ഒന്നിനും അന്തിമ അംഗീകാരം ലഭിച്ചിട്ടില്ല. അടുത്തവര്ഷത്തോടെ വാക്സിന് യാഥാര്ഥ്യമാക്കാന് സാധിക്കുമെന്നാണ് പ്രതീക്ഷിക്കുന്നത്.
https://www.facebook.com/Malayalivartha