കോവിഡ് പരിസമാപ്തിയ്ലേക്കെന്ന് ലോകാരോഗ്യ സംഘടന; ലോകത്തിന് സ്വപ്നം കാണാനാരംഭിക്കാമെന്ന് തെദ്രോസ് അദനോം ഗബ്രെയേസിസ്; ഫൈസറിന്റെ കോവിഡ് വാക്സിന് അനുമതി നല്കുന്ന രണ്ടാമത്തെ രാജ്യമായി ബഹ്റൈന്; പ്രതീക്ഷയോടെ ലോകം
കോവിഡ് വാക്സീനുകള് അനകൂലഫലം നല്കുകയും രാജ്യങ്ങള് അവ ഉപയോഗിക്കാന് അനുവാദം നല്കുകയും ചെയ്തതോടെ ലോകത്തിന് പ്രതീക്ഷകള് കൈവന്നിരിക്കുകയാണ്. കോവിഡിന്റെ പരിസമാപ്തിയ്ക്കായി എന്ന അഭിപ്രായവുമായി ലോകാരോഗ്യ സംഘടനതന്നെ രംഗത്തു വന്നത് 2021 പ്രതീക്ഷകള് നല്കുന്നതാകുകയാണ്. ലോക ജനതക്ക് ഇനി സ്വപ്നം കാണാനാരംഭിക്കാമെന്ന് ലോകാരോഗ്യസംഘടനാ മേധാവി തെദ്രോസ് അദനോം ഗബ്രെയേസിസ് തന്നെ പ്രഖ്യാപിച്ചിരിക്കുകയാണ്. എന്നാല്, വാക്സിനുകള്ക്കായുള്ള കൂട്ടയോട്ടത്തിനിടയില് ദരിദ്രരാഷ്ട്രങ്ങളെ സമ്പന്നരാഷ്ട്രങ്ങള് ചവിട്ടിയമര്ത്തരുതെന്നും തെദ്രോസ് അദനോം കൂട്ടിച്ചേര്ത്തു.
വൈറസിനെ നമുക്ക് എന്നന്നേക്കുമായി നശിപ്പിക്കാം. പക്ഷെ അതിലേക്കുള്ള പാത അപകടകരവും അവിശ്വനീയവുമാണ്. മനുഷ്യത്വത്തിന്റെ നന്മയും ഏറ്റവും മോശമായ വശവും കോവിഡ് കാലം നമുക്ക് കാണിച്ചു തന്നു. സഹാനുഭൂതിയും നിസ്വാര്ഥതയും നിറഞ്ഞ പ്രചോദനപരമായ പ്രവര്ത്തികളും, ഗവേഷണങ്ങളുടേയും പുത്തന് ആവിഷ്കാരങ്ങളുടേയും അദ്ഭുതാവഹമായ നേട്ടങ്ങളും കോവിഡ് കാലത്തുണ്ടായി എന്നാല് അതോടൊപ്പം തന്നെ സ്വാര്ഥതാത്പര്യങ്ങളുടേയും പഴിചാരലുകളേയും ഭിന്നതയുടേയും കാഴ്ചകളും നാം കണ്ടെന്നും തെദ്രോസ് അദനോം പറഞ്ഞു.
ഗൂഢാലോചനയുടെ തന്ത്രങ്ങള് കാരണം ശാസ്ത്രം പിന്തള്ളപ്പെട്ട, ഭിന്നതയുടെ സ്വരം ഐക്യദാര്ഢ്യത്തെ തകര്ത്ത, സ്വന്തം താത്പര്യം ത്യാഗത്തെ മറികടന്ന ചിലയിടങ്ങളില് വൈറസ് കൂടുതല് ശക്തി പ്രാപിക്കുകയും വ്യാപിച്ചു കൊണ്ടിരിക്കുകയും ചെയ്യുന്നു. പ്രത്യേകമായി പേര് എടുത്തു പറയാതെ രോഗവ്യാപനവും മരണസംഖ്യയും വര്ധിക്കുന്ന രാജ്യങ്ങളെ കുറിച്ച് അദ്ദേഹം പരാമര്ശിച്ചു. കോവിഡ് കാലത്തുണ്ടായ പ്രതിസന്ധികളെ അതിജീവിച്ച് ലോകത്തിന് മുന്നോട്ട് പോകണമെന്നും ഉത്പാദനത്തിന്റേയും ഉപഭോഗത്തിന്റേയും മുമ്പുണ്ടായിരുന്ന അതേ നിലയിലേക്കും ശൈലിയിലേക്കും തിരിച്ചെത്തണമെന്നും തെദ്രോസ് അദനോം ആവശ്യപ്പെട്ടു. സ്വകാര്യസ്വത്തായി കാണാതെ വാക്സിന് സൗകര്യം ലോകത്തെ എല്ലായിടത്തും സമാനരീതിയില് വിതരണം ചെയ്യാനുള്ള നടപടി സ്വീകരിക്കണമെന്നും കോവിഡ് പ്രതിസന്ധിയുടെ പരിസമാപ്തിയിലേക്കാണ് നാം നീങ്ങുന്നതെന്നും അദ്ദേഹം കൂട്ടിച്ചേര്ത്തു.
അതെ സമയം അമേരിക്കന് ഔഷധകമ്പനിയായ ഫൈസറിന്റെ കോവിഡ് വാക്സിന് അനുമതി നല്കുന്ന ലോകത്തെ രണ്ടാമത്തെ രാജ്യമായി ബഹ്റൈന് മാറി. വാക്സിന് അടിയന്തരമായി ഉപയോഗിക്കുന്നതിന് അംഗീകാരം നല്കിയതായി ബഹ്റൈന് അറിയിച്ചു. ബുധനാഴ്ച ബ്രിട്ടനാണ് വാക്സിന് ആദ്യമായി അംഗീകാരം നല്കിയത്. അടുത്ത ആഴ്ച ബ്രിട്ടണില് വാക്സിന്റെ വിതരണം ആരംഭിക്കും. അതേ സമയം ബഹ്റൈന് വാക്സിന്റെ വിതരണം എന്ന് ആരംഭിക്കുമെന്ന് ഫൈസര് വ്യക്തമാക്കിയിട്ടില്ല. ചൈനയുടെ സിനോഫാം വാക്സിന് ആരോഗ്യ പ്രവര്ത്തകര്ക്ക് നല്കുന്നതിന് നവംബറില് ബഹ്റൈന് അംഗീകാരം നല്കിയിരുന്നു.
ഇന്ത്യയിലും കോവിഡ് വാക്സിന് അവസാനഘട്ടത്തിലാണ്. ആഴ്ച്ചക്കള്ക്കുള്ളില് വാക്സിന് ലഭ്യമാക്കുമെന്ന് പ്രധാനമന്ത്രി നരേന്ദ്രമോദി ഇന്നലെ സര്വകക്ഷിയോഗത്തില് അറിയിച്ചിരുന്നു. ഇന്ത്യയില് അവസാനഘട്ടത്തിലുള്ള മൂന്നു വാക്സിനുകളും മികച്ച ഫലമാണ് നല്കുന്നതെന്ന് ഗവേഷകര് അറിയിച്ചതായും പ്രധാനമന്ത്രി പറഞ്ഞിരുന്നു. ലോകാരോഗ്യ സംഘടനയുടെ അനുമതി ലഭിച്ചിട്ടില്ലെങ്കിലും റഷ്യയും ചൈനയും ഇതിനോടകം തന്നെ വാക്സിന് ഉപയോഗം ആരംഭിച്ചതായിയുള്ള വര്ത്തകളുമുണ്ട്. ഇതെല്ലാം കോവിഡ് പ്രതിസന്ധി 2021 തന്നെ അവസാനിപ്പിക്കാന് സാധിക്കുമെന്ന പ്രതീക്ഷ നല്കുന്നതാണ്.
https://www.facebook.com/Malayalivartha
