ലോകത്തിലെ ഏറ്റവും വിലകൂടിയ സ്​പോര്‍ട്​സ്​ കാറുകളില്‍ ഒന്നായ ലംബോര്‍ഗിനി അവന്തഡോറില്‍ ബാര്‍ബിക്യൂ പരീക്ഷണം നടത്തിയ യുവാവിന്​ കിട്ടിയത് എട്ടിന്റെ പണി. പാര്‍ക്ക്​ ചെയ്​തിരിക്കുന്ന കാറിന്റെ എക്​സ്​ഹോസ്​റ്റ്​ ഉപയോഗിച്ചായിരുന്നു ഇറച്ചി ബാര്‍ബിക്യൂ ചെയ്യാന്‍ യുവാവ് ശ്രമിച്ചത്​.വാഹനം സ്​റ്റാര്‍ട്ട്​ ചെയ്​ത്​ ഒരാള്‍ ആക്​സിലറേറ്റര്‍ അമര്‍ത്തിച്ചവിട്ടുകയും, പിന്നില്‍ നിന്ന്​ കമ്ബിയില്‍ കൊരുത്ത ഇറച്ചി മറ്റൊരാള്‍ എക്​സ്​ഹോസ്​റ്റ്​ പൈപ്പില്‍ കാണിച്ച്‌ ചുട്ടെടുക്കാന്‍ ശ്രമിക്കുകയായിരുന്നു. എന്നാല്‍ ഞൊടിയിടയില്‍ ​ തീ എക്​സ്​ഹോസ്​റ്റ്​ വഴി ഉള്ളിലേക്ക്​ പടരുകയും തീയും പുകയും ഉയരുകയുമായിരുന്നു.

ഇതോടെ പരിഭ്രാന്തരായ യുവാക്കള്‍ എഞ്ചിന്‍ കവര്‍ തുറന്ന്​ തീകെടുത്താന്‍ ശ്രമിച്ചെങ്കിലും സാധിച്ചില്ല. ഇതിനിടെ വാഹനത്തില്‍ നിന്ന്​ ചുവന്ന നിറത്തിലുള്ള ഒരു ഫ്ലൂയിഡ്​ പുറത്തേക്ക്​ ഒഴുകാനാരംഭിച്ചു.അവന്തഡോറിലെ 6.5 ലിറ്റര്‍ നാച്ചുറലി ആസ്പിറേറ്റഡ് വി 12 എഞ്ചിന്‍ വലിയരീതിയില്‍ ആക്​സിലറേറ്റ്​ ചെയ്​താല്‍ ഇടക്കിടക്ക്​ തീതുപ്പാറുള്ള പ്രവണത കാണിക്കാറുണ്ട്​. ഇത്​ ഉപയോഗിച്ച്‌​ ഇറച്ചി ഗ്രില്ല്​ ചെയ്യാനുള്ള ശ്രമമാണ്​ ദുരന്തത്തില്‍ കലാശിച്ചത്​. സംഭവത്തിന്റെ വീഡിയോ സമൂഹമാധ്യമങ്ങളില്‍ വൈറലായിരിക്കുകയാണ്.ചൈനയിലെ ഹുനാന്‍ പ്രവിശ്യയിലാണ്​ സംഭവം നടന്നതെന്നാണ് റിപ്പോര്‍ട്ട്.