നേപ്പാളിൽ പുതിയ പ്രധാനമന്ത്രി സ്ഥാനം ഏറ്റതും അദ്ദേഹം ഇന്ത്യൻ പ്രധാനമന്ത്രിയെ പറ്റി പറഞ്ഞതും ലോകം മുഴുവൻ അറിഞ്ഞ കാര്യങ്ങളാണ്. ഇപ്പോൾ ഇതാ ഇന്ത്യയുമായുള്ള വ്യാപാര വാണിജ്യ ബന്ധം പൂർവ്വാധികം ശക്തമാക്കാനായി നേപ്പാൾ തയ്യാറെടുക്കുകയാണ്. യാത്രാ നിയന്ത്രണങ്ങൾ മാറ്റി ജനങ്ങൾക്ക് ഇന്ത്യയിലേക്ക് വരാനുംപോകാനും അനുവദിക്കണമെന്നും നേപ്പാൾ അപേക്ഷിക്കുകയുണ്ടായി.

നേപ്പാളിലെ ഇന്ത്യൻ സ്ഥാനപതി വിനയ് മോഹൻ ഖ്വത്രയുമായി വിവിധ വകുപ്പു മന്ത്രിമാരാണ് ചർച്ച നടത്തിയിരിക്കുന്നത്. ഊർജ്ജ മന്ത്രാലയം, ജലശക്തി , ജലസേചനം , വാണിജ്യം എന്നീ വകുപ്പ് മന്ത്രിമാരാണ് ചർച്ച നടത്തിയത്. നേപ്പാൾ ഉർജ്ജമന്ത്രി പാഫ്പാ ഭുസാലാണ് ഇരുരാജ്യത്തേയും ജനങ്ങളെ പരസ്പരം ഇടപഴകാനുള്ള അനുവാദം നൽകണമെന്ന് നിർദ്ദേശം നൽകിയിരിക്കുന്നത് .

നേപ്പാളിന്റെ വികസനത്തിന് എന്നും പ്രാമുഖ്യം നൽകുന്ന ഇന്ത്യയുമായുള്ള സൗഹൃദം കൂടുതൽ ശക്തമാക്കുമെന്നും ഭുസാൽ ഉറപ്പുനൽകുകയുണ്ടായി . ഇന്ത്യൻ സ്ഥാനപതി വിനയ് മോഹൻ നേപ്പാളിൽ അധികാരമേറ്റ പുതിയ മന്ത്രിസഭയ്‌ക്ക് എല്ലാ ആശംസകളും നേർന്നു.