മ്യാന്‍മാറിലെ ജനപ്രിയ നേതാവ് ഓങ് സാന്‍ സൂ ചിയ്ക്ക് നാല് വര്‍ഷം തടവ്. ചട്ടം ലംഘിച്ച് ഇറക്കുമതി ചെയ്ത വോക്കി ടോക്കിയും സിഗ്‌നല്‍ ജാമറും കൈവശം വച്ചെന്നതും കൊവിഡ് ചട്ടം ലംഘിച്ചെന്നതുമാണ് കുറ്റങ്ങള്‍.

കഴിഞ്ഞ ഫെബ്രുവരി ഒന്നിന് പട്ടാളം അധികാരം പിടിച്ചതിനു ശേഷം സൂ ചിക്കെതിരെ ചുമത്തിയ ഒട്ടേറെ കേസുകളില്‍ രണ്ടാമത്തെ വിധിയാണിത്. ആദ്യ വിധിയില്‍ നാല് വര്‍ഷം ശിക്ഷിച്ചെങ്കിലും രണ്ട് വര്‍ഷം തടവായി പട്ടാള ഭരണകൂടം ഇളവ് നല്‍കിയിരുന്നു. ഇപ്പോള്‍ ചുമത്തപ്പെട്ട എല്ലാ കേസുകളിലും ശിക്ഷിക്കപ്പെട്ടാല്‍ സമാധാന നൊബേല്‍ ജേതാവായ സൂ ചിക്ക് 100 വര്‍ഷത്തിലേറെ ജയിലില്‍ കഴിയേണ്ടി വന്നേക്കാം.

അജ്ഞാത കേന്ദ്രത്തിലാണ് സൂ ചിയെ തടവിലാക്കിയിരിക്കുന്നത്. 2020 ഫെബ്രുവരി ഒന്നിന് പട്ടാള അട്ടിമറിയിലൂടെയാണ് ഓങ് സാന്‍ സൂ ചിക്ക് ഭരണം നഷ്ടപ്പെട്ടത്.

ഇതിനു പിന്നാലെ ഇവരെ തടവിലാക്കിയിരുന്നു. വിവിധ കുറ്റങ്ങള്‍ ചുമത്തി ഒരു ഡസനിലേറെ കേസുകളാണ് സൂ ചിക്കെതിരെ രജിസ്റ്റര്‍ ചെയ്തിരിക്കുന്നത്. പട്ടാള ഭരണത്തിനെതിരായ പ്രതിഷേധസമരങ്ങളില്‍ ഇതുവരെ 1300 ഓളം പേരാണ് മരിച്ചു വീണത്.



സൂ ചിയുടെ നേതൃത്വത്തില്‍ പട്ടാള ഭരണത്തിനെതിരെ ദശകങ്ങള്‍ നീണ്ട പ്രക്ഷോഭത്തിനൊടുവില്‍ 2011ലാണു രാജ്യത്തു ജനാധിപത്യ മാതൃകയിലുള്ള ഭരണത്തിനു പട്ടാളനേതൃത്വം വഴങ്ങിയത്. 2008ല്‍ സൈന്യം തയാറാക്കിയ ഭരണഘടനാ പ്രകാരം പാര്‍ലമെന്റില്‍ 25% സീറ്റുകള്‍ പട്ടാളത്തിനാണ്. സുപ്രധാന ഭരണപദവികളും സൈന്യം കയ്യാളുന്നു.


പട്ടാള ഭരണകൂടം സൂ ചിയെ 15 വര്‍ഷം വീട്ടുതടങ്കലിലാക്കിയിരുന്നു. 2010ല്‍ സ്വതന്ത്രയായ സൂ ചി, 2015 ലെ തെരഞ്ഞെടുപ്പില്‍ തന്റെ കക്ഷിയെ വിജയത്തിലേക്കു നയിക്കുകയും മ്യാന്‍മറിലെ ആദ്യ ജനാധിപത്യ സര്‍ക്കാരിനു നേതൃത്വം നല്‍കുകയും ചെയ്തു.