മുൻ മിസ് യുഎസ്എയും ഫാഷൻ വ്ലോ​ഗറുമായ ചെസ്‌ലി ക്രിസ്റ്റ് (30) കെട്ടിടത്തിൽ നിന്ന് ചാടി മരിച്ച വാർത്ത ഞെട്ടലോടെയാണ് അവരുടെ ആരാധകരും ഫാഷൻ ലോകവുമൊക്കെ കേട്ടത്. ലോകമെമ്പാടുമുള്ള നിരവധി പേർ ചെസ്‌ലിയുടെ അകാല വിയോ​ഗത്തിൽ ആദരാഞ്ജലികൾ പങ്കുവച്ചു. ഞായറാഴ്ച രാവിലെ ഏഴോടെ മൻഹട്ടനിലെ 60 നിലയുള്ള കെട്ടിടത്തിൽ നിന്നാണ് ചെസ്‌ലി ചാടിയതെന്ന് ന്യൂയോർക്ക് സിറ്റി പൊലീസ് അറിയിച്ചു. ഇതേ കെട്ടിടത്തിൽ ഒൻപതാം നിലയിലാണ് അവർ താമസിച്ചിരുന്നത്. മരിക്കുന്നതിനു മുമ്പായി ഈ ദിവസം നിങ്ങൾക്ക് വിശ്രമവും സമാധാനവും നൽകട്ടേയെന്ന് അവർ ഇൻസ്റ്റഗ്രാമിൽ പോസ്റ്റ് ചെയ്തിരുന്നു.

ആത്മഹത്യയാണെന്നാണ് പ്രാഥമിക നിഗമനം. കാരണം എന്താണെന്ന് ഇതുവരെ വ്യക്തമായിട്ടില്ല. മാനസികാരോ​ഗ്യത്തിന്റെ പ്രാധാന്യത്തെക്കുറിച്ച് നേരത്തേ ചെസ്‌ലി പങ്കുവെച്ച വാക്കുകളും ഇപ്പോൾ വാർത്തകളിൽ നിറയുന്നുണ്ട്. തന്റെ മാനസികാരോ​ഗ്യം കൈവിട്ടുപോകാതിരിക്കാൻ പരമാവധി ശ്രമിക്കാറുണ്ടെന്ന് ചെസ്‌ലി നേരത്തേ പറഞ്ഞിരുന്നു. കൈവിടുന്ന ഘട്ടങ്ങളിൽ കൗൺസിലറിനോട് സംസാരിക്കാറുണ്ടെന്നും ചെസ്‌ലി പറഞ്ഞിരുന്നു. സ്നേഹിക്കപ്പെടുകയും മറ്റുള്ളവരെ സേവിക്കുകയും ചെയ്തിരുന്നയാളാണ് ചെസ്‌ലി എന്ന് കുടുംബം പറഞ്ഞു. അറ്റോർണിയായിരിക്കെ നീതി ഉറപ്പാക്കാനും മിസ് യുഎസ്എ പദവിയിലായിരിക്കുമ്പോഴും എക്സ്ട്രായിൽ അവതാരകയായിരിക്കുമ്പോഴും തന്റെ സേവനത്തിൽ വിട്ടുവീഴ്ച ചെയ്യാതിരുന്നയാളാണ് ചെസ്‌ലി എന്ന് കുടുംബം പറയുന്നു.

അതിലെല്ലാമുപരി ഒരു മകൾ, സഹോദരി, സുഹൃത്ത്, മെന്റർ, സഹപ്രവർത്തക എന്നീ നിലകളിലെല്ലാമുള്ള ചെസ്‌ലിയുടെ സ്വാധീനം തുടർന്നും നിലനിൽക്കുമെന്നും കുടുംബം അറിയിച്ചു. 2019-ലാണ് ചെസ്‌ലി സൗന്ദര്യറാണിപട്ടം ചൂടിയത്. സൗത്ത് കരോലൈന സർവകലാശാല, വേക്ക് ഫോറസ്റ്റ് സർവകലാശാല എന്നിവിടങ്ങളിൽ നിന്നായി മൂന്നു ബിരുദം നേടി. രാജ്യത്ത് ചെയ്യാത്ത കുറ്റത്തിന് തടവിൽ കഴിയേണ്ടി വന്നവരുടെ ശിക്ഷാകാലാവധി കുറയ്ക്കാൻ അവർ തടവുകാർക്ക് സൗജന്യമായി നിയമസഹായവും നൽകിയിരുന്നു.