ഒന്നിൽ കൂടുതൽ ഭാര്യമാരുമായി ജീവിക്കുന്നവർ ലോകത്ത് പലയിടങ്ങളിലുമുണ്ടാകും. എട്ട് ഭാര്യമാരുമായി ഒരു വീട്ടിൽ കഴിയുന്ന ഒങ് ഡാമിന്റെ കഥയാണിപ്പോൾ സോഷ്യൽ മീഡിയയിൽ വൈറലായിക്കൊണ്ടിരിക്കുന്നത്. ഒങ് ഡാം സോറോട്ട് എന്നയാൾ ഒരു ടാറ്റൂ കലാകാരനാണ്. തായ്ലൻഡിലെ സ്വകാര്യ ടിവി ചാനലിലാണ് ഒങ് ഡാം തന്റെ ജീവിത കഥ തുറന്നു പറയുന്നത്. തന്റെ 8 ഭാര്യമാരും പരസ്പരം നല്ല സഹകരണമാണെന്നും അവരെല്ലാം ഒരുമിച്ചാണ് കുടുംബം പങ്കിടുന്നതെന്നും അദ്ദേഹം പറയുന്നു. ഒങ് ഡാം തന്റെ ഭാര്യമാരെ കണ്ടുമുട്ടിയ രീതിയും വളരെ രസകരമാണ്. ആദ്യ ഭാര്യ നോങ് സ്‌പ്രൈറ്റിനെ ഒരു സുഹൃത്തിന്റെ വിവാഹത്തിൽ വെച്ചാണ് താൻ കണ്ടുമുട്ടിയത്. ആദ്യ കൂടിക്കാഴ്ചയിൽ തന്നെ ഇരുവരും പ്രണയത്തിലാകുകയും പിന്നീട് വിവാഹതിരാവുകയുമായിരുന്നു. രണ്ടാം ഭാര്യ നോങ് എലിനെ ഒരു മാർക്കറ്റിൽ വെച്ചാണ് കണ്ടത്. ആദ്യ കാഴ്ചയിൽ തന്നെ പ്രണയം തോന്നി.

ആദ്യ ഭാര്യയെക്കുറിച്ച് അറിഞ്ഞിട്ടും സോറോട്ടിനെ വിവാഹം കഴിക്കാൻ നോങ് സമ്മതിച്ചു. മൂന്നാം ഭാര്യയെ ആശുപത്രിയിൽ വെച്ചും ഇൻസ്റ്റ​ഗ്രാം, ഫെയ്സ്ബുക്ക്, ടിക്ടോക് വഴി യഥാക്രമം നാലാമത്തെയും അഞ്ചാമത്തെയും ആറാമത്തെയും ഭാര്യമാരെയും കണ്ടെത്തി. ഇത്രയുമായിട്ടും സോറോട്ടിന്റെ പ്രണയം അവസാനിച്ചില്ല. അമ്മയുമായി ക്ഷേത്രദർശനം നടത്തുമ്പോൾ ഏഴാം ഭാര്യയെയും പട്ടായയിൽ നാല് ഭാര്യമാരുമായി അവധി ആഘോഷിക്കാനെത്തിയപ്പോൾ എട്ടാം ഭാര്യയെയും കണ്ടുമുട്ടി. അദ്ദേഹം വളരെ ഊർജസ്വലനായ മനുഷ്യനാണ്. അതാണ് അദ്ദേഹത്തെ പ്രണയിക്കാനുള്ള കാരണമെന്ന് എല്ലാ ഭാര്യമാരും പറയുന്നു. അദ്ദേഹത്തെ ഞങ്ങൾ ഭ്രാന്തമായി പ്രണയിക്കുന്നു. അദ്ദേഹം ഞങ്ങളെ നന്നായി നോക്കുന്നു.

ഞങ്ങൾ പരസ്പരം വഴക്കിടേണ്ട ഒരു കാര്യവുമില്ല. ഭാര്യമാർ പറഞ്ഞതായി അന്താരാഷ്ട്ര മാധ്യമങ്ങൾ റിപ്പോർട്ട് ചെയ്യുന്നു. സോറോട്ടിന് ആദ്യ ഭാര്യയിൽ ഒരു കുട്ടിയുണ്ട്. രണ്ട് ഭാര്യമാർ ഗർഭിണികളാണ്. നാല് കിടപ്പുമുറികളിലായാണ് ഭാര്യമാർ ഉറങ്ങുന്നത്. ഒരു മുറിയിൽ രണ്ട് ഭാര്യമാർ വീതമാണ് കിടക്കുക. ഭർത്താവിനൊപ്പം കിടക്ക പങ്കിടുന്നതാകട്ടെ ഊഴമനുസരിച്ചും. ആർക്കും അതിലൊരു പ്രശ്നവുമില്ല. തങ്ങളുടെ ഭർത്താവാണ് ഈ ലോകത്തേക്കും വച്ച് ഏറ്റവും മികച്ച ഭർത്താവെന്ന് യുവതികൾ പറയുന്നു. പണം മോഹിച്ചാണ് ഇവർ തന്നെ‌ വിവാഹം ചെയ്തതെന്ന് ആരോപണങ്ങളെ ഒങ് ഡാം തള്ളിക്കളയുന്നു.

വീട്ടിലെ എല്ലാവർക്കും ഓരോ കടമകളുണ്ട്. ഭക്ഷണം, പലതരം വസ്തുക്കൾ, സൗന്ദര്യ വർധക സാമഗ്രികൾ തുടങ്ങിയവ വിറ്റ് അവർ പണം സ്വരൂപിക്കുന്നുണ്ട്- സന്തോഷത്തോ‌ടെ ഒങ് ഡാം പറയുന്നു. വേറെ ആളെ കിട്ടിയാൽ ഒരു മ‌ടിയുമില്ലാതെ തന്നോട് വന്ന് പറയാനുള്ള എല്ലാ സ്വാതന്ത്യവും നൽകിയിട്ടുണ്ടെന്നും അദ്ദേഹം പറഞ്ഞു. പിരിയാൻ ആ​ഗ്രഹിക്കുന്നുണ്ടോ എന്ന് അവരോട് ചോദിക്കാറുണ്ട്. ഉണ്ട് എന്ന് പറഞ്ഞാൽ അവർക്ക് അവരുടെ വഴിക്ക് പോകാമെന്നും അദ്ദേഹം പറഞ്ഞു. അത് ഇതുവരെ സംഭവിച്ചിട്ടില്ലെങ്കിലും.