ഒണ്‍ലൈന്‍ വില്‍പ്പന സൈറ്റില്‍ ഭര്‍ത്താവിനെ വില്‍പ്പനക്ക് വെച്ച് യുവതി. ട്രേഡ് മി വെബ്‌സൈറ്റിലാണ് ഐറിഷ് യുവതി പരസ്യം നല്‍കിയത്. ജോണ്‍ മക്അലിസ്റ്റര്‍ എന്ന തന്റെ ഭര്‍ത്താവിനെ വില്‍ക്കാനുണ്ട് എന്നാണ് യുവതി കുറിച്ചത്. വെറും 25 ഡോളര്‍ (1867.20 ഇന്ത്യന്‍ രൂപ) ആണ് തന്റെ ഭര്‍ത്താവിന് യുവതി നിശ്ചയിച്ച വില. ഫ്രീയായി വീട്ടിലെത്തിച്ച് നല്‍കുമെന്നും യുവതി പറയുന്നു. പക്ഷേ അത് അടുത്ത പ്രദേശത്തേക്ക് മാത്രമായിരിക്കും എന്നും നിബന്ധനയുണ്ട്. 6'1 ഉയരം, 37 വയസ്സ്, കര്‍ഷകന്‍, വേട്ടക്കാരന്‍, മീന്‍പിടുത്തക്കാരന്‍ എന്നിങ്ങനെയാണ് ആളിനെ കുറിച്ച് വിശേഷിപ്പിച്ചിരിക്കുന്നത്.

തിരിച്ചെടുക്കുകയോ, എക്‌സ്‌ചേഞ്ച് ചെയ്യുകയോ ഇല്ല എന്ന് പറഞ്ഞുള്ള നിബന്ധന പ്രകാരമാണ് വില്‍പ്പന. ഭര്‍ത്താവിന്റെ ചിത്രവും, മറ്റു സ്വഭാവ വിശേഷങ്ങളും ചേര്‍ത്താണ് യുവതി വില്പന പരസ്യം നല്‍കിയത്. ഭര്‍ത്താവിനെ വില്‍ക്കാന്‍ പ്രകോപനപരമായ കാരണമുണ്ടായതായി യുവതി വിശദീകരിക്കുന്നു. വേനലവധിക്കാലത്ത് രണ്ട് കുട്ടികളെയും തന്നെയും വീട്ടില്‍ തനിച്ചാക്കി മീന്‍പിടിത്തത്തിന് പോയതാണ് യുവതിയെ പ്രകോപിപ്പിച്ചത്.

ജോണിന് മുമ്ബ് നിരവധി ഉടമകള്‍ ഉണ്ടായിരുന്നു, എന്നാല്‍ അയാള്‍ക്ക് ഭക്ഷണവും വെള്ളവും നല്‍കുകയും ചെയ്താല്‍ അയാള്‍ വിശ്വസ്തനായിരിക്കണമെന്ന് ഭാര്യ ലിന്‍ഡ മക്അലിസ്റ്റര്‍ പറഞ്ഞു. ഇനിയും കുറച്ച് ഹൗസ് ട്രെയിനിംഗ് ആവശ്യമാണ്. എനിക്ക് ഇപ്പോള്‍ അതിനുള്ള സമയമോ ക്ഷമയോ ഇല്ല എന്നും അവര്‍ വിവരണത്തില്‍ ചേര്‍ത്തു. ജോണ്‍ തന്റെ സുഹൃത്തുക്കളില്‍ നിന്ന് തന്നെ ഭാര്യ വില്‍പ്പനയ്ക്ക് വച്ചെന്ന് കണ്ടെത്തി. 'എനിക്ക് ഇത് കണ്ടു ചിരി വരികയാണ്,' അദ്ദേഹം പറഞ്ഞു.

ലിന്‍ഡയുടെ മാതൃരാജ്യമായ അയര്‍ലന്‍ഡില്‍ 2019ല്‍ ഇരുവരും വിവാഹിതരായി. ജോണിന്റെ പിതാവിന്റെ കുടുംബം ഐറിഷ് ആണ്. നിബന്ധനകളും വ്യവസ്ഥകളും ലംഘിച്ചതിന് ട്രേഡ് മി ഈ പരസ്യം നീക്കം ചെയ്തു. അടുത്തകാലത്തായി ആദ്യമായിട്ടാണ് ഒരാള്‍ പങ്കാളിയെ വില്‍ക്കാന്‍ ലിസ്റ്റ് ചെയ്യുന്നത് കാണുന്നത് എന്ന് ട്രേഡ് മി പോളിസി ആന്‍ഡ് കംപ്ലയന്‍സ് മാനേജര്‍ ജെയിംസ് റയാന്‍ പറഞ്ഞു.