തുടര്‍ച്ചയായ മൂന്നാംതവണയും ചൈനീസ് പ്രസിഡന്റായും പാര്‍ട്ടി ജനറല്‍ സെക്രട്ടറിയായും ഷി ജിന്‍പിങ് തുടരും. ഷി ജിന്‍പിങ്ങിനെ അനന്തകാലത്തേക്ക് അധികാരത്തിലിരിക്കാനും പാര്‍ട്ടിയില്‍ സ്വാധീനമുറപ്പിക്കാനുമുള്ള ഔദ്യോഗിക തീരുമാനത്തിന് ചൈനീസ് കമ്യൂണിസ്റ്റ് പാര്‍ട്ടിയാണ് അംഗീകാരം കൊടുത്തത്.


ചൈനയുടെ പ്രസിഡന്റ് പദവിയില്‍ ഷി ചിന്‍പിങ്ങിന് മൂന്നാം ഊഴം. ചൈനീസ് കമ്യൂണിസ്റ്റ് പാര്‍ട്ടിയുടെ 205 അംഗ സെന്‍ട്രല്‍ കമ്മിറ്റി (സിസി) പ്ലീനമാണ് ഷി ചിന്‍പിങ്ങിനെ നേതാവായി തിരഞ്ഞെടുത്തത്. ഷി അധ്യക്ഷത വഹിച്ച യോഗത്തില്‍ പുറത്തുനിന്നുള്ള 168 അംഗങ്ങളും പങ്കെടുത്തു. സൈന്യത്തിന്റെ മൊത്തത്തിലുള്ള അധികാരിയായ സെന്‍ട്രല്‍ മിലിട്ടറി കമ്മിഷന്‍ (സിഎംസി) ചെയര്‍മാനായും ഷിയെ തിരഞ്ഞെടുത്തു.

അതേസമയം സ്ഥാപക നേതാവ് മാവോ സെ തൂങ്ങിനു ശേഷം രണ്ടിലേറെ തവണ പാര്‍ട്ടി ജനറല്‍ സെക്രട്ടറിയാകുന്ന നേതാവ് എന്ന പദവിയും ഇനി ഷിക്ക് തുല്യം. ശനിയാഴ്ച 69കാരനായ ഷി യെ കേന്ദ്ര കമ്മിറ്റി അംഗമായി തെരഞ്ഞെടുത്തിരുന്നു.

നിലവില്‍ 68 വയസായിരുന്നു പാര്‍ട്ടി അംഗമാകാനുള്ള പ്രായപരിധി. ചൈനയെ നയിക്കാനായി തന്നില്‍ വിശ്വാസമേല്‍പിച്ചതിന് നന്ദിയെന്നായിരുന്നു ഷി പ്രതികരിച്ചത്.

ലോകത്തിന്റെ പിന്തുണയില്ലാതെ ചൈനക്ക് നിലനില്‍പില്ല, ലോകത്തിന് ചൈനയും അനിവാര്യമാണ്. 40വര്‍ഷത്തെ കഠിന ശ്രമങ്ങള്‍ക്കു ശേഷം സമ്പദ് രംഗത്ത് വലിയ പുരോഗതിയും ദീര്‍ഘകാല സാമൂഹിക സുസ്ഥിരതയും നമ്മള്‍ കൈവരിച്ചിരിക്കുന്നു. -ഷി കൂട്ടിച്ചേര്‍ത്തു. അതോടൊപ്പം സെന്‍ട്രല്‍ മിലിറ്ററി കമ്മീഷന്‍ തലവനായും ഷി തുടരും.

അഞ്ചു വര്‍ഷം വീതമുള്ള രണ്ടു ടേം പൂര്‍ത്തിയാകുമ്പോള്‍ പ്രസിഡന്റ് സ്ഥാനമൊഴിയുന്നതാണ് മാവോയ്ക്കു ശേഷം ചൈനയിലെ കീഴ്‌വഴക്കം. ഇതനുസരിച്ച് പ്രധാനമന്ത്രി ലി കെക്വിയാങ് അടക്കം 10 വര്‍ഷം പൂര്‍ത്തിയാക്കിയ എല്ലാവരെയും ഒഴിവാക്കിയപ്പോഴാണ് ഷി ചിന്‍പിങ്ങിനെ പാര്‍ട്ടി പരമാധികാരിയായി നിയമിച്ചത്.

ഇതിന് അവസരമൊരുക്കുന്നതടക്കമുള്ള പാര്‍ട്ടി ഭരണഘടന ഭേദഗതികള്‍ ശനിയാഴ്ച സമാപിച്ച ചൈനീസ് കമ്യൂണിസ്റ്റ് പാര്‍ട്ടി കോണ്‍ഗ്രസ് അംഗീകരിച്ചിരുന്നു. ലി കെക്വിയാങ്ങിനെ പാര്‍ട്ടിയുടെ കേന്ദ്ര കമ്മിറ്റിയില്‍ നിന്ന് ഒഴിവാക്കിയിട്ടുമുണ്ട്.