നാല്‍പത്തിയഞ്ച് ദിവസത്തെ ഇടവേളയ്ക്കുശേഷം വീണ്ടും ബ്രിട്ടന്‍ പ്രധാനമന്ത്രിയുടെ ഔദ്യോഗിക വസതിയായ ഡൗണിങ്സ്ട്രീറ്റ് പത്തിലേക്ക് തല ഉയര്‍ത്തി നടന്നു കയറുകയാണ് ഋഷി സുനക്. ഇന്ത്യയിലെ പഞ്ചാബില്‍ വേരുകളുള്ള നാല്‍പ്പത്തിരണ്ടുകാരന്‍. തിരഞ്ഞെടുപ്പ് പ്രചാരണത്തിന് ഗോപൂജ നടത്തുന്ന, കയ്യില്‍ ചരടുകെട്ടുന്ന, ഋഷി ഇന്‍ഫോസിസ് സ്ഥാപകന്‍ നാരായണ മൂര്‍ത്തിയുടെ മരുമകന്‍ കൂടിയാണ്.
പ്രമുഖരെ പിന്തള്ളി ബോറിസ് ജോണ്‍സണ്‍ മന്ത്രിസഭയില്‍ രണ്ടാമനായി. അതേ ബോറിസിനെ പ്രതിസന്ധിയിലാക്കി മന്ത്രിസഭയില്‍നിന്ന് ആദ്യം രാജിവെച്ചു.

രണ്ടാമനില്‍നിന്ന് ബ്രിട്ടന്റെ ഒന്നാമനാകാനുള്ള ആദ്യ അവസരത്തില്‍ അവസാന ഘട്ടം വരെ പൊരുതി, പക്ഷേ തോറ്റു.
മുന്‍പ് പ്രധാനമന്ത്രി സ്ഥാനത്തേക്ക് വിദേശകാര്യമന്ത്രി ലിസ് ട്രസിനോടായിരുന്നു ഋഷി ഏറ്റുമുട്ടിയത്.

ഇന്ത്യന്‍ വംശജനായ ഋഷി സുനാക് ബ്രിട്ടീഷ് പ്രധാനമന്ത്രിയാകും. ലിസ് ട്രസിന്റെ പിന്‍ഗാമിയായാണ് ഋഷി എത്തുന്നത്. എതിര്‍ സ്ഥാനാര്‍ഥി പെന്നി മോര്‍ഡന്റ് മത്സരരംഗത്തുനിന്നും പിന്‍മാറിയതോടെയാണ് ഋഷി സുനാക് പ്രധാനമന്ത്രിപദത്തിലേക്ക് എത്തുന്നത്. ബ്രിട്ടീഷ് പ്രധാനമന്ത്രിയെ കണ്ടെത്താന്‍ ഭരണകക്ഷിയായ കണ്‍സര്‍വേറ്റീവ് പാര്‍ട്ടിയില്‍ നടക്കുന്ന തെരഞ്ഞെടുപ്പില്‍ സുനാക് മുന്നിലായിരുന്നു. മത്സരത്തിനിറങ്ങാന്‍ കുറഞ്ഞത് നൂറു പേരുടെ പിന്തുണ ആവശ്യമായിരുന്നു. ഇതോടെയാണ് പെന്നി മോര്‍ഡന്റ് മത്സരരംഗത്തുനിന്നും പിന്‍മാറിയത്.


കടുത്ത പ്രതിസന്ധി നേരിടുന്ന ബ്രിട്ടീഷ് സന്പദ്വ്യവസ്ഥയെ ശരിപ്പെടുത്താന്‍ വേണ്ടിയാണ് പ്രധാനമന്ത്രിയാകാന്‍ ശ്രമിക്കുന്നതെന്നു സുനാക് പറഞ്ഞു. നേരത്തേ ബോറിസ് ജോണ്‍സന്റെ പിന്‍ഗാമിയെ കണ്ടെത്താനായി നടന്ന തെരഞ്ഞെടുപ്പില്‍ ലിസ് ട്രസിനോടു സുനാക് പരാജയപ്പെട്ടിരുന്നു. ലിസ് ട്രസ് 45 ദിവസത്തിനകം രാജിവച്ച സാഹചര്യത്തിലാണ് വീണ്ടും തെരഞ്ഞെടുപ്പിന് കളമൊരുങ്ങിയത്.