ഇന്ത്യയുടെ വിദേശകാര്യമന്ത്രി എസ്. ജയശങ്കറിനെ പ്രകീര്‍ത്തിച്ച് യുഎഇയുടെ ആര്‍ട്ടിഫിഷ്യല്‍ ഇന്റലിജന്‍സ് സഹമന്ത്രി ഒമര്‍ സുല്‍ത്താന്‍ അല്‍ ഒലാമ. ആഗോളതലത്തില്‍ നടക്കുന്ന രാഷ്ട്രീയ യുദ്ധങ്ങള്‍ക്കും വടംവലികള്‍ക്കുമിടയില്‍ ഇന്ത്യയുടെ വിദേശനയം ഈ ലോകത്തിന് മുമ്പില്‍ അവതരിപ്പിക്കുന്ന രീതി അത്യധികം മികച്ചതാണെന്നും ജയശങ്കറിന്റെ സമീപനത്തില്‍ തനിക്ക് വളരെയേറെ മതിപ്പുണ്ടെന്നും ഒമര്‍ സുല്‍ത്താന്‍ പറഞ്ഞു. കേന്ദ്രമന്ത്രിമാരും നിരവധി പാര്‍ലമെന്റ് അംഗങ്ങളും അടങ്ങുന്ന CyFY2022 എന്ന പരിപാടിയുടെ വെര്‍ച്ച്വല്‍ സമ്മേളനത്തില്‍ സംസാരിക്കവെയാണ് യുഎഇ മന്ത്രി ഇക്കാര്യം സൂചിപ്പിച്ചത്.

'ചരിത്രപരമായി, ലോകം ഏകമാനമോ ദ്വിമാനമോ ത്രിമാനമോ ആയിരുന്നു. അവിടെ നിങ്ങള്‍ക്ക് പക്ഷങ്ങള്‍ തിരഞ്ഞെടുക്കേണ്ടി വന്നു. നിങ്ങളുടെ വിദേശകാര്യ മന്ത്രി എന്നില്‍ വളരെ മതിപ്പുളവാക്കി. അദ്ദേഹത്തിന്റെ ചില പ്രസംഗങ്ങള്‍ ഞാന്‍ കണ്ടു. യുഎഇക്കും ഇന്ത്യയ്ക്കും ഒരു കാര്യം പൊതുവായി വളരെ വ്യക്തമാണ്. നമ്മള്‍ വശങ്ങള്‍ തിരഞ്ഞെടുക്കേണ്ടതില്ല.' ഒമര്‍ സുല്‍ത്താന്‍ അല്‍ ഒലാമ പറഞ്ഞു. 'അവസാനം, ഭൗമരാഷ്ട്രീയത്തെ (ജിയോപൊളിറ്റിക്‌സ്) നിര്‍ണ്ണയിക്കുന്നത് ചിലരുടെ മികച്ച താല്‍പ്പര്യമാണ്. ചരിത്രപരമായി നിലനിന്നിരുന്ന മാതൃക നിര്‍ഭാഗ്യവശാല്‍ ഇവിടെയില്ല. ഇന്ന് ഒരു രാജ്യം അതിന്റെ മികച്ച താല്‍പ്പര്യങ്ങളെക്കുറിച്ച് ചിന്തിക്കേണ്ടതുണ്ട്'. അദ്ദേഹം കൂട്ടിച്ചേര്‍ത്തു.

യുഎഇ ഇന്ത്യയുമായി ചേര്‍ന്ന് പ്രവര്‍ത്തിക്കുന്നുണ്ടെങ്കില്‍ അതിനര്‍ത്ഥം അമേരിക്കയുമായി ചേര്‍ന്ന് പ്രവര്‍ത്തിക്കാന്‍ കഴിയില്ല എന്ന അല്ല. നമുക്ക് ഒരുമിച്ച് പ്രവര്‍ത്തിക്കാനാകും. ക2ഡ2 ഗ്രൂപ്പ് ഒരു മികച്ച ഉദാഹരണമാണെന്നും ഒമര്‍ സുല്‍ത്താന്‍ അല്‍ ഒലാമ പറഞ്ഞു. വ്യാപാരത്തിന്റെയും നിക്ഷേപത്തിന്റെയും പ്രാധാന്യത്തെക്കുറിച്ചും അ?ദ്ദേഹം പറഞ്ഞു. വാണിജ്യത്തിലൂടെ ലോകത്ത് ആധിപത്യം സ്ഥാപിക്കാനുള്ള സമയമാണിത്. ഇന്ത്യയും യുഎഇയും പോലുള്ള രാജ്യങ്ങള്‍ക്ക് ലോകമെമ്പാടും തങ്ങളുടെ സ്വാധീനം വര്‍ദ്ധിപ്പിക്കാന്‍ ഒരുമിച്ച് പ്രവര്‍ത്തിക്കാമെന്നും അദ്ദേഹം പറഞ്ഞു. ഇന്ന് ലോകത്ത് ആധിപത്യം സ്ഥാപിക്കാന്‍ കഴിയുക വാണിജ്യത്തിലൂടെയാണ്. ഇന്ത്യയും യുഎഇയും പോലുള്ള രാജ്യങ്ങള്‍ക്ക് ഒരുമിച്ച് പ്രവര്‍ത്തിക്കാന്‍ കഴിയുമെങ്കില്‍, ലോകത്ത് നമ്മുടെ ചുവടുവയ്പ്പുകള്‍ വര്‍ദ്ധിപ്പിക്കാന്‍ കഴിയുമെന്നും അദ്ദേഹം അഭിപ്രായപ്പെട്ടു.

ഇന്ത്യയും യുഎഇയും തമ്മില്‍ ആഴത്തില്‍ വേരൂന്നിയ ബന്ധമാണുള്ളത്. പരസ്പര സഹകരണത്തിന് സാധ്യമായ ഒന്നിലധികം മേഖലകളുണ്ട്. ഇരു രാജ്യങ്ങളിലെയും സ്റ്റാര്‍ട്ടപ്പുകള്‍ തമ്മിലുള്ള സഹകരണം ഉദാഹരണമാണെന്നും അദ്ദേഹം പറഞ്ഞു. ഇ്യഎഥ2022 എന്ന പരിപാടിയിലാണ് അദ്ദേഹം ഇക്കാര്യം പറഞ്ഞത്. സാങ്കേതികവിദ്യ, സുരക്ഷ, സമൂഹം എന്നിവ ചര്‍ച്ച ചെയ്യുന്നതിനായി ഒബ്‌സര്‍വര്‍ റിസര്‍ച്ച് ഫൗണ്ടേഷന്‍ ദില്ലിയില്‍ സംഘടിപ്പിച്ച ത്രിദിന സമ്മേളനം ഇന്നാണ് ആരംഭിച്ചത്. മൂന്ന് ദിവസങ്ങളിലായി 37 രാജ്യങ്ങളില്‍ നിന്നുള്ള 150 പ്രതിനിധികള്‍ പരിപാടിയില്‍ പങ്കെടുക്കും.

എല്ലാ ലോക രാജ്യങ്ങള്‍ക്കും സ്വീകാര്യനാണ് നമ്മുടെ വിദേശകാര്യ മന്ത്രി എസ് ജയശങ്കര്‍, അമേരിക്ക സന്ദര്‍ശനത്തില്‍ അദ്ദേഹത്തിന് ലഭിച്ചത് ഊഷ്മളമായ സ്വീകരണമാണ്. അതുപോലെ തന്നെ കഴിഞ്ഞ ഒക്ടോബറില്‍ അദ്ദേഹം ഓസ്‌ട്രേലിയ സന്ദര്‍ശിച്ചപ്പോഴും ഇതേ സ്വീകാര്യതയാണ് ലഭിച്ചത്.

ഓസ്‌ട്രേലിയയിലെ പഴയ പാര്‍ലമെന്റ് ഹൗസിനെ ത്രിവര്‍ണ നിറങ്ങളാല്‍ അലങ്കരിച്ചാണ് അദ്ദേഹത്തിന് സ്വീകരണം നല്‍കിയത്. കാന്‍ബെറ നല്‍കിയ സ്വീകരണത്തില്‍ അതിയായ സന്തോഷമുണ്ടെന്ന് ജയശങ്കര്‍ ട്വിറ്ററില്‍ പ്രതികരിച്ചിരുന്നു.