തുര്‍ക്കിയിലും സിറിയയിലുമുണ്ടായ ഭൂകമ്പത്തില്‍ മരണം 12,000 കടന്നു. തുര്‍ക്കിയില്‍ കാണാതായവരില്‍ ഒരു ഇന്ത്യക്കാരനും ഉണ്ടെന്ന് സ്ഥിരീകരിച്ചു.ബംഗളൂരു സ്വദേശിയായ ഇയാളുടെ കുടുംബവുമായി ബന്ധപ്പെടാന്‍ ശ്രമിക്കുകയാണെന്നും വിവിധ സ്ഥലങ്ങളില്‍ ഒറ്റപ്പെട്ട നിലയില്‍ കണ്ടെത്തിയ പത്ത് ഇന്ത്യക്കാരെ സുരക്ഷിത താവളത്തിലെത്തിച്ചെന്നും വിദേശ മന്ത്രാലയം .


തകര്‍ന്ന കെട്ടിടങ്ങള്‍ക്കടിയില്‍ നിരവധി കുടുംബങ്ങള്‍ കുടുങ്ങിയിട്ടുണ്ടെന്നും മരണസംഖ്യ ഇനിയും ഉയരുമെന്നും അധികൃതര്‍ അറിയിച്ചു. തകര്‍ന്ന റോഡുകളും കെട്ടിടങ്ങളും മോശം കാലാവസ്ഥയും രക്ഷാപ്രവര്‍ത്തനത്തെ ബാധിക്കുന്നുണ്ട്.

ഇന്ത്യ ഇന്നലെ അയച്ച രണ്ട് രക്ഷാദൗത്യ സംഘങ്ങള്‍ കൂടി വ്യോമസേനാ വിമാനത്തില്‍ തുര്‍ക്കിയിലെത്തി. കഴിഞ്ഞ ദിവസം എത്തിയ രണ്ട് ഇന്ത്യന്‍ സംഘങ്ങള്‍ രക്ഷാപ്രവര്‍ത്തനം തുടരുകയാണ്. ദുരിത മേഖലകളില്‍ ഇന്ത്യന്‍ സംഘം അവശ്യസാധനങ്ങള്‍ വിതരണം ചെയ്യുന്നുണ്ട്. ഓപ്പറേഷന്‍ ദോസ്ത് എന്ന് പേരിട്ട ദൗത്യത്തിന് കൂടുതല്‍ പേരെ നിയോഗിക്കുമെന്ന് ഇന്ത്യ അറിയിച്ചിട്ടുണ്ട്.


തുര്‍ക്കി പ്രസിഡന്റ് റെസെപ് തയ്യിബ് എര്‍ദോഗന്‍ ഇന്നലെ ദുരന്ത പ്രദേശങ്ങള്‍ സന്ദര്‍ശിച്ചു. അതിജീവിച്ചവരെ അതിശൈത്യവും പട്ടിണിയും കൂടുതല്‍ ദുരിതത്തിലാക്കുന്നു.


വിമാനത്താവളങ്ങളുടെ പ്രവര്‍ത്തനം അവതാളത്തിലായതും തകര്‍ന്ന റോഡുകളും രക്ഷാപ്രവര്‍ത്തനത്തിന് തടസ്സമായെന്നും പ്രശ്‌നങ്ങള്‍ പരിഹരിച്ചു വരികയാണെന്നും ആരെയും തെരുവില്‍ ഉപേക്ഷിക്കില്ലെന്നും എന്‍ദോഗാന്‍ അറിയിച്ചു.

ഭൂചലനത്തില്‍ തുറമുഖത്തെ കണ്ടെയ്നറുകള്‍ക്ക് തീപിടിച്ചതിനാല്‍ പ്രവര്‍ത്തനങ്ങള്‍ നിറുത്തിവച്ചു.സിറിയയില്‍ 2650ലേറെ മരണം സ്ഥിരീകരിച്ചിട്ടുണ്ട്. സര്‍ക്കാര്‍ നിയന്ത്രണത്തിലുള്ള പ്രവിശ്യകളില്‍ 1262 പേര്‍ മരിച്ചതായും 2285 പേര്‍ക്ക് പരിക്കേറ്റതായും സിറിയന്‍ ആരോഗ്യമന്ത്രി അറിയിച്ചു.
അതേസമയം ദുരിതം അനുഭവിക്കുന്നവര്‍ക്ക് വേണ്ടി പ്രാര്‍ത്ഥിക്കുന്നതായി ഫ്രാന്‍സിസ് മാര്‍പ്പാപ്പ അറിയിച്ചു. രക്ഷാപ്രവര്‍ത്തനത്തിനും അതിജീവനത്തിനും പിന്തുണ നല്‍കണമെന്ന് അദ്ദേഹം ലോകരാജ്യങ്ങളോട് അഭ്യര്‍ത്ഥിച്ചിരിക്കുകയാണ്.