ബലൂണുകള്‍ കാരണം ലോകത്ത് യുദ്ധമുണ്ടാകുമോ എന്ന ആശങ്കയിലാണ് ജനങ്ങള്‍. ചൈനയും അമേരിക്കയും തമ്മില്‍ ചാര ബലൂണുകളെ ചൊല്ലി വലിയ ബഹളത്തിലാണ്. ഇതിനിടെ ചൈനയും രംഗത്തെത്തി. ചൈനീസ് ചാരബലൂണുകള്‍ വെടിവച്ചിട്ടെന്ന് യുഎസും കാനഡയും അവകാശവാദമുന്നയിക്കുമ്പോള്‍, കഴിഞ്ഞ ഒരു വര്‍ഷത്തിനിടെ 10 തവണയെങ്കിലും യുഎസ് ചാര ബലൂണുകള്‍ വ്യോമ മേഖലയില്‍ പ്രവേശിച്ചിട്ടുണ്ടെന്ന ആരോപണവുമായി ചൈന രംഗത്ത്.

ബൊഹായ് കടലിനോട് ചേര്‍ന്ന് ആകാശത്ത് അജ്ഞാതവസ്തു കണ്ടെത്തിയതായി ചൈന കഴിഞ്ഞ ദിവസം അറിയിച്ചിരുന്നു. ഇതിനിടെയാണ് 2022 ജനുവരി മുതല്‍ ഇതുവരെ 10 തവണ യുഎസ് ചാരബലൂണുകള്‍ ചൈനയുടെ വ്യോമാതിര്‍ത്തിയിലേക്ക് അയച്ചെന്ന ആരോപണം.

യുഎസ് മറ്റു രാജ്യങ്ങളുടെ വ്യോമാതിര്‍ത്തിക്കുള്ളില്‍ അനധികൃതമായി പ്രവേശിക്കുന്നത് അത്ര അസാധാരണമായ കാര്യമൊന്നുമല്ല. കഴിഞ്ഞ വര്‍ഷം മുതല്‍ മാത്രം ഞങ്ങളുടെ അനുമതിയില്ലാതെ യുഎസ് ബലൂണുകള്‍ 10 തവണയെങ്കിലും ചൈനയുടെ വ്യോമാതിര്‍ത്തിക്കുള്ളില്‍ പ്രവേശിച്ചിട്ടുണ്ടെന്ന് ചൈനീസ് വിദേശകാര്യ വക്താവ് വാങ് വെന്‍ബിന്‍ വ്യക്തമാക്കി.

ഇത്തരം സംഭവങ്ങള്‍ ഉണ്ടാകുമ്പോള്‍ അതിനെ ഉത്തരവാദിത്തത്തോടും തികച്ചും പ്രഫഷനലായും കൈകാര്യം ചെയ്യുന്നതാണ് ചൈനയുടെ രീതിയെന്നും, യുഎസിനെ ഉന്നംവച്ച് വാങ് വെന്‍ബിന്‍ വിശദീകരിച്ചു. യുഎസ് ബലൂണുകള്‍ അനധികൃതമായി ചൈനയുടെ വ്യോമാതിര്‍ത്തിക്കുള്ളില്‍ പ്രവേശിക്കുന്നതിന്റെ വിശദാംശങ്ങള്‍ അറിയണമെങ്കില്‍, അവരോടു തന്നെ ചോദിക്കുന്നതാകും ഉചിതമെന്നും വെന്‍ബിന്‍ പറഞ്ഞു.

റിജാവോ നഗരത്തിനു സമീപത്ത് കണ്ടെത്തിയ അജ്ഞാതവസ്തു വെടിവച്ചിടാന്‍ കപ്പലുകളെ വിന്യസിച്ചതായി ചൈനീസ് മാധ്യമങ്ങള്‍ റിപ്പോര്‍ട്ട് ചെയ്തിരുന്നു. കടലില്‍പ്പോയ മീന്‍പിടിത്തക്കാര്‍ക്ക് ജാഗ്രതാ സന്ദേശമയയ്ക്കുകയും ചെയ്തു. വെടിവച്ചു വീഴ്ത്തുന്ന വസ്തു ശ്രദ്ധയില്‍പെട്ടാല്‍ വീണ്ടെടുക്കാന്‍ സഹായിക്കാനും നിര്‍ദേശമുണ്ട്.

അതിനിടെ, കാനഡയുടെ വ്യോമമേഖലയില്‍നിന്നു മൂന്നാമതൊരു ബലൂണ്‍ യുഎസ് സൈന്യം വെള്ളിയാഴ്ച വെടിവച്ചിട്ടു. യുഎസ് വ്യോമസേനയുടെ എഫ്-22 വിമാനം അലാസ്‌കയില്‍ രണ്ടാം ബലൂണ്‍ വെടിവച്ചിട്ടിരുന്നു. തുടര്‍ന്നാണ് ശനിയാഴ്ച കാനഡയ്ക്ക് മുകളില്‍ കണ്ട ബലൂണ്‍ വീഴ്ത്തിയത്. വെള്ളിയാഴ്ച അലാസ്‌കയില്‍ കണ്ട ബലൂണ്‍ 40,000 അടി ഉയരത്തില്‍ പറക്കുകയായിരുന്നു. ഇതു വ്യോമഗതാഗതത്തിനു ഭീഷണിയുയര്‍ത്തിയതിനാലാണു നടപടിയെന്നാണു വൈറ്റ് ഹൗസ് വിശദീകരണം.

വെള്ളിയാഴ്ച വെടിവച്ചിട്ട ബലൂണിന് ഒരു കാറിന്റെ വലുപ്പമാണുണ്ടായിരുന്നതെന്ന് യുഎസ് അധികൃതര്‍ വ്യക്തമാക്കി. കഴിഞ്ഞയാഴ്ച സൗത്ത് കാരലൈന തീരത്ത് വെടിവച്ചിട്ട ചൈനീസ് ബലൂണുമായി ഇതിനു കാര്യമായ വ്യത്യാസങ്ങളുണ്ടെന്നു യുഎസ് സുരക്ഷാ കൗണ്‍സില്‍ വക്താവ് ജോണ്‍ കിര്‍ബി പറഞ്ഞു. ബലൂണില്‍ ആശയവിനിമയ സിഗ്‌നലുകളും മറ്റും ശേഖരിക്കാന്‍ കഴിയുന്ന സാങ്കേതിക ഉപകരണങ്ങള്‍ ഉണ്ടായിരുന്നെന്നും യുഎസ് ആരോപിച്ചു.

അതേസമയം ചൈനയില്‍ യുഎസ് ചാരബലൂണുകള്‍ അയച്ചെന്ന ആരോപണം നിഷേധിച്ച് വൈറ്റ് ഹൗസ്. നിരീക്ഷണം നടത്തുന്നതിനായി ചൈനയുടെ പരിധിയിലേക്ക് ബലൂണ്‍ അയച്ചിട്ടില്ലെന്ന് ദേശീയ സുരക്ഷാ കൗണ്‍സില്‍ വക്താവ് അഡ്രിയെന്‍ വാസ്ടന്‍ ട്വിറ്ററില്‍ അറിയിച്ചു. വിവരങ്ങള്‍ ശേഖരിക്കുന്നതിന് ബലൂണുകള്‍ ഉപയോഗിച്ചത് ചൈനയാണ്. യുഎസിന്റെയും മറ്റ് 40 രാജ്യങ്ങളുടെയും പരമാധികാരത്തെ ലംഘിച്ചാണ് ചൈന ഇത്തരം ഒരു നീക്കം നടത്തിയതെന്നും അദ്ദേഹം പറഞ്ഞു.

ചൈനീസ് ചാരബലൂണുകള്‍ വെടിവച്ചിട്ടെന്ന് യുഎസും കാനഡയും അവകാശവാദമുന്നയിക്കുമ്പോള്‍, കഴിഞ്ഞ ഒരു വര്‍ഷത്തിനിടെ 10 തവണയെങ്കിലും യുഎസ് ചാര ബലൂണുകള്‍ വ്യോമ മേഖലയില്‍ പ്രവേശിച്ചിട്ടുണ്ടെന്ന ആരോപണവുമായി ചൈന രംഗത്തെത്തിയിരുന്നു. ഇതുമറുപടിയായാണ് വൈറ്റ് ഹൗസ് രംഗത്തെത്തിയത്.