ഇരുപത്തിരണ്ടാം വയസ്സില്‍ ആരംഭിച്ച ശീലം എണ്‍പതാം വയസ്സിലും തുടരുന്നു. അമേരിക്കന്‍ സ്വദേശിയായ ജോസഫിന്‍ മിച്ചാലുക്ക് ആണ് ആ 80 കാരി. രക്തദാനം ജീവിതത്തിന്റെ ഭാഗമാക്കിയ ഒരു സ്ത്രീ. ഇപ്പോള്‍ ഗിന്നസ് റെക്കോര്‍ഡ് നേടിയിരിക്കുകയാണ്. 1965ല്‍ 22ാം വയസ്സില്‍ ആരംഭിച്ച് ശീലം അറു പതിറ്റാണ്ടായി ജോസഫിന്‍ തുടര്‍ന്ന് പോരുന്നു.

ജോസഫിന്‍ മിച്ചാലുക്ക് ഇതുവരെ 203 യൂണിറ്റ് രക്തം ദാനം ചെയ്തിട്ടുണ്ട്. ഒരു യൂണിറ്റ് രക്തം ഏകദേശം 473 മില്ലി ലിറ്ററിന് തുല്യമാണ്, അങ്ങനെയെങ്കില്‍ ആകെ 96 ലിറ്റര്‍ രക്തം ജോസഫിന്‍ ദാനം ചെയ്തുവെന്ന് സാരം. എണ്ണമറ്റ ജീവനുകളാണ് ഈ 80 കാരി ഇതുവരെ രക്ഷിച്ചിട്ടുള്ളത്. തന്റെ സഹോദരിയുടെ നിര്‍ബന്ധത്തിന് വഴങ്ങിയാണ് താന്‍ ആദ്യമായി രക്തദാനം നടത്തിയതെന്നാണ് ജോസഫിന്‍ പറയുന്നു.

യുഎസില്‍ രക്തദാനത്തിന് പ്രായപരിധി ഇല്ലാത്തതിനാലും, ആരോഗ്യ പ്രശ്‌നങ്ങള്‍ ഇല്ലാത്തതുകൊണ്ടും 80 വയസിലും ജോസഫിന്‍ രക്തദാനം തുടരുകയാണ്. തന്നെ പോലെ കൂടുതല്‍ ആളുകള്‍ രക്തദാനത്തിലേക്ക് കടന്നുവരുമെന്ന് പ്രതീക്ഷിക്കുന്നതായി ജോസഫിന്‍ പറഞ്ഞു. O+ ആണ് ഇവരുടെ ബ്ലഡ് ഗ്രൂപ്പ്. അമേരിക്കന്‍ റെഡ് ക്രോസിന്റെ കണക്കനുസരിച്ച്, യുഎസ് ജനസംഖ്യയുടെ 37% പേര്‍ക്കും O+ ബ്ലഡ് ഗ്രൂപ്പാണ് ഉള്ളത്.