വിമാന യാത്രയ്ക്കിടെ ബോധക്ഷയം സംഭവിച്ച പതിനൊന്ന് വസുകാരൻ മരിച്ചു. ഉടനടി എമർജൻസി ലാൻഡിങ് നടത്തിയെങ്കിലും 11 വയസുകാരന്റെ ജീവൻ രക്ഷിക്കാനായില്ല. കഴിഞ്ഞ ദിവസം ടർക്കിഷ് എയർലൈസിലായിരുന്നു ദാരുണമായ സംഭവം ഉണ്ടായത്. കുടുംബത്തോടൊപ്പം സഞ്ചരിക്കുകയായിരുന്നു അമേരിക്കക്കാരനായ ഈ കുട്ടി എന്നാണ് ചില റിപ്പോർട്ടുകൾ പറയുന്നത്.

യൂറോപ്പിന് മുകളിലൂടെ പറക്കുമ്പോഴായിരുന്നു ടർക്കിഷ് എയർലൈൻസിൽ യാത്ര ചെയ്യുകയായിരുന്ന ഈ കുട്ടിക്ക് ബോധക്ഷയം സംഭവിച്ചത്.ചില വൈകല്യങ്ങൾ ഉള്ള ഈ കുട്ടിക്ക് വിമാനത്തിനുള്ളിൽ വെച്ചു തന്നെ ജീവനക്കാർ പ്രാഥമിക ശുശ്രൂഷ നൽകിയതായി പ്രാദേശിക മാധ്യമങ്ങൾ പറയുന്നു. ഒപ്പം വിമാനത്തിൽ സഞ്ചരിക്കുകയായിരുന്ന ഒരു ഡോക്ടറും കുട്ടിക്ക് പ്രാഥമിക ശുശ്രൂഷ നൽകിയതായി റിപ്പോർട്ടിൽ പറയുന്നു. പിന്നാലെ ഉടനടി ബുഡാപെസ്റ്റിലെ ഫെറെങ്ക് ലിസ്റ്റ് അന്താരാഷ്ട്ര വിമാനത്താവളത്തിൽ അടിയന്തര ലാൻഡിങ് നടത്തുകയായിരുന്നു.

ഇന്നലെ രാവിലെ 10 30 നായിരുന്നു വിമാനം ബുഡാപെസ്റ്റ് വിമാനത്താവളത്തിൽ ലാൻഡ് ചെയ്തതെന്ന് ദി സൺ റിപ്പോർട്ട് ചെയ്യുന്നു. വിമാനമിറങ്ങിയ ഉടൻ ഓടിയെത്തിയ മെഡിക്കൽ സംഘം സജ്ജമാക്കിയ ആംബുലൻസിൽ കുട്ടിയെ ആശുപത്രിയിലേക്ക് കൊണ്ടുപോയെങ്കിലും കുട്ടിയുടെ ജീവൻ രക്ഷിക്കാനായില്ല. എമർജൻയി ലാൻഡിങ് നടത്തിയ ടർക്കിഷ് എയർലൈസിന്റെ വിമാനം പിന്നീട് ഏറെ വൈകി യാത്ര തുടരുകയായിരുന്നു. കുട്ടിക്ക് ഒപ്പം ഉണ്ടായിരുന്ന കുടുംബാംഗങ്ങൾ ആ വിമാനത്തിൽ തന്നെ യാത്ര തുടർന്നോ എന്ന കാര്യം വ്യക്തമല്ല.