യുഎസിലെ ബാൾട്ടിമോറിലെ ഫ്രാൻസിസ് സ്കോട്ട് കീ പാലത്തിൽ ചരക്ക് കപ്പൽ പാലത്തില്‍ ഇടിച്ച് ഉണ്ടായ അപകടം ലോകത്തെ ഒന്നടങ്കം നടുക്കിയതായിരുന്നു. ശ്രീലങ്കയിലേക്ക് പോവുകയായിരുന്ന സിംഗപ്പൂർ ചരക്ക് കപ്പലായ ദാലി ഫ്രാൻസിസ് സ്കോട്ട് കീ പാലത്തിലിടിക്കുകയായിരുന്നു. പാലത്തിന് മുകളിലൂടെ പോകുന്ന വാഹനങ്ങൾ പടാപ്സ്കോ നദിയിലേക്ക് വീണു.

അമേരിക്ക കണ്ട വലിയൊരു ദുരന്തമായിരുന്നു അത്. ഇന്ത്യക്കാരായ 22 കപ്പൽ ജീവനക്കാരുടെയും സമയോചിത ഇടപെടൽ വലിയ ദുരന്തം ഒഴിവാക്കാൻ സഹായിച്ചെന്നും അമേരിക്കൻ ഗവർണർ വെസ് മൂർ അടക്കമുള്ളവർ പറഞ്ഞ കാര്യമാണ്. എന്നാൽ ഇപ്പോൾ ഇതാ ഇന്ത്യൻ ജീവനക്കാരെ വംശീയമായി അധിക്ഷേപിച്ചിരിക്കുകയാണ്.

യുഎസ് ആസ്ഥാനമായി പ്രവർത്തിക്കുന്ന ഫോക്‌സ്‌ഫോഡ് കോമിക്‌സ് ആണ് ആക്ഷേപമുയർത്തിയിരിക്കുന്നത്. ചരക്കുകപ്പലിടിച്ച് ബാൾട്ടിമോറിലെ പാലം തകർന്ന സംഭവത്തിലാണ് ഇന്ത്യൻ ജീവനക്കാരെ അധിക്ഷേപിച്ചിരിക്കുന്നത് . ലങ്കോട്ടിയിട്ട് അർദ്ധനഗ്നരായി കപ്പലിനുള്ളിൽ നിന്ന് നിലവിളിക്കുന്ന ഇന്ത്യൻ ക്രൂവിന്റെ കാർട്ടൂൺ ചിത്രമാണ് ഇവർ സമൂഹമാദ്ധ്യമങ്ങളിൽ പങ്കുവച്ചിരിക്കുന്നത്‌.

അപകടത്തിന് മുമ്പ് ഡാലി കപ്പലിൽ നിന്നുള്ള അവസാനത്തെ ദൃശ്യങ്ങളും റെക്കോർഡിങ്ങും എന്ന അടിക്കുറിപ്പോടെയാണ് സമൂഹമാദ്ധ്യമങ്ങളിൽ ഫോക്‌സ്‌ഫോഡ് കോമിക്‌സ് കാർട്ടൂൺ പങ്കുവച്ചത്. കപ്പലിനുള്ളിലേക്ക് ചെളി വെള്ളം ഇരച്ചു കയറുമ്പോൾ തലയിൽ കൈവച്ച് നിലവിളിക്കുന്ന ഇന്ത്യക്കാരാണ് കാർട്ടൂണിലുള്ളത്.കാർട്ടൂണിനെതിരെ വ്യാപക വിമർശനമാണുയരുന്നത് .