2023ല്‍ വെസ്റ്റ് ബാങ്കില്‍ നടന്ന ആക്രമണത്തില്‍ പങ്കുണ്ടെന്ന് ആരോപിച്ച് അറസ്റ്റ് ചെയ്ത പലസ്തീന്‍ കുട്ടിക്ക് 18 വര്‍ഷം തടവ് ശിക്ഷ വിധിച്ച് ഇസ്രയേല്‍ കോടതി. 15 വയസ്സുകാരനായ പലസ്തീനി ബാലനാണ് 18 വര്‍ഷം തടവ് ശിക്ഷ വിധിച്ചത്. 15കാരനായ മുഹമ്മദ് ബാസില്‍ സല്‍ബാനിയെ ജറൂസലേം ജില്ല കോടതി ശിക്ഷിച്ചത്. കൂടാതെ 300,000 ഷെക്കല്‍ (72.31 ലക്ഷം ഇന്ത്യന്‍ രൂപ) പിഴയും ശിക്ഷയിലുണ്ട്.

13ാം വയസ്സിലാണ് മുഹമ്മദ് ബാസില്‍ സല്‍ബാനിയെ ഇസ്രയേല്‍ അറസ്റ്റ് ചെയ്തത്. ശേഷം രണ്ട് വര്‍ഷം തടവിലിട്ടാണ് കോടതി വിചാരണ പൂര്‍ത്തിയാക്കിയത്. ജറുസലേമിന് കിഴക്കുള്ള ഷുഫാത്ത് അഭയാര്‍ഥി ക്യാമ്പിലാണ് മുഹമ്മദ് ബാസില്‍ സല്‍ബാനിയും കുടുംബവും കഴിഞ്ഞിരുന്നത്. ഇസ്രയേല്‍ അധിനിവേശ സൈന്യത്തിന്റെ ആക്രമണത്തെ ചെറുത്തുവെന്ന പേരില്‍ 2023 ഫെബ്രുവരി 13 നാണ് സല്‍ബാനിയെ ഇസ്രയേല്‍ പൊലീസ് അറസ്റ്റ് ചെയ്തത്. പിന്നാലെ കുട്ടിയുടെ കുടുംബത്തിന്റെ വീടും ഇസ്രയേല്‍ തകര്‍ത്തതായി പലസ്തീനിയന്‍ പ്രിസണര്‍ സൊസൈറ്റി പ്രസ്താവനയില്‍ പറഞ്ഞിരുന്നു. 2023ല്‍ ഷുഫാത്ത് ക്യാമ്പിലെ ചെക്ക് പോയിന്റില്‍ ഇസ്രായേലി സൈനികന്‍ കൊല്ലപ്പെട്ട കേസിലാണ് സല്‍ബാനിയെ പ്രതി ചേര്‍ത്തത്.

1,115 കുട്ടികള്‍ ഉള്‍പ്പെടെ കുറഞ്ഞത് 14,500 പലസ്തീനികള്‍ നിലവില്‍ ഇസ്രയേല്‍ ജയിലുകളില്‍ കഴിയുന്നുണ്ടെന്ന് സൊസൈറ്റി പുറത്ത് വിട്ട കണക്കുകള്‍ വ്യക്തമാക്കുന്നു. 2023 ഒക്ടോബര്‍ 7 ന് ഗാസ വംശഹത്യ ആരംഭിച്ചശേഷം ഇസ്രയേല്‍ സൈന്യത്തിന്റെയും അനധികൃത ജൂത കുടിയേറ്റക്കാരുടെയും ആക്രമണങ്ങളില്‍ കുറഞ്ഞത് 915 പലസ്തീനികള്‍ വെസ്റ്റ് ബാങ്കില്‍ മാത്രം കൊല്ലപ്പെട്ടു. 7,000 ത്തോളം പേര്‍ക്ക് പരിക്കേറ്റതായും ആരോഗ്യ മന്ത്രാലയം അറിയിച്ചു.