അമേരിക്കയിലെ കാത്തലിക് സ്‌കൂളില്‍ യുവാവ് നടത്തിയ വെടിവയ്പില്‍ രണ്ട് കുട്ടികള്‍ കൊല്ലപ്പെട്ടു. 20 പേര്‍ക്ക് പരിക്കേറ്റു. പരിക്കേറ്റവരില്‍ ഭൂരിപക്ഷവും കുട്ടികളാണ്. മിനിയാപൊളിസിലെ അനന്‍സിയേഷന്‍ കാത്തലിക് സ്‌കൂളില്‍ രാവിലെ 8.45നാണ് വെടിവയ്പുണ്ടായത്. ആക്രമണം നടത്തിയ യുവാവ് സ്വയം വെടിവച്ച് ജീവനൊടുക്കിയെന്ന് മിനിയാപൊളിസ് പൊലീസ് അറിയിച്ചു. കിന്റര്‍ഗാര്‍ട്ടന്‍ മുതല്‍ എട്ടാംഗ്രേഡ് വരെയുള്ള കുട്ടികള്‍ പഠിക്കുന്ന സ്‌കൂളിലാണ് ആക്രമണം ഉണ്ടായത്. യുവാവ് ജനാലകള്‍ വഴി കുട്ടികള്‍ക്ക് നേരെ വെടിയുതിര്‍ക്കുകയായിരുന്നു. ക്ലാസ് തുടങ്ങുന്നതിന് മുമ്പ് കുട്ടികള്‍ പള്ളിയില്‍ പ്രാര്‍ത്ഥനയില്‍ പങ്കെടുക്കുമ്പോഴാണ് അക്രമി വെടിവച്ചതെന്നാണ് വിവരം.