ബ്രിട്ടിഷ് സൈനിക താവളങ്ങള് ഉപയോഗിക്കാനുള്ള അമേരിക്കയുടെ അഭ്യര്ഥന രാജ്യം അംഗീകരിച്ചതായി ബ്രിട്ടിഷ് പ്രധാനമന്ത്രി
ഇറാന്റെ മിസൈല് ശേഖരണ കേന്ദ്രങ്ങള്ക്കും ലോഞ്ചറുകള്ക്കും എതിരായ പ്രതിരോധ ആക്രമണങ്ങള്ക്കായി ബ്രിട്ടിഷ് സൈനിക താവളങ്ങള് ഉപയോഗിക്കാനുള്ള അമേരിക്കയുടെ അഭ്യര്ഥന രാജ്യം അംഗീകരിച്ചതായി ബ്രിട്ടിഷ് പ്രധാനമന്ത്രി കിയ സ്റ്റാമര്. മേഖലയിലുടനീളം ഇറാന് മിസൈലുകള് തൊടുക്കുന്നത് തടയുക എന്ന പരിമിതമായ പ്രതിരോധ ലക്ഷ്യത്തോടെയാണ് യുഎസിന് താവളങ്ങള് ഉപയോഗിക്കാന് അനുമതി നല്കിയതെന്ന് എക്സിലെ വിഡിയോ സന്ദേശത്തില് അദ്ദേഹം പറഞ്ഞു.
ശനിയാഴ്ച ഇറാന്റെ പരമോന്നത നേതാവ് ആയത്തുല്ല അലി ഖമനയി കൊല്ലപ്പെട്ട യുഎസ്ഇസ്രയേല് സംയുക്ത വ്യോമാക്രമണത്തില് ബ്രിട്ടന് പങ്കെടുത്തിട്ടില്ലെന്നും ഇനി നടക്കാനിരിക്കുന്ന ആക്രമണങ്ങളില് പങ്കുചേരില്ലെന്നും അദ്ദേഹം പറഞ്ഞു. ഇറാന്റെ പ്രത്യാക്രമണങ്ങള് ബ്രിട്ടിഷ് പൗരന്മാര് താമസിക്കുന്ന ഹോട്ടലുകളിലും വിമാനത്താവളങ്ങളിലും പതിച്ചതായും ഇത് ബ്രിട്ടിഷ് പൗരന്മാരെ വലിയ അപകടത്തിലാക്കിയതായും കിയ സ്റ്റാമര് ചൂണ്ടിക്കാട്ടി.
ബ്രിട്ടിഷ് യുദ്ധവിമാനങ്ങള് നിലവില് പ്രതിരോധ പ്രവര്ത്തനങ്ങളില് ഏര്പ്പെടുന്നുണ്ടെന്നും മിസൈലുകള് വിക്ഷേപിക്കുന്നതിനു മുമ്പ് അവയുടെ ഉറവിടത്തില് തന്നെ നശിപ്പിക്കുക എന്നതാണ് ഭീഷണി ഒഴിവാക്കാനുള്ള ഏക മാര്ഗമെന്നും അദ്ദേഹം പറഞ്ഞു. രാജ്യാന്തര നിയമങ്ങള്ക്കനുസൃതമായി സുഹൃദ് രാജ്യങ്ങളുടെയും സഖ്യകക്ഷികളുടെയും കൂട്ടായ പ്രതിരോധത്തിനായാണ് ഈ തീരുമാനമെടുത്തതെന്നും കിയ സ്റ്റാമര് വ്യക്തമാക്കി.
https://www.facebook.com/Malayalivartha
