ഫിലിപ്പീന്‍സില്‍ ഹയാന്‍ ചുഴലിക്കൊടുങ്കാറ്റില്‍ പതിനായിരത്തോളം പേര്‍ മരിച്ചു. ലക്ഷക്കണക്കിനു കെട്ടിടങ്ങളും ഭവനങ്ങളും തകര്‍ന്നു. 4,80,000 പേരെ സുരക്ഷിതസ്ഥാനങ്ങളിലേക്കു മാറ്റിയിട്ടുണ്ട്‌ 36 പ്രവിശ്യകളിലെ 45 ലക്ഷം പേരെ ചുഴലിക്കൊടുങ്കാറ്റ്‌ ബാധിച്ചു. ഫിലിപ്പീന്‍സിന്റെ ചരിത്രത്തിലെ ഏറ്റവും വലിയ പ്രകൃതിക്ഷോഭമാണിത്‌.

കൊടുങ്കാറ്റിന്റെ ശക്തിയില്‍ ബഹുനിലക്കെട്ടിടങ്ങള്‍ പലതും നിലംപൊത്തി. വൈദ്യുതിവിതരണം, വാര്‍ത്താവിനിമയ സംവിധാനം എന്നിവ തടസ്സപ്പെട്ടു. വൈദ്യുതി വിതരണ സംവിധാനം പൂര്‍ണമായും തകരാറിലായതിനെത്തുടര്‍ന്ന് രാജ്യം ഇരുട്ടിലായിരിക്കുകയാണ്. ടാക്ലോബാന്‍ വിമാനത്താവളത്തിലെ റണ്‍വേ തകര്‍ന്നതിനെത്തുടര്‍ന്ന് സഹായമെത്തിക്കാനുള്ള രക്ഷാപ്രവര്‍ത്തകരുടെ ശ്രമം ഇതുവരെ വിജയം കണ്ടിട്ടില്ല.

കനത്ത മഴയെത്തുടര്‍ന്ന് പലയിടങ്ങലിലും വെള്ളപ്പൊക്കവും മണ്ണിടിച്ചിലുമുണ്ടായി. റോഡുകള്‍ മുഴുവന്‍ വെള്ളത്തിനടിയിലാണ്. കൊടുങ്കാറ്റിനെ തുടര്‍ന്ന് രാജ്യത്തെ വിമാനത്താവളങ്ങള്‍ അടച്ചിട്ടിരിക്കുകയാണ്. മണിക്കൂറില്‍ 275 കിലോമീറ്റര്‍ വേഗതയില്‍ വീശിയടിച്ച കൊടുങ്കാറ്റ് സമര്‍, ലെയ്റ്റ്, ബൊഹോള്‍, സെബു, ഇലോയ്‌ലോ എന്നിവിടങ്ങളിലാണ് കൂടുതല്‍ നാശം വിതച്ചത്. സൈന്യത്തിന്റെ രക്ഷാപ്രവര്‍ത്തനങ്ങള്‍ തുടരുകയാണ്‌. 2011ല്‍ 1200 പേര്‍ മരിക്കാനിടയായ ബൊഫാ ചുഴലിക്കൊടുങ്കാറ്റിനു ശേഷമുണ്ടായ ശക്തിയേറിയ കൊടുങ്കാറ്റാണ് ഹയാന്‍.