ദാവൂദ് ഇബ്രാഹിമിന്റെ അനന്തിരവന്റെ ആഡംബരവിവാഹം മുംബൈയില്‍; അധോലോക നായകന് പാകിസ്താനിലിരുന്ന് തത്സമയം കാണാന്‍ ലൈവ് സംപ്രേക്ഷണവും
അധോലോക നായകന് ദാവൂദ് ഇബ്രാഹിമിന്റെ സഹോദരിയുടെ മകന്റെ വിവാഹം ബുധനാഴ്ച മുംബൈയില്‍ നടക്കും. വിവാഹചടങ്ങുകള്‍ തത്സമയം പാകിസ്താനിലിരുന്ന് ദാവൂദിന് കാണാന്‍ പ്രത്യേക സൗകര്യമൊരുക്കും. ദാവൂദിന്റെ സഹോദരി ഹസീന പര്‍ക്കാറിന്റെ മകന്‍ അലിഷാ പര്‍ക്കാറിന്റെ ആഡംബരവിവാഹമാണ് മുംബൈയില്‍ നടക്കുക. വിവാഹചടങ്ങുകള്‍ തത്സമയം സ്‌കൈപ്പിലൂടെ ദാവൂദും സഹായികളും കാണും. അതേസമയം വിവാഹചടങ്ങുകള്‍ കര്‍ശനമായ നിരീക്ഷണത്തിലായിരിക്കുമെന്ന് മുംബൈ ക്രൈംബ്രാഞ്ച് അറിയിക്കുന്നു.
തെക്കന്‍ മുംബൈയിലെ റസൂല്‍ മോസ്‌കില്‍വച്ചാണ് അലിഷായുടെ നിക്കാഹ് നടക്കുക. ജുഹുവിലെ പഞ്ചനക്ഷത്ര ഹോട്ടലായ ടുലിപ്പിലാണ് സല്‍ക്കാരച്ചടങ്ങുകള്‍ ഏര്‍പ്പെടുത്തിയിരിക്കുന്നത്. മേമന്‍ വിഭാഗത്തില്‍പ്പെട്ട കുടുംബത്തിലെ അയേഷ നഗാനിയാണ് വധു. ഇരുവരും പ്രണയത്തിലായിരുന്നുവെന്നും റിപ്പോര്‍ട്ടുണ്ട്.
വിവാഹം ഗംഭീരമാക്കാനുള്ള എല്ലാ തയ്യാറെടുപ്പുകളും ദാവൂദ് തന്റെ അനുയായികള്‍ മുഖേന പൂര്‍ത്തിയാക്കിയിട്ടുണ്ടെന്നാണ് സൂചന. വിവാഹം കര്‍ശനമായ നിരീക്ഷിക്കാന്‍ മുംബൈ ക്രൈംബ്രാഞ്ചും തയ്യാറെടുത്തിട്ടുണ്ട്. വിവാഹത്തിനെത്തുന്ന അതിഥികളെയും ദാവൂദിന്റെ സഹായികളെയും നിരീക്ഷിക്കാനും നീക്കമുണ്ട്.
ദാവൂദിന്റെ എതിര്‍വിഭാഗത്തില്‍പ്പെട്ടവര്‍ വിവാഹച്ചടങ്ങുകള്‍ അലങ്കോലപ്പെടുത്തിയേക്കുമോ എന്ന ആശങ്കയുമുണ്ട്. ഇതിനാല്‍, ശക്തമായ പോലീസ് കാവലിലാകും ചടങ്ങുകള്‍ നടക്കുക. ദാവൂദിന്റെ സഹോദരന്‍ ഇക്ബാല്‍ കസ്‌കര്‍, സഹോദരിമാരായ സൈതൂണ്‍, എന്നിവരും വിവാഹത്തില്‍ പങ്കെടുക്കുമെന്നാണ് അറിയുന്നത്.
2015ല്‍ മരിച്ച സഹോദരി ഹസീനയുടെ മകന്റെ വിവാഹം ആഡംബര പൂര്‍വം ദാവൂദ് നടത്തുമെന്നാണ് അടുത്ത കേന്ദ്രങ്ങള്‍ നല്‍കുന്ന സൂചന. ഹസീനയുടെ മൂത്തമകന്‍ ഡാനിഷ് 2006ല്‍ ഒരു റോഡപകടത്തില്‍ മരണപ്പെട്ടിരുന്നു. ഹസീന മരിച്ചതിന് തൊട്ടുപിന്നാലെ മകള്‍ ഉമെയ്‌റയുടെ വിവാഹം ലളിതമായാണ് നടത്തിയത്.
https://www.facebook.com/Malayalivartha
