സാഹിത്യ നൊബേല് കിട്ടിയ കാര്യം ബോബിനെ എങ്ങനെ അറിയിക്കും? വിളിച്ച് മടുത്തെന്ന് നൊബേല് കമ്മിറ്റി
നാട്ടാരെല്ലാം വിശേഷം അറിഞ്ഞു. എന്നിട്ട് താങ്കള് എന്താ മിണ്ടാട്ടേ. താങ്കള്ക്കാണ് നോബേല്. റോക്ക് ഇതിഹാസം ബോബ് ഡിലന് 2016ലെ സാഹിത്യത്തിനുള്ള നൊബേല് പുരസ്കാരം ലഭിച്ചത് ഏവരേയും പ്രത്യേകിച്ച് എഴുത്തുകാരേയും സ്തംഭരാക്കിയിരുന്നു. മഹത്തായ അമേരിക്കന് സാംഗീത പാരമ്പര്യത്തില് കാവ്യാത്മകമായ പ്രകടനങ്ങള് നടത്തിയതിനായിരുന്നു പുരസ്കാരം. എന്നാല് പുരസ്കാരം ലഭിച്ച കാര്യം ബോബിനെ നേരിട്ട് അറിയിക്കാന് നൊബേല് കമ്മിറ്റിയ്ക്ക് ഇതുവരെ സാധിച്ചിട്ടില്ല. നിരവധി തവണ ഫോണില് ബന്ധപ്പെടാന് ശ്രമിച്ചു. ബോബിനെ മാത്രം കിട്ടിയില്ല. ഒടുവില് ആ ശ്രമം അവസാനിപ്പിച്ചുവെന്ന് പറഞ്ഞിരിക്കുകയാണ് നൊബേല് കമ്മിറ്റി.
ഇപ്പോള് ഞങ്ങള് ഒന്നുംതന്നെ ചെയ്യുന്നില്ല. ഞാന് അദ്ദേഹത്തിന്റെ അടുത്ത അനുയായിയെ ഫോണില് ബന്ധപ്പെട്ടു. ഇമെയിലും അയച്ചു. അത് തന്നെ ധാരാളം.
സാറാ ഡാനിയസ്, സ്വീഡിഷ് അക്കാദമി സ്ഥിരം സെക്രട്ടറി
സാഹിത്യ നൊബേല് ലഭിച്ചതിനെ കുറിച്ച് ബോബ് ഡിലന് ഇതുവരെ ഒരക്ഷരം സംസാരിച്ചിട്ടില്ല. നൊബേല് പ്രഖ്യാപിച്ച ദിവസം ലാസ് വേഗാസില് അദ്ദേഹം ഒരു സംഗീത മേള നടത്തിയിരുന്നു. എന്നാല് പുരസ്കാര നേട്ടത്തെക്കുറിച്ച് ഒന്നും പറഞ്ഞിരുന്നില്ല.
ബോബ് ഡിലനെ ബന്ധപ്പെടാന് കഴിയാത്തതില് വിഷമമില്ലെന്നും അദ്ദേഹം പ്രത്യക്ഷനാകുമെന്നാണ് പ്രതീക്ഷിക്കുന്നെന്നും സാറാ ഡാനിയസ് പ്രതികരിച്ചു.
ഡിസംബര് പത്തിനാണ് നൊബേല് പുരസ്കാര ദാന ചടങ്ങ്. ഔദ്യോഗിക വിരുന്നില് നൊബേല് പുരസ്കാര ജേതാക്കളുടെ പ്രസംഗവും ഉണ്ടാകാറുണ്ട്. ചടങ്ങിലേക്ക് ക്ഷണിക്കാന് കൂടിയാണ് നൊബേല് കമ്മിറ്റി ബോബ് ഡിലനെ ബന്ധപ്പെട്ടത്.
പുരസ്കാരം ഏറ്റുവാങ്ങാന് ബോബ് ഡിലന് എത്തുമോയെന്ന കാര്യത്തിലും സ്വീഡിഷ് അക്കാദമിക്ക് തീര്ച്ചയില്ല.
വരാന് ആഗ്രഹിക്കുന്നില്ലെങ്കില് അദ്ദേഹം വരില്ല. എന്തായാലും ഇതൊരു വലിയ ചടങ്ങാണ്. അദ്ദേഹത്തിനാണ് ആദരവ് ലഭിക്കാന് പോകുന്നത്.
സാറാ ഡാനിയസ്
സാഹിത്യത്തില് നൊബേല് പുരസ്കാരം സ്വന്തമാക്കുന്ന ആദ്യ ഗാനരചയിതാവാണ് 75കാരനായ ബോബ് ഡിലന്. ഇംഗ്ലീഷ് പാരമ്പര്യത്തിലെ മഹാനായ കവിയെന്നാണ് നൊബേല് പുരസ്കാര കമ്മിറ്റി ബോബ് ഡിലനെ വിശേഷിപ്പിച്ചിരുന്നത്. റോബര്ട്ട് അലന് സിമ്മര്മാന് എന്നാണ് ബോബ് ഡിലന്റെ യഥാര്ത്ഥ പേര്. ജനിച്ചത് 1941ലും. ബ്ലോവിങ് ഇന് ദി വിന്ഡ്, ദി ടൈംസ് ദെ ആര് ചെയ്ഞ്ചിങ് എന്നീ ബോബിന്റെ ഗാനങ്ങള് ഏറെ പ്രശസ്തമാണ്. ഗ്രാമി, ഗോള്ഡന് ഗ്ലോബ്, ഓസ്കാര്, പുലിസ്റ്റര് എന്നീ ലോക പ്രശസ്ത പുരസ്കാരങ്ങളും ബോബിന് ലഭിച്ചിട്ടുണ്ട്.
https://www.facebook.com/Malayalivartha
