ഒക്‌ടോബര്‍ മാസത്തെ ഹിന്ദു ഹെറിറ്റേജ് മാസമായി പ്രഖ്യാപിക്കാനുദ്ദേശിച്ചു കൊണ്ടുള്ള ഒരു ബില്‍ കാനഡയിലെ ഒന്റേറിയോ പ്രവിശ്യയുടെ പ്രൊവിന്‍ഷ്യല്‍ അസംബ്ലിയില്‍ അവതരിപ്പിക്കുന്നു. ഏകദേശം 7 ലക്ഷത്തോളം ഇന്ത്യന്‍ വംശജര്‍ ഒന്റേറിയോയിലുണ്ട്.

ഹൈന്ദവരായ ഇന്‍ഡോ- കനേഡിയന്‍ വംശജര്‍ ഒന്റേറിയോയുടെ സാമൂഹ്യ സാമ്പത്തിക രാഷ്ട്രീയ സാംസ്‌കാരിക മതപരമായ എല്ലാ മേഖലകളിലേയും പുരോഗതിയ്ക്ക് ഊടും പാവും നെയ്യുന്നതിനായി നല്‍കിയിട്ടുള്ള സംഭാവനകളെ അംഗീകരിക്കുന്നതിനാണ് ഇത്തരമൊരു ബില്‍ കൊണ്ടു വരുന്നതെന്ന് ബില്‍ അവതരിപ്പിച്ചുകൊണ്ട് പ്രൊവിന്‍ഷ്യല്‍ പാര്‍ലമെന്റ് അംഗമായ ജോ ഡിക്‌സണ്‍ പറഞ്ഞു.

ഇരുപതാം നൂറ്റാണ്ടിന്റെ തുടക്കത്തിലാണ് ഹിന്ദു വംശജരായ ആദ്യ കുടിയേറ്റക്കാര്‍ കാനഡയിലെത്തിയതെന്നാണ് കരുതപ്പെടുന്നതെന്ന് ഡിക്‌സണ്‍ പറഞ്ഞു. അതിനു ശേഷം രാജ്യത്തിന്റെ ശാസ്ത്രരംഗം, വിദ്യാഭ്യാസം, ആരോഗ്യ രംഗം, നിയമം, രാഷ്ട്രീയം, വ്യവസായം, സാംസ്‌കാരികം, കായികം എന്നിങ്ങനെ എല്ലാ രംഗത്തും തങ്ങളുടേതായ വ്യക്തി മുദ്ര പതിപ്പിക്കാന്‍ അവര്‍ക്കായിട്ടുണ്ടെന്ന് അദ്ദേഹം എടുത്തു പറഞ്ഞു.

ജീവിക്കാന്‍ ഏറ്റവും അനുകൂലമായ സാഹചര്യങ്ങളുള്ള ഒരു പ്രദേശമായി ഒന്റേറിയോയെ മാറ്റിയതില്‍ ഇവിടത്തെ ഹൈന്ദവ സമൂഹത്തിന് വലിയ ഒരു പങ്കുണ്ടെന്ന് അദ്ദേഹം പറഞ്ഞു. ഹൈന്ദവ സമൂഹത്തിന്റെ പുരോഗതിയോടൊപ്പം ഒന്റേറിയോയുടെ മുന്നേറ്റത്തിനും അവര്‍ സഹായകമായിരുന്നുവെന്ന വസ്തുത അഭിമാനത്തോടെയാണ് ഓര്‍ക്കുന്നതെന്ന് അദ്ദേഹം വെളിപ്പെടുത്തി.

ഹൈന്ദവ സമുദായക്കാര്‍ക്കിടയില്‍ ഒക്‌ടോബര്‍ മാസത്തിന് പ്രത്യേക പ്രാധാന്യം ഉണ്ടെന്ന് മനസ്സിലായിട്ടുണ്ടെന്ന് ഡിക്‌സണ്‍ പറഞ്ഞു.

അവരുടെ മൂന്നു ഉത്സവങ്ങളാണ് ഒക്‌ടോബര്‍ മാസത്തിലെത്തുന്നതെന്ന് അദ്ദേഹം എടുത്തു പറഞ്ഞു. നവരാത്രി, ദൂര്‍ഗ്ഗാപൂജ, ദീപാവലി എന്നിവയാണ് ആ ആഘോഷങ്ങളെന്ന് അദ്ദേഹം അനുസ്മരിച്ചു. തന്മൂലം ഈ മാസത്തെ ഹിന്ദു ഹെറിറ്റേജ് മാസമായി ആചരിക്കുകയാണെങ്കില്‍ കാനഡയിലെ ഹൈന്ദവ വംശജര്‍ രാജ്യ പുരോഗതിക്കായി നല്‍കിയിട്ടുള്ള സേവനങ്ങളെ ഓര്‍ക്കുവാനും പുതു തലമുറയ്ക്കു പറഞ്ഞു കൊടുക്കുവാനും കഴിയുമെന്നും അദ്ദേഹം പ്രത്യാശിച്ചു.

അടുത്തിടെയാണ് ഒന്റേറിയോ അസംബ്ലി, ഒക്‌ടോബര്‍ മാസത്തെ ഇസ്ലാമിക് ഹെറിറ്റേജ് മാസമായി പ്രഖ്യാപിച്ചതെന്നതും കൗതുകകരമായ വസ്തുതയാണ്. ഒന്റേറിയോയില്‍ വളരെ മുമ്പേ തന്നെ ഏപ്രില്‍ മാസത്തെ സിഖ് ഹെറിറ്റേജ് മാസമായി പ്രഖ്യാപിച്ചിട്ടുണ്ട്. ഈ മാസത്തിന്റെ തുടക്കത്തിലാണ് കാനഡയിലെ തമിഴ് വംശജര്‍ക്ക് പ്രത്യേക അംഗീകാരം നല്‍കി കൊണ്ട് ജനുവരി മാസം കാനഡയിലുടനീളം തമിഴ് ഹെറിറ്റേജ് മാസമായി ആചരിക്കുമെന്ന് പ്രഖ്യാപിച്ചത്.

ഏകദേശം 1.2 ദശലക്ഷം ഇന്‍ഡോ കനേഡിയന്‍ വംശജര്‍ രാജ്യത്തുണ്ടെന്നാണ് കണക്കാക്കപ്പെടുന്നത്.