പിടിയിലായ രണ്ട് തുര്‍ക്കി സൈനികരെ ജീവനോടെ കത്തിക്കുന്ന വീഡിയോ ഭീകരസംഘടനയായ ഇസ്ലാമിക് സ്‌റ്റേറ്റ് (ഐഎസ്) പുറത്തുവിട്ടു. ഇരുമ്പുകൂട്ടില്‍നിന്ന് യൂണിഫോം ധരിച്ച രണ്ടുപേരെ കൊണ്ടുവരുന്നതും പിന്നീട് ഇവരെ ജീവനോടെ കത്തിക്കുന്നതും ജിഹാദി വെബ്‌സൈറ്റുകളില്‍ പ്രസിദ്ധപ്പെടുത്തിയ 19 മിനിറ്റുള്ള വിഡിയോയില്‍ കാണാം. വടക്കന്‍ സിറിയയിലെ അലെപ്പോ പ്രവിശ്യയിലാണു സംഭവം നടന്നതെന്നു കരുതുന്നു.

തുര്‍ക്കിഷ് ഭാഷയില്‍ സംസാരിക്കുന്ന കൊലയാളി തുര്‍ക്കി പ്രസിഡന്റ് തയിപ് എര്‍ദോഗനെ രൂക്ഷമായ ഭാഷയില്‍ വിമര്‍ശിക്കുന്നുമുണ്ട്. തുര്‍ക്കിയില്‍ നാശത്തിന്റെ വിത്തുപാകാനും ഇയാള്‍ ആഹ്വാനം ചെയ്യുന്നു. കഴിഞ്ഞമാസം രണ്ട് തുര്‍ക്കി സൈനികരെ പിടികൂടിയതായി ഐഎസ് അനുകൂല വാര്‍ത്താ ഏജന്‍സിയായ അമാഖ് അറിയിച്ചിരുന്നു.

തുര്‍ക്കി സൈന്യവും രണ്ടു സൈനികരുമായുള്ള ബന്ധം നഷ്ടപ്പെട്ടതായി വ്യക്തമാക്കിയിരുന്നു. അങ്കാറയില്‍ 16 തുര്‍ക്കി സൈനികരെ ഐഎസ് ഭീകരര്‍ കൊലപ്പെടുത്തി ഒരു ദിവസത്തിനുശേഷമാണ് ഈ വിഡിയോ പുറത്തുവന്നത്. നേരത്തേ, ജോര്‍ദാന്‍ യുദ്ധവിമാന പൈലറ്റ് മാസ് അല്‍ കസാസ്‌ബെയെയും ഐഎസ് ഭീകരര്‍ ജീവനോടെ കത്തിക്കുകയായിരുന്നു.