ട്രംപ് ഫൗണ്ടേഷന്‍ പൂട്ടാമെന്ന് നിയുക്ത അമേരിക്കന്‍ പ്രസിഡന്റ് ഡൊണാള്‍ഡ് ട്രംപ്. ഫൗണ്ടേഷന്റെ പ്രവര്‍ത്തനം ക്രമവിരുദ്ധമെന്ന് കണ്ടെത്തിയതിനെ തുടര്‍ന്നാണ് ട്രംപിന്റെ പ്രഖ്യാപനം. എന്നാല്‍, അന്വേഷണം നടക്കുന്ന സാഹചര്യത്തില്‍ ഫൗണ്ടേഷനെ പൂട്ടി അതില്‍നിന്ന് ഒഴിവാകാനാകില്ലെന്ന് ന്യൂയോര്‍ക്ക് അറ്റോണി ജനറല്‍ വ്യക്തമാക്കി.

ഫൗണ്ടേഷന്റെ പ്രവര്‍ത്തനങ്ങളിലെ വീഴ്ചയാണ് ന്യൂയോര്‍ക്ക് അറ്റോണി ജനറല്‍ പരിശോധിക്കുന്നത്. ഇതിനിടയിലാണ് ഫൗണ്ടേഷന്റെ പ്രവര്‍ത്തനം അവസാനിപ്പിക്കാമെന്ന പ്രഖ്യാപനം ട്രംപ് നടത്തിയത്. ഫൗണ്ടേഷന്‍ ഇതിനകം നിരവധി സേവന പ്രവര്‍ത്തനങ്ങള്‍ നടത്തിയിട്ടുണ്ട്. ലക്ഷക്കണക്കിന് ഡോളറിന്റെ സഹായമാണ് ചെയ്തത്. മുതിര്‍ന്ന പൗരന്മാര്‍ക്കും കുട്ടികള്‍ക്കുമുള്ള സഹായം ചെയ്തുകൊടുക്കാറുണ്ട്. പ്രസിഡന്റായി തെരഞ്ഞെടുക്കപ്പെട്ടതിനാല്‍ വിരുദ്ധ താല്‍പര്യം ഉണ്ടാകാതിരിക്കാന്‍ ഫൗണ്ടേഷന്‍ പൂട്ടുകയാണ്.

ട്രംപ് ഫൗണ്ടേഷന്‍ ക്രമവിരുദ്ധമായി പ്രവര്‍ത്തിച്ചുവെന്ന അറ്റോണിയുടെ കണ്ടെത്തലുകള്‍ ട്രംപ് നിഷേധിച്ചു. സെപ്തംബറില്‍ ന്യൂയോര്‍ക്ക് അറ്റോര്‍ണി എറിക് ഷെന്‍ഡര്‍മാന്‍ ഫൗണ്ടേഷന്റെ പ്രവര്‍ത്തനം ക്രമവിരുദ്ധമാണെന്ന് ചൂണ്ടിക്കാണിച്ചതോടെയാണ് ഫൗണ്ടേഷന്‍ വിവാദത്തിലായത്.