കെപിസിസിയ്‌ക്ക്‌ പുതിയ അദ്ധ്യക്ഷനെ കൊണ്ടുവരുന്നതിലും സമവായത്തിലെത്താൻ കഴിഞ്ഞിട്ടില്ല. ആരുടെ അടുപ്പക്കാരൻ വേണമെന്നതിലാണ്‌ തർക്കം. ഭരണത്തിൽ ഇടപെടാൻ ശേഷിയുള്ള ഒരാൾ വരരുതെന്ന്‌ സതീശൻ ശഠിക്കുന്നു. ഇതിനിടെ, തൂഫാന്റെ പേരിൽ സതീശന്‌ പണികൊടുക്കാൻ ചെന്നിത്തല എംഡിഎംഎ കേസിൽ മുഹമ്മദ്‌ ഹുസൈനെ പിടിച്ചതും തമ്മിലടിയ്ക്ക്‌ ചൂടുപകർന്നു. അതോടെ തൂഫാന്റെ കാറ്റുപോയെങ്കിലും സംഭവം സതീശന്‌ വലിയ ക്ഷീണമായി.

ഇതെല്ലാം ഒന്നടങ്ങി, ഒന്നു ഭരിച്ചു തുടങ്ങാൻ സാഹചര്യം ഒരുങ്ങിയെന്ന്‌ കരുതിയപ്പോഴാണ്‌ ബുധനാഴ്‌ച യുഡിഎഫ്‌ കൺവീനറുടെ അസാധാരണ വാർത്താസമ്മേളനം. അതും കെപിസിസി ആസ്ഥാനത്ത്‌. മറ്റാരുടെയെങ്കിലും പിന്തുണയില്ലാതെ അടൂർപ്രകാശ്‌ പരസ്യമായി രംഗത്തു വരുമെന്ന്‌ കരുതാൻ വയ്യ. ഭരണപരിഷ്‌കാര കമിഷൻ ചെയർമാനായി എം കെ മുനീറിനെയും ഡൽഹിയിലെ പ്രത്യേക പ്രതിനിധിയായി ദേവരാജനെയും യുഡിഎഫിൽ ചർച്ച ചെയ്യാതെ നിയമിച്ചതാണ്‌ പെട്ടന്നുള്ള പ്രകോപനം. ഒരു കാര്യത്തിലും ചർച്ചയും കൂടിയാലോചനയുമില്ലെന്ന്‌ അടൂർപ്രകാശ്‌ പറഞ്ഞു. മാധ്യമങ്ങളിലൂടെ കാര്യങ്ങൾ അറിയേണ്ടി വരുന്നത്‌ ദുഃഖകരമാണെന്നായിരുന്നു വിലാപം.

സതീശനെതിരെ നേരിട്ടായിരുന്നു ആരോപണങ്ങൾ. യുഡിഎഫ്‌ യോഗം വിളിക്കാൻ ചെയർമാനായ മുഖ്യമന്ത്രി താൽപ്പര്യമെടുക്കുന്നില്ല, സ്വകാര്യ വിമാന യാത്രയിൽ വ്യക്തത വരുത്തണം, ഉപതെരഞ്ഞെടുപ്പിന്‌ വേണ്ടത്ര കോ–ഓർഡിനേഷൻ ഉണ്ടായില്ല, വൈദ്യുതി പ്രതിസന്ധി തെരഞ്ഞെടുപ്പിനെ ബാധിച്ചു, ബോർഡ്‌–കോർപ്പറേഷൻ ഉന്നതസ്ഥാനങ്ങളിൽ ഇടതുപക്ഷം നിയോഗിച്ചവർ തന്നെ തുടരുകയാണ്‌... എന്നിങ്ങനെ അടൂർ പ്രകാശിന്റെ പരാതികൾ നീണ്ടുപോയി. എഐസിസി ആണ്‌ തന്നെ നിയമിച്ചത്‌. അതിനാൽ ഇക്കാര്യങ്ങൾ അവിടെ അറിയിക്കുമെന്നും അവസാനം പറഞ്ഞുവെച്ചു. ഭരണപരിഷ്‌കാര കമിഷൻ, ഡൽഹി പ്രതിനിധി നിയമനങ്ങൾ അറിഞ്ഞിരുന്നോ എന്നു ചോദിച്ചപ്പോൾ, അക്കാര്യം ബന്ധപ്പെട്ട വേദിയിൽ അറിയിക്കും എന്നായിരുന്നു കെ സി വേണുഗോപാലിന്റെയും മറുപടി. പത്തനംതിട്ടയിലെ ചടങ്ങിൽവെച്ച്‌ വി ഡി സതീശനോട്‌ അടൂർ പ്രകാശിന്റെ വിമർശനം മാധ്യമങ്ങൾ സൂചിപ്പിച്ചപ്പോൾ മറുപടി പറയാതെ ഒഴിഞ്ഞുമാറി.

കോൺഗ്രസ് ആസ്ഥാനമായ കെപിസിസിയിൽ വിളിച്ചുചേർത്ത അസാധാരണ വാർത്താ സമ്മേളനം. തീരുമാനിച്ചുറപ്പിച്ചു വന്ന അടൂർ പ്രകാശ് മുഖ്യമന്ത്രിയുടെ നയങ്ങൾക്കെതിരെ  ആഞ്ഞടിച്ചു. പാർട്ടി മുഖ്യമന്ത്രിക്കെതിരെ പാർട്ടി  ഓഫീസിൽ ഉത്തരവാദപ്പെട്ട നേതാവ് പത്ര സമ്മേളനം നടത്തുന്നത് അങ്ങനെ ചരിത്രത്തിലേക്ക് നടന്നുകയറി. സി പിഎമ്മിൽഇത്തരം ഒരു സാഹചര്യം ആലോചിക്കാൻ പോലും കഴിയില്ല. ഇതെല്ലാം കണ്ടുകൊണ്ടിരിക്കുന്നത് തങ്ങളെ  ജയിപ്പിച്ച ജനങ്ങളാണെന്ന് ഓർക്കാൻ പോലും അടൂർപ്രകാശ് തയ്യാറായില്ല. ഇതിൽ നിന്നെല്ലാം കേരളത്തിലെ കോൺഗ്രസ് ഭരണത്തിന് ഇളക്കം തട്ടിയതായി മനസിലാക്കാം. 

മുഖ്യമന്ത്രിയുടെ വിമാനയാത്രാ വിവാദത്തിലും പ്രതിരോധത്തിന് മുതിരാതെ തീരുമാനങ്ങൾ ജനങ്ങളെ ബോധ്യപ്പെടുത്തണമെന്ന വിമർശനമാണ് അടൂർ പ്രകാശ് ഉയർത്തിയത്. വൈദ്യുതി പ്രതിസന്ധിയടക്കം ഉപതിരഞ്ഞെടുപ്പ് തോൽവിക്ക് കാരണമായെന്നും കൺവീനർ പറഞ്ഞു വച്ചു. ഭരണപരിഷ്കാര കമ്മിഷൻ അധ്യക്ഷസ്ഥാനത്തേക്ക് മുസ്‌ലിം ലീഗിലെ എം കെ മുനീറിന് നിയമനം നല്‍കിയതിനു പിന്നാലെയാണ് കോൺഗ്രസിലെ പാളയത്തിൽ പട പുറം ലോകമറിഞ്ഞത്. ആറാമതൊരു കാബിനറ്റ് പദവി കൂടി മുസ്ലിം ലീഗിന്  നല്കുമ്പോൾ ലീഗിൻ്റെ സമ്മർദങ്ങൾക്ക് സർക്കാർ വഴിപ്പെടുന്നുവെന്ന പ്രതീതി ദേശീയ തലത്തിൽ തന്നെ ചർച്ചയാകുമെന്നാണ്  ഒരു വിഭാഗം വാദിക്കുന്നത്. ഭരണ പരിഷ്‌കാര കമ്മിഷൻ വേണോ എന്നതിൽ  നയപരമായ തീരുമാനമാണ് വേണ്ടിയിരുന്നതെന്നും കെ. സി വേണുഗോപാൽ അനുകൂലികൾ വാദിക്കുന്നു. മുനീറിനോട് കോൺഗ്രസ് നേതാക്കൾക്ക് അടുപ്പമുണ്ടെങ്കിലും ലീഗിന് നൽകുന്ന കാബിനറ്റ് പദവിയിലാണ് തർക്കം. മുമ്പ് ഉമ്മൻ ചാണ്ടിസർക്കാരിന്റെ കാലത്ത് ലീഗിന്റെ കാബിനറ്റ് പദവിയാണ് വിവാദത്തിലായത്. 

അതേസമയം കാബിനറ്റ് പദവികളിൽ നേരത്തെ തന്നെ ധാരണയായിരുന്നു എന്നാണ് മറുവിഭാഗം  തിരിച്ചടിക്കുന്നത്. കാബിനറ്റ് പദവികളിലെ പുതിയ  തീരുമാനങ്ങൾക്കപ്പുറം വി ഡി സതീശനെതിരെ  പാർട്ടിയിൽ കുറച്ചുനാളായി ഉരുണ്ടു കൂടിയ കാർമേഘങ്ങൾ പതുക്കെ പെയ്തു തുടങ്ങി എന്നാണ് വ്യക്തമാകുന്നത്. വിമാനയാത്രയടക്കം  സമീപകാല വിവാദങ്ങളെ മന്ത്രിമാർക്കെതിരെ സിപിഎം നടത്തുന്ന ആക്രമങ്ങൾ ചൂണ്ടിക്കാട്ടി മുഖ്യമന്ത്രി പ്രതിരോധിക്കാൻ ശ്രമിക്കുന്ന അതേ സമയത്ത് തന്നെയാണ്  പാർട്ടിയിലെ എതിർ ഗ്രൂപ്പ് മറ നീക്കുന്നതെന്നതും ശ്രദ്ധേയമാണ്.