ഫ്‌ലൈ ദുബായ് വിമാനത്തിലുണ്ടായ അക്രമണം: അയാളെ അയച്ചത് ആരായാലും അവര്‍ക്ക് വലിയ വില നല്‍കേണ്ടി വരുമെന്ന് നെതന്യാഹു
ഫ്‌ലൈ ദുബായ് വിമാനത്തിലുണ്ടായ അക്രമ സംഭവങ്ങളില്‍ മുന്നിയിപ്പുമായി ഇസ്രയേല്‍ പ്രധാനമന്ത്രി ബെഞ്ചമിന്‍ നെതന്യാഹു. അക്രമിയെ അയച്ചവര്‍ ആരായാലും അവര്‍ക്ക് കനത്ത വില നല്‍കേണ്ടി വരുമെന്ന് നെതന്യാഹു പറഞ്ഞു. സംഭവത്തെ കുറിച്ച് ഇസ്രയേല്‍ അന്വേഷണം പുരോഗമിക്കുന്നതിനിടെയാണ് നെതന്യാഹുവിന്റെ പ്രതികരണം.
ഇന്ത്യന്‍ പൈലറ്റ് സ്മിത്ത് മച്ചാറിനെ ആക്രമിച്ച് വിമാനം തകര്‍ക്കാനുള്ള സഹ പൈലറ്റിന്റെ ശ്രമത്തിന് പിന്നില്‍ ബാഹ്യ ഇടപെടല്‍ ഉണ്ടായിട്ടുണ്ടോ എന്നും അന്വേഷണ സംഘം പരിശോധിച്ചു വരികയാണെന്ന് ഇസ്രയേല്‍ പ്രധാനമന്ത്രി വ്യക്തമാക്കി. സമയം കടന്നുപോകുന്തോറും ചിത്രം കൂടുതല്‍ വ്യക്തമാകുകയാണ്. അക്രമി ഇസ്ലാമിസ്റ്റ് തീവ്രവാദത്തിന് ഇരയായിരുന്നു. വിമാനത്തിലുണ്ടായിരുന്ന മുഴുവന്‍ യാത്രക്കാരുമായി വിമാനം തകര്‍ക്കുകയായിരുന്നു അക്രമിയുടെ ലക്ഷ്യം. അയാളെ ആരെങ്കിലും അയച്ചതാണോ എന്ന് ഞങ്ങള്‍ അന്വേഷിക്കുകയാണ്. അയാളെ അയച്ചവര്‍ ആരായാലും അവര്‍ക്ക് വലിയ വില നല്‍കേണ്ടിവരും നെതന്യാഹു പറഞ്ഞു.
ബുധനാഴ്ച ദുബായില്‍ നിന്ന് ടെല്‍ അവീവിലേക്ക് പോയ ഫ്‌ലൈ ദുബായ് എഫ്ഇസെഡ് 1073 വിമാനത്തിലാണ് ആക്രമണം നടന്നത്. വിമാനത്തില്‍ 174 പേരുണ്ടായിരുന്നു. ക്യാപ്ടന്‍ സ്മിത്ത് മച്ചാറിനെ സഹപൈലറ്റ് കുത്തിപ്പരിക്കേല്‍പ്പിച്ചതിന് പിന്നാലെ വിമാനം 30 സെക്കന്‍ഡിനുള്ളില്‍ ഏകദേശം 14000 അടി താഴേക്ക് പതിച്ചു. പരിക്കേറ്റിട്ടും മച്ചാര്‍ കോക്പിറ്റിന്റെ വാതില്‍ തുറക്കുകയും യാത്രക്കാരെയും ജീവനക്കാരെയും അകത്തേക്ക് പ്രവേശിപ്പിച്ച് അക്രമിയെ കീഴടക്കുകയും ചെയ്തു. വിമാനത്തിലുണ്ടായിരുന്ന യാത്രക്കാരായ രണ്ട് പൈലറ്റുമാരാണ് വിമാനം നിയന്ത്രിച്ച് സുരക്ഷിതമായി സൗദി അറേബ്യയിലെ തബൂക്കില്‍ ഇറക്കിയത്.
https://www.facebook.com/Malayalivartha
