മനുഷ്യകുലത്തിനു തന്നെ അപമാനകരമായ ക്രൂരതകള്‍ കാണിക്കുന്ന ഐസിസ് ഭീകരരെ കീഴടക്കാന്‍ സഖ്യസേനയുമായി ചേര്‍ന്ന് പൊരുതുന്ന ഇറാഖ് സൈന്യം ഒരു വശത്തും മൊസൂള്‍ ഡാമിനുവേണ്ടി ദാഹിക്കുന്ന ഐസിസും മറുവശത്തും നില്‍ക്കുമ്പോള്‍ ലോകം ആശങ്കയുടെ മുള്‍മുനയില്‍. വന്‍ അപകടഭീഷണി നേരിടുന്ന മൊസൂള്‍ അണക്കെട്ടില്‍ ഒരു സ്‌ഫോടനമുണ്ടായാല്‍പ്പോലും അത് വന്‍ തകര്‍ച്ചയ്ക്ക് കാരണമാകുമെന്നാണ് അണക്കെട്ടിനെ സുരക്ഷിതമാക്കാന്‍ ശ്രമിക്കുന്ന ഇറ്റാലിയന്‍ കമ്പനിയുടെ മുന്നറിയിപ്പ്.

അണക്കെട്ട് തകരുന്നത് ഒരു അണുബോംബ് സ്‌ഫോടനത്തെക്കാള്‍ മാരകമായിരിക്കുമെന്ന് പ്രതിരോധ രംഗത്തെ വിദഗ്ധരും മുന്നറിയിപ്പ് നല്‍കുന്നു. എത്രത്തോളം ബലപ്പെടുത്തല്‍ നടത്തിയാലും അത് അപകടം വൈകിപ്പിക്കാമെന്നല്ലാതെ പൂര്‍ണ സുരക്ഷ വാഗ്ദാനം ചെയ്യുന്നില്ലെന്നും അവര്‍ പറയുന്നു.
അണക്കെട്ട് തകര്‍ന്നാല്‍ 15 ലക്ഷത്തോളം പേര്‍ കൊല്ലപ്പെടുമെന്നാണ് കണക്കാക്കിയിരിക്കുന്നത്. ഡാം തകര്‍ന്നുണ്ടാകുന്ന വെള്ളപ്പാച്ചിലില്‍ 45 അടിയിലേറെ ഉയരത്തില്‍ തിരമാലകളുണ്ടാകും. മൊസൂള്‍ നഗരത്തിന്റെ വലിയ പ്രദേശത്തെയാകെ ആ പ്രളയം വിഴുങ്ങും. മൊസൂള്‍ നഗരകേന്ദ്രത്തിന് 50 കിലോമീറ്റര്‍ വടക്കുമാറി ടിഗ്രിസ് നദിക്കുകുറുകെയാണ് അണക്കെട്ട് സ്ഥിതി ചെയ്യുന്നത്. കഴിഞ്ഞ ഒന്നരവര്‍ഷമായി ഇറ്റാലിയന്‍ കമ്ബനി ട്രെവിയിലെ അധികൃതര്‍ ഡാം ബലപ്പെടുത്തല്‍ ജോലികള്‍ നടത്തുന്നുണ്ട്.
തീര്‍ത്തും സുരക്ഷിതമല്ലാത്ത മേഖലയിലാണ് ഈ അണക്കെട്ട് സ്ഥാപിച്ചിട്ടുള്ളത്. കടുത്ത മണ്ണൊലിപ്പ് അതിന്റെ ബലക്ഷയം കൂട്ടുന്നു. തുടര്‍ന്നാണ് ഇറ്റാലിയന്‍ കമ്ബനിയെ ബലപ്പെടുത്തല്‍ ജോലികള്‍ ഏല്‍പ്പിക്കാന്‍ ഇറാഖ് സര്‍ക്കാര്‍ തീരുമാനിച്ചത്. എന്നാല്‍, 2014-ല്‍ ഡാമിന്റെ നിയന്ത്രണം ഐസിസ് പിടിച്ചെടുത്തതോടെ ബലപ്പെടുത്തല്‍ ശ്രമങ്ങള്‍ താല്‍ക്കാലികമായി തടസ്സപ്പെടുകയും ചെയ്തു. ഇതേത്തുടര്‍ന്നാണ് ഈ മേഖലയില്‍ പോരാട്ടം രൂക്ഷഷമായതും. 

ഐസിസിന്റെ നിയന്ത്രണത്തിലുള്ള മറ്റൊരു ഡാമിനുവേണ്ടി സിറിയയിലും പോരാട്ടം രൂക്ഷമാണ്. യൂഫ്രട്ടീസ് ഡാമിന്റെ നിയന്ത്രണത്തിനായി കുര്‍ദിഷ് സേനയാണ് ഐസിസുമായി യുദ്ധം ചെയ്യുന്നത്. അമേരിക്കയുടെയും സഖ്യകക്ഷികളുടെയും സഹായത്തോടെ സിറിയന്‍ സൈന്യവും പോരാട്ടത്തിലുണ്ട്. ഐസിസ് ഭീകരരെ തുരത്തുന്നതില്‍ ഏറെക്കുറെ വിജയിച്ച അവര്‍ അണക്കെട്ടിന് മൂന്നുകിലോമീറ്റര്‍ വരെ അടുത്തെത്തിയതായാണ് വിവരം.